تقرير مفصل بالصور لفهد بن محفوظ 14 يوم في ماليزيا

صعدنا للغرفة نتجهز لرحلة طويلة عبر الجزيرة .,. زكريا وصل بالموعد الساعة 8 وهو تحت عند اللوبي ينتظرني .,. حملنا العدة من شنطة على ظهري وشنطتين الكاميرا الفيديو والفوتو ولا ننسى الموية والاحتياجات الخاصة من أقلام وأوراق وما إلى ذلك من احتياجات .,. طبعا الفندق مزودك داخل الدولاب بمظلتين وكشاف بطارية وجهاز كهربائي يقتل الناموس .,. أخذنا المظلتين وايانا حماية من الشمس .,.,

ركبنا للموتر الساعة 8 وعشر تقريبا وكان اتفاقي مع زكريا بالساعة وكانت الساعة 25 رنقت .,. خيرني بين مجموعة أماكن من شلال الى النهر الى التلفريك الى الجزيرة الحامل الى نصب النسر .... الخ الخ .,. وعنده ورقه مكتوب فيها وين تبي بالضبط .,. قلت مدام الوقت بدري وتو الشمس ما سخنت خلنا ننقز لناخذ جولة نهرية في نهر المانغروف .,., واحنا في طريقنا مشغلين أبو نوره :106: وكان الوفا طبعي ترى انتي زرعتيه .,., ويشرح لنا زكريا عن طبيعة الجزيرة وكل مكان نمر منه يقول لنا هذا كذا وهذا كذ .,. وصلنا للنهر .,. استقبلنا سائق القارب وكانت الرحلة لمدة 3 ساعات بقيمة 350 ريال .,. مع اني جاي بدري ولكن مشيتها واشتريت راحتي .,. كانت رحلة ممتعة بكل المقاييس خصوصا اني جيت مبكر .,.,

والصور تقل لكم كل شي



في انتظار الانطلاق .,. ركبنا ولبسنا جاكيت الطفو .,. وبسم الله



طبعا دبيب ما كان له جاكيت على مقاسه .,. قال ما عليكم أعرف اسبح :surf



سواق القارب يقول من حظكم جيتو بدري مافيه زحمة وأيضا منسوب ماء النهر منخفض لذلك راح ناخذ جولة أكبر ونبدأ من البحر وبعدها النهر .,.



بداية انطلاقتها باتجاه البحر الفاصل بين لانكاوي وتايلاند



لاحظو اللون الغامق عالجبل تحت الشجر .,. إلى هنا المفترض يكون مستوى ارتفاع الماء .,.



لم تحدد الحلم من الحقيقة .,. لا زلنا في البحر



الخضرة تلف كل شئ هنا بأشجار المانغروف



قارب صيد وتظهر تايلاند من خلفهم



أمواج البحر كانت شبه متهيجة وفيه شوية هواء باااارد مع رشات الماء من القارب



والأرض مفروشة بالأخضر



أحد المناظر الساحرة في هذه الرحلة



قال ايش قال يعرف يسبح .,. وأول ما ركب تخبى تحت عشان ما يتغرف بالموية



وكأنك تشاهد السينما امامك



مناظر تشرح الخاطر



بدأنا بالدخول إلى النهر .,. سبحان الله الفق واضح وتجلت أمامي الآيات .,. (( مرج البحرين يلتقيان .,. بينهما برزخ لا يبغيان ))



طبعا دخلنا للنهر من الجهة العكسية وهذه أحد اليخوت



أحد المباني الطافية على النر ويبدو أنها ورش لإصلاح مواطير القوارب



مجموعة كبيرة من اليخوت :114: مصفطه على جنب



يخت صاحب السمو الملكي الأمير الوليد بن طلال صاحب فندق الفور سيزون في لانكاوي



هنا مقهى مبسط وبقالة وأحواض للسمك تطعمها بنفسك بعشرة رنقت .,. هذي الدبدوبة اسمها (( أومي )) كانت في استقبالنا



تنادي اللخمة .,. طبعا تتكلم العربي والانجليزي .,.



هـــم يا قمييييييييل



السرطان اخذته بيدي .,. أنواع الدغدغة :109:



حبوبة وطيبة .,. وتسوي حركات بعد خخخخخخ

بعدها قالت تعالو عندي لكم مكان حلو لكم .,. وصلنا إلى بلكونة خشبية تطل على الأشجار من حولك .,. رائحة المكان (( مانجا )) :113:

بعدها رجعنا للقارب وسلمني السواق القيادة واخذت فيه لفة حلوة .,.



توجهنا إلى ممر تحت جبل مبسط كان سقفه ملئ بالخفافيش وطبعا السائق استأذني هل عادي ندخل أو لا



بدأ منسوب المياه يرتفع



أحد الزواحف على جانب النهر .,. خواف .,. ويطارد القباقب الملونة الصغار جدا .,. لو دققت بالصورة بتلقى قبقب لونه أصفر تحت راسه بـ 2 سم تقريبا



كنه يقول // ارررررررحب وين الأكل



مالت عليك انت ودبيب حقك مافيه بطاطس أو تشيبس تراني اسبح واذا رميته علي بنادي البقية



النسور وروعة المنظر تبهرك في مساحة من النظر الممتع



عد واغلط من النسور .,. طبعا في كل مرة ودك توقف في أي مكان بالنهر بس أشر للسواق



جذوع الأشجار من الأسفل



فيه أحلا من كذا !!!



دبيب شاف هالنسر ودخل بالشنطة .,. وش فيك خايف .,. قال لا شمس وحر :114:



فعلا في نهاية رحلتنا كانت الشمس ازدادت سطوعا وبدأت الحرارة تزيد .,.,

وصلنا لنقطة ما بدأنا .,. ونزلنا بحمد الله وسلامته في رحلة كانت جدا ممتعة ولله الحمد

لقينا زكريا ينتظرنا وفتح لنا الباب .,. كان فيه بوفية صغيرونه تبيع مثلجات وعصيرات .,. أخذنا لنا سبرايت بااااارد ومنعششششش .,. وطوالي على الشلالات .,. ومن الشلالات على التلفريك .,. طبعا السواق معي طوال الرحلة ويعتبر مرشد جميل للرحلة الله يسعد ذاك الوجه .,.



انتبه من هالأشكال لا توريها ان عندك كيس أو تاكل والا تشرب قدامها .,. بغى يجيب في زوجتي العيد وطرده زكريا بالنبيطة .,.

راح تطلع ممر (( طلوع )) مشي عالاقدام وعندك خيارين اما عن طريق السكة لأنها مغلقة عن السيارات أو عن طريق درج .,. واتبع اللوحات بالعربي موجود كل شي .,.



بااااااااااااااااااارد .,. وشي حق السباحة .,. زوجتي شافت الوضع مافيه أحد .,. وطببببببت



يكفيك تحط يدك فيه وتغسل به وجهك تحس بانتعاش ولا هيد اند شولدرز



شئ ولا أروع ولا أجمل .,. طبعا هنا زلقت زلقة عالبركة وربكم سلم .,. خرب جوالي خخخخ

":":":":":":":":":":":":":":":":":":":":":":":":

بعد ما حسينا ان العوائل بدت تتجمع قلنا نسبقهم للتلفريك ووينك يا زكريا .,. في طريق الرجعة مرينا على بعض الأكشاك اللي تبيع الملابس والمثلجات .,. وطقيت لي بدلة حلوة وزوجتي أخذت ملابس روعة عليها وكلها ما تجاوزت 90 رنقت .,. تقريبا أكثر من 7 فنايل وبدل


التلفريك عبارة عن فندق أساسا ومجمع تجاري مفتوح ومن ضمن مرافقه التلفريك .,. طبعا يمنعون تحمل معك أي كيس الا شنطة المدام .,. وخلينا كيسنا حق الاكل والشرب على طاولة جنب الكاونتر .,. أم الأمان يا ناس .,. قيمة التلفريك ريالين ونص :110: بغيت أبكي يوم سمعت السعر



منظر عام للجزيرة من فوق



التلفريك من الأسفل (( من الشلال ))



أثناء صعودنا للقمة بدأت لفحة البراد تهب .,.



وصلنا للنقطة الاولى وريحنا فيها وأخذنا لنا بعض الصور وبعدها اتجهنا للنقطه الثانية .,. وحافظ على التذكرة .,.



المنظر بين النقطتين



جسر معلق تنزل له من درج وتتمشى عليه .,. بصراحة من قوة التعب اللي بعد الشلال ما جالي نفس انزل له

بعد ذلك اتجهنا الى الفندق ولكن في طريقنا لفت نظري محل لبيع الاكسسورات والتحف الغريبة .,. زكريا وقف هنا لاهنت .,. قال ولا انت .,. ابشر :115:

دخلنا للمحل .,., مرتب ومنظم واسعاره حلوة .,., بائعة هناك صينية استاذتني في بعض الأسئلة .,. قلت لها على الرحب والسعة .,.

الصينية / ألاحظ بعض العرب هنا يلبسون أغطية سودا والبعض ما يلبسون .,. وش السبب ؟؟

فهد / الدين الاسلامي أمر النساء المسلمات بالحجاب في حضرة النساء ومثل ما انتي شايفة زوجتي متحجبة الحجاب الإسلامي الكامل .,., اما الغير متحجبات فالدين لديهم ضعيف وهمهن إظهار الزينة لا اكثر ولا أقل .,.

الصينية / طيب في السعودية وش اكثر تحبون من الاطفال الأولاد والا البنات ؟

فهد / مافيه فرق بين الاثنين كلهم من عند الله وزينتهم هي زينة للدنيا .,.

الصينية / طيب تقدر تطلق زوجتك ؟

فهد / استغربت من هالسؤال .,.

الصينية / اسفة ولكن سمعت ان العرب الأغنياء يتزوجون بأكثر من وحدة

فهد / أها ,, الاسلام يحلل للرجل الزواج حتى أربعة زوجات .,. ولكن المسألة ليست حرة ولكنها مقيدة بقيود .,. إما أن تكون هناك مشكلة في الزوجة الاولى أو مشكلة في الرجل نفسه .,. أو أي شرط مخل بالعلاقة بواحدة فقط .,. وحتى أن تزوج أربعة لا بد أن يعدل بين الجميع فلايظهر لهذه العطف ويترك هذه لا.,.

الصينية / الله ما أجمل الاسلام .,.

فهد / الاسلام هو دين للسماحة للعدل للمساواة بين الرجل والمرأة وفيه تكريم كبير للمرأة .,.

الصينية / ثانيكو برذر

فهد / هلا ومسهلا

شريت من عندها هدية لزوجتي .. خاتمين فضة مرصعة بالألماس وهي أخذت عصي ملاعق صينية هههههه ودفتر وقلم طقم عليه شعار لانكاوي

رجعنا للفندق الساعة 3 تقريبا وحاسبت زكريا بـ 175 رنقت .,. واعطيته 200 يستاهل والله ما قصر معي .,.

اتجهنا لمطعم ليالي الشام داخل ساحة الفندق وتغدينا ذيك الغدوة ... وبعدها نووووووووووووم إلى العشاء تقريبا


والصور تقول :



صحينا على صوت مطر يهبل



انا في البداية اول ما سمعت المطر قلت قومي قومي شكله تسونامي هههه قمت خايف بصراحة :110:



بدأ المطر يزداد



نزلنا شوي للبهو واخذنا لفتين بسيطة .,. تعشينا خفيف ورجعنا نكمل نومتنا


وانتبهو تفتحون الشباك لان الحشرات الطائرة تدخل الغرف بالليل


هذا اليوم هو أجمل يوم قضيته في ماليزيا .,., شلال ونهر وتلفريك وجبل ومطر وبحر .,. يعني كل شي تحقق في يوم واحد اللهم لك الحمد


نلتقي بكم في اليوم الخامس في مشاركة قادمة باذن المولى

فهد بن محفوظ

السلام عليكم ورحمة الله وبركاته

اليوم الخامس / الخميس 21 / 8

يوم التسوق العالمي .,. لازال المطر يهطل من البارحة ولا وقف ماشاء الله تبارك الله .,. صحينا الصباح على صوت زخات المطر .,. وزوجتي البارح تعرفت لها على كذا حرمة من الرياض كانوا جالسات عالمسبح وهاتك يا سواليف ووناسة .,.

اتصلت في زكريا على شان اواعده يوديني إلى (( كواه )) عاصمة الجزيرة للشوبنق .,. قال ما اتوقع اليوم لاني متواعد مع احد السياح .,. قلت له اوكي ولا يهمك .,. نزلنا للفطور المعتاد في جو مبكر وممطر وجميل جدا .,. بعدها أخذنا لفة على الشاطئ ومعانا مظلاتنا .,. وبعد ساعة تقريبا طلبت تاكسي وعلى العاصمة (( كواه )) .,. كان مبلغ التاكسي 40 رنقت .,. وسط الطريق تذكرت إني نسيت المحفظة .,. واكلم التاكسي ونرجع للفندق واخذها وانزل من جديد .,. زودته عشرة رنقت .,. وقت السفرية كانت 45 دقيقة تقريبا .,. وصلنا إلى مجمع تجاري على الطريق وقال وش رايك تبي هذا .,. قلت يالله مشكور .,. مجمع من ثلاث أدوار وفيه من كل ما هب ودب .,. ورخيص جدا جدا جدا جدا جدا .,.

والصور تقول /




لازال المطر من البارح وهو يضرب



إفطارنا العزيز



أحلا شي البيض لما يضبطه الشيف قدامك .,.



في طريقنا للشاطي ومعي كورن فلكس تهريب خخخخخخخخ



مسبح اجمل مافيه كل شي :109:



الغيوم تحيط المنطقة من كل مكان



ساحة الشاطي مع الملاعب المرفقة



يا روعة المنظر



حتى ظل الشجر ما ودك تدوس عليه



بدأ الضباب ينزل حبه حبه



الجو ندى والنفس ممتلئة بالهدى



كثافة اللون الأخضر تلف المحيط



يا ما حلا الفنجال مع سيحة دبيب :115:



انطلاقتنا لكواه



أينما تنظر ترى الخضرة



منطقة ريفية وقرى متناثرة يملؤها حيوان (( الجاموس ))



المطر يضرب وبقوة



والصورة أكبر دليل



مطعم للوجبات السريعة داخل المجمع



دبيب مبسوط على رخص الاسعار وجودة المبيعات



يقول انهم زملاه بالجامعة .. دبيب ما نسينا وش سويت بمعرض ما تحت البحر



محمول مكفول !!!



بعدما انتهينا من التسوق وراجعين للفندق بتاكسي آخر والسعر 30 رنقت



مناظر لمجموعة منازل

الامطار والتوقيت كان جدا ممتاز حمدا لك يا رب



منزل عجبني تصميمه



منظر يفتح شهيتك لحبة بخاري وببسي



مزارع الرز المنتشرة في كل مكان .,.



مجهزين المجاري في جميع الظروف



كم خيشة رز تكفي هنا !!!



أخ من ينقل هالمنطقة بس للدمام خخخخخخ بتحترق في ليلتين



بدا الضباب يغطي الجبال



ما أروعك يا لانكاوي

":":":":":":":":":":":":":":":":":":":":":":

وصلنا للفندق وتونسنا بالتمشي تحت المطر الخفيف .,. وصلنا إلى مطعم ليالي الشام وجلسنا على ضفة نهر خلفي توني أكتشفه .,. طلبت لي بحري وكبسة لحم .,. تغدينا وذهبنا للراحة في الغرفة وبعدها جلسة ليلية ولا اجمل في الفندق .,.

والصور تقول /




جلسنا على الطاولة المطلة على هالحديقة



وهنا المنظر الثاني على ضفة نهر



لاحظ قطرات المطر على سطح الماء



من قدك .,. حتى اهل المنتدى طايحين فيك تمدح



منظر زواية من المطعم



منظر من الزاوية الاخرى



مطر مطر مطر مطر مطر




انتهى هذا اليوم بعد التسوق وأخذ نصف ما في المجمع بصراحة


نلتقي بكم في اليوم السادس في مشاركة قادمة


فهد بن محفوظ

مريت وبأرجع أكمل الباقي


المهم الحمد للـــه على السلامه يافهد

السلام عليكم ورحمة الله وبركاته

اليوم السادس الجمعة 22 / 8 / 2008 م

هذا اليوم هو آخر الأيام لي في لانكاوي بع أن قضيت أربعة أيام في هذه الجزيرة كانت كافية بالنسبة لي لأشتاق لها في لحظات الخلوة ... كالعادة صحينا بكير للإفطار وتجهيز العفش لأن رحلة العودة كانت على الساعة 5 العصر ولكن حبيت أقضي الساعات من التشيك اوت لحد الاقلاع داخل المطار .,. بعد الفطور أخذت الجولة المعتادة داخل الفندق وتوجهنا للغرفة لتجهيز الشنط .,. ونزلت أنا طالبا تاكسي ومتجه إلى أقرب حلاق (( salon )) .,. جورنا بكل الديرة أغلبها مسكر بسبب التجهيز لصلاة الجمعة .,. قال راعي التاكسي يا انا يالحلاق ويروح لواحد هندوسي ويطلعه من بيته ههههه وحلق لي وضبطنا السكسوكة بـ 15 رنقت .,. رجعت للفندق وسوينا الشيك اوت .,. بصراحة الاكل في الفندق هو اللي كان غالي والا الباقي مية مية .,.

والصور تقول :




الأمطار لليوم الثالث لم تتوقف



حاجز المسبح وآثار المطر عليه



يا مقسم الأرزاق إقسم لنا من هذه القطرات



من البقرة إلى المائدة :109:



اللفة المعتادة بعد الإفطار



لو هالممر عندنا تلقون عليه لوحة (( للعوائل فقط )) :110: وهي أصلا (( للعائلات فقط )) :109:



كان ودك حافظ أغنية هندية تغنيها هنا :11ight:



يووووووووه :112: هذاك اللي قاعد خرب علينا اللفة .,. ابي احجز الشاطي قبل ههههههه



غزارة المطر تخليك تتحسف ان اليوم يوم سفرك إلى كوالا لمبور



عيناك ٍ .,. كأنما تنبض في غوريهما النجوم .,. أنشودة المطر



واطارد وجهك .,. في الأمطار .,. وفي أضواء السيارات



عشق ِ جمع ما بين قاع ِ وغيمة .,. سيّل على صدر الثرى دمع الامزان


يتبع

بعد ما انتهينا من التشيك اوت اخذنا تاكسي وعلى المطار القريب الساعة الواحدة تقريبا وكان سعر التاكسي 12 رنقت يعني السعر ثابت من الفندق للمطار ومن المطار للفندق .,. وصلنا المطار وكان وقتها فيه رحلة في نفس توقيت وصولها وكان المطار زحيم مهوب زحمة .,. تعدينا نقطة التفتيش وصفيت طابور مع المسافرين لكاونتر اير ماليزيا .,. زوجتي استاذنتني وقالت مدام بتصف انا بطلع للمجمع الداخلي بالمطار اتسوق قلت اوك .,. راحت ونسيت الجوازات معها .,. طول الوقت وانا صاف اتابع من وراي لعلي اشوفها مافيه فايدة .,. باقي علي عايلة قدامي .,. الا وهي محضرة .,. قلت الحمد لله انك جيتي ترى الجوازات عندك طلعناها وخلصنا امورنا .,. بعدها اخذنا جولة في المجمع واعجبتها لبسة قالت تبيها حق العيد .,. تستاهل والله .,. وناخذ طقم العيد كله من لانكاوي :x1: .,. جولة كانت جميلة استمرت ساعتين الى ثلاث ساعات .,. مطار هادئ وفيه الراحة بصراحة .,. صعدنا للدور الثاني واسترحنا في أحد المطاعم هناك اللي يطل على المطار كله .,.

والصور تقول :



كاونتر الشحن .. لايوجد خدمة ذاتية



صورة عامة للمطار من المطعم العلوي .,.



واحد كوفي لاتيه لو سمحت



واجهة المطعم وفيه كوفي شوب أيضا



الملقوف مرة ثانية داخل المطار !!! :105:



انا في المطااااااااااااار

":":":":":":":":":":":":":":":":":":":":":":":":":":":":":": "

فتحت صالة المغادرة أبوابها قبل الرحلة بساعة ونص تقريبا وبسم الله دخلنا ...



مدرج المطار



ما يحتاج يبنون برج مراقبة



أخذت خمس دقايق مساج انا وزوجتي الواحد بـ 3 رنقت .,. وهذا ابن الإيه عطوه مجانا :112:



طيارتنا وصلت



منظر لصالة المغادرين من جهة كراسي المساج



دبيب يقول هذي طيارته اللي باعها قبل سنتين :114: معقول !! وش رايكم ؟



بدأنا بالابتعاد عن المطار .,.



لا نكاوي .,. جزيرة النسر

:/:/:/:/:/:/:/:/:/:/:/:/:/:/:/:/:/:/:/:/:::/:/:/:/:/:/:/:/:/:/:

يتبع

رحلة كانت نفس زميلتها أثناء الذهاب لا فرق لا في الطائرة ولا التوقيت ولا المأكولات والشراب .,. زوجتي عن يميني (( شباك )) وانا بالنص وسائحة أوروبية عن يساري .,. أحس ودها تتكلم معي بس خايفة من عباية زوجتي خخخخخخ .,. هي اللي تعطيني العصير والشاي والسكر وانا بدوري اعطي زوجتي .,. طبعا زوجتي تقول سولف معها شكلها حبتك خخخخخخخ :115: .,. فتحت معها موضوع عن السياحة في ماليزيا وانتقلنا بقدرة قادر على عباية زوجتي وش سرها :114: قالت لا تزعل بس شكلها بشعه صح ؟ .,. قلت لا والله لكن بعطيك مثال : لو قدمت لك حلاوة جلاكسي من البقالة مكشوفة او مكشوف جزء منها هل تشرينها .,. قالت مستحيل .,. قلت لها ديننا يشبه المرأة الجميلة بهذه الحليوات لابد أن تكون محفوظة عن التلاعب بها من كل العيون .,. استانست من الكلام وزدتها من الشعر بيت ووريتها بعض صور المدام في لانكاوي .,. بصراحة حسيت ان عيونها بغت تطلع .. الحين شلون اقول لها قولي ما شاء الله هههههههههه .,ز أهم شي اني غيرت فكرتها عن العباية وما يلبسها الا البشعات

والصور عم بتقول /



كوالا من الأعلى



جذب سياحي مجنون .,.



مزارع الرز من الاعلى



بتتعب عيونك من كثر ما تشوف الخضرة



مصحصح ومفتل عالآخر

":":":":":":":":":":":":":":":":":":":":":":":":":":":":":": ":":":

نزلنا للمطار (( طبعا هنا ما فيه قطار )) لان الرحلة داخلية على طول توجهنا لسير الشنط واخذنا اغراضنا واتجهنا لصالة الوصول وهاتك يا تلقف من أصحاب التكاسي .,. انا مخطط هالمرة اني اجرب يالباصات يالقطار لكن قلت خلني اسأل عن التكاسي واشوف اسعارهم .,. بكم ياولد بـ 180 .,. بكم يا عم بـ 190 .,. طبعا بس اسأل وانا ماشي وهم يسجبون فيني بنخصم لك بنخصم لك .,. اتبعت اللوحات الارشادية لطريق القطار ونزلنا تحت ثلاث ادوار تقريبا لحد ما وصلنا لبوابة القطار .,. أخذت تذكرتين الوحدة بـ 35 .. شوف الفرق !!! وقطار نظيف ولافيه ازعاج وسريع ويوديك لمحطة القطارات طوالي وانت من هناك خذ تاكسي او اذا عارف المنطقة قول لهم ويوديك قطار آخر بـ 2 رنقت بالكثير

والصور تقول /



القطار من الداخل .,. لاحظ النظافة والاتساع والراحة



مستانس .,. أول مرة يركب قطار



يتبع

":":":":":":":":":":":":":":":":":":":":":":":":":":":":":": ":":":":":":

بعدما وصلنا إلى محطة القطارات الرئيسية اخذنا لنا تاكسي على فندق ناسي اسمه لاني ما سكنت فيه ولله الحمد (( خمني فيه صاحب المكتب اللي بالدمام )) بصراحة وصخ واغلب موظفيه جنس ثالث والمنطقة اللي هو فيها منطقة دعارة .,. خليت الشنط بالفندق واخذت تاكسي .,. ورحت ادور على فنادق .,. لقيت فندق كراون بلازا وشنغريلا وكذا فندق حلو .,. ورسى اختياري مع المدام على كراون بلازا .,. الليلة بـ 510 شاملة الإفطار .,. دفعت كل شي وطلعت المدام للغرفة .,. ورجعت بالتاكسي الى الفندق الاول واخذت شناطي وحملتا على كراون بلازا .,. فندق 143 نحمة :114:

والصور تقول /



دبيب نايم عالسرير .. تصدقون توني ادري اني صورته عالسرير هههههههه



البانيو يطل على الغرفة بطريقة جدا جميلة



مدخل الغرفة الرئيسي .,.



تعجبني طريقة تنسيق المناظر وكيفية توزيعها على الجدران



تكرمون .,. ولكن عشان الشطاف



هنا نمنا وهنا سنكون معكم في اليوم القادم بإذن الله


نلتقي قريبا في كوالا لمبور


فهد بن محفوظ

فهد

الله يسعدكم اخذتنا معك وانت ما تدري

حنا نايمين


ننتظر اليوم القادم باذن الله


معك الى آخر صوره


تحياتي

السلام عليكم ورحمة الله

اليوم السابع // السبت 23 / 8 / 2008

بعد اللفة العويصة حقت البارح من فندق لفندق وانتهت بفندق كراون بلازا اخترنا غرفة في المنتصف لانه 30 دور وأنا اخترت الدور الـ 15 كانت إطلالتها جدا جميلة على الشارع الرئيسي (( السلطان إسماعيل )) كانت نومه رايقة عالآخر ولله الحمد ولا تسمع ضجة الشارع ولاهم يحزنون .,. صحينا على الساعة سبع تقريبا وجهزنا أغراضنا وتوجهنا لمطعم الفندق للإفطار وبعدها أخذنا جولة تفقدية بسيطة في الفندق وقابلنا المترجم (( عمر )) جيبوتي يتحدث العربية الفصحى وشغال معاهم في نفس الفندق .,. طيب وحبوب ومستحيل يخبي عنك شي .,. واللي يروح هناك يبلغه سلامي ويقول له الشاعر فهد يسلم عليك .,. وكذلك فيه مترجم آخر اسمه عبدالمجيد لكن هذا ماسك الرد على الهواتف من داخل الغرف ,., توجهنا بعد الإفطار إلى شارع العرب (( بوكيت بنتانق )) مشي عالأقدام لمدة 10 دقايق والمشي بحد ذاته متعه .,.

والصور تقول /



صاحي قبلنا ويتفرج في الرايح والجاي من الشباك



منظر عام من الشباك ويظهر تحت محطة المونوريل (( راجا شولان )) أمام مدخل الفندق بالضبط وكذلك عمارة بنكية عن يسارك وفيها أنواع الصرافات .,.



أفضل ما في الفندق مطعمهم اللذيذ بصراحة وهو من أفضل المطاعم في الفنادق اللي زرتها



مهوب مشتهي يفطر .,. بس شرب شاهي واكل قرص عسل



المسبح اللي يطل عليه المطعم



عرفت وش يبي .,. وأخذ له حمام حلو تحت اشعة الشمس



الفندق من الجهة الخلفية .,. جهة المسبح

:":":":":":":":":":":":":":":":":":":":":":":":":":":":

[

في طريقنا لشارع العرب وقفنا عند محل كبيييييير وفيه كل شي تقريبا .. ساعات اكسسورارات شنط محافظ .,. كان غير مرتب يعني (( حراج )) .,. وكل البياعين بنقاله .,. دخلت في قسم الشنط النسائية العلاقي .,. أنواع الماركات وام التقليد .,. بكم هذي .,. طلع لي كتالوج ووراني صورتها بـ 900 رنقت .,. قلت لا لا وش دعوة انا اول اجي هنا وصدمتني .,. قال شوف المدير مهوب موجود (( يساسرني )) وانا راح اعطيك اياها بسعر طيب بـ 500 .,. قـــــ:109:ـــــم .,. قلت لا لا نزل نزل .,. قال انت حط لها سعر .,. قلت له باخذها بأقل من ميتين .,. قال قدام :11ight:.,و قلت طيب لو أخذت منك عشرين حبه انا أختارها ,., وفعلا اخترت عشرين برفقة خبيرة الشنط النسائية زوجتي .,. قال اعطيك العشرين هذي بـ 1100 رنقت :114: قلت معي ست مية تبي .,. من هنا من هنا من هنا .,. وصلناها للألف .,. قلت له ما عندي الا 600 .,. آخر شي فقد اعصابه وقام يسب ههههههههههه اخذت بعضي وطلعت :109: تخيلو من 18000 رنقت الى 1000 :114:

والصور تقول /



المونوريل وتحته يوجد احتفال يقام كل سبت والناس عليه زحااااام



ستيج الحفل ما يفوتني طبعا والكشافات بعد بحكم تخصصي في الحفلات :113:



كل الشارع كان يرقص وكان منظر عجيب فعلا فوقفنا نتابع :11ight:ورا ورا

أخذنا جولة عامة على الشارع .,. بضاعات مقلدة ورخيصة وفيه شوية ماركات وكذلك المجمعات التجارية مليانه فيه ومليان مقاهي ومطاعم عربية ومساج .,. على طاري المساج كل واحد او وحدة يعرض عمله في لوحة فلين مغلفة ويقول (( مساز .,. مساز )) المهم فيه عجيز تقول لي (( مساز )) شفت اللوحة حقتها ومسكتها بيدي .,. هي تعجبت .,. وانا بطريقة فنية رحت قالبها لأنها كانت ماسكتها وهي مقلوبه :109: هههههههههههههههههههههههههههههههههههههههههههههههههههههههه وخوياتها يضجكون وهي تضحك على نفسها هههههههههههههههههههههههههههههههههههههههههههههههههههههههه .,. طبعا بتلاقي الكثير من موزعي البروشورات وخصوصا من الجنسية العراقية يعطونك بروشور عن العود وعن مطعم الطربوش وخيمة الصحراء ..... الخ

بعد ما غربت الشمس رجعنا للفندق أيضا مشي والاكياس تكسر الظهر :110:لاننا قشينا نص الشارع من عودة والعاب وملابس .,. ريحنا شوي بالفندق ونزلنا بعدها على التوين تاور .,., الفندق توصلتك بوابته الداخلية الى الشارع المرادف للبرجين .,. وانتبه لانها تسكر الساعة 12 .,. وصلنا إلى مجمع يسمى (( surya )) سوريا ومعناتها الشمس .,. المجمع لاصق في البرجين تماما .,.

والصور تقول :



تحفة فنية شامخة



في الطريق نمشي ولاحظو الخرائط في كل مكان يعني انسى تضيع



رسمة جميلة على الجدار الايمن لبوابة المجمع ولكن فيها سر عجيب !!! :114:



الرسمة مكونة من قواطي :113: بصراحة القوطي هو دبيب وامثاله



مدخل المجمع .,.



منظر عام من الطابق الثاني



أحد محلات الالعاب عجبتني فكرة عرضه



محل لبيع الهدايا .,. وانا متفشخر بمحلي بالخبر مالت عليك يا دبيب



منظر آخر لنفس المحل .,.<<<<---- بيلطش الأفكار :106:



قدمت هذه الصورة برعاية (( زوحتي )) :x1:



وقدمت هذه الصورة برعاية (( المراهق )) :108: لاحول ولا قوة الا بالله



طلعا ان اليوم هو السبت وأنواع (( الجحلط )) موجودين في كل مكان وهذولا الاثنين منهم .,. يحسبوني اصورهم ولا شافو دبيب على طول طلع الليزر ووجه علي وعلى الكاميرا



الله ياخذك ورطتنا :112:



هذا المقهى اللي ريحنا فيه بالمجمع .,. في الجانب الأيمن وانت طالع على البحيرة .,.,



منظر البرجين أول ما تطلع للبحيرة (( لازم تنام على الأرض إذا تبي تجيب البرجين كاملة .,.



الجلسة على البحيرة جدا جميلة والنافورة كانت مسكرة لانهم شغالين فيها للتجهيز لليوم الوطني



البرجين ورانا وشفت العالم تتبطح وتصور .,. فقلت انام على ظهري واصور

":":":":":":":":":":":":":":":":":":":":":":":":":":

بعدها اتجهنا للفندق وكان فيه بالبهو الداخلي فرقة مكونة من عازفي (( قيتار .,. ساكس فون .,. بيانو )) جلسنا على طاولة قريبة .,. ماكان فيه أحد الا احنا وثلاثة هناااااااك .,. والعازفين شغالين بحماس واذا انتهت الوصلة محد يعطيهم وجه هههههههههه .,. احنا صفقنا لهم من باب ترانا صفقنا .,. التفتو علينا بغو يجون يبوسونا من الفرحة ههههههه .,.



ذاك الفراولة المثلج .,. وهاك الشاهي العجيب ,., ودوووووووووووس




انتهى هذا اليوم الجميل من اول أيام التسوق في كوالا لمبور .,.


نلتقي مع مشاركة قادمة لليوم الثامن في ماليزيا


فهد بن محفوظ