درة من درر الشادي

كلنا او اغلبنا يعرف الدكتور الاديب صالح الشادي الذي كان ضيف شرف في احد حلقات شاعر المليون لمن لا يعرفه


على العموم الدكتور صالح الشادي له صديق وجار دكتور اخر اسمه سلطان العويضة


المهم الدكتور سلطان العويضة آلمت به مُلمة احد الايام وحسبه جارة وصديقه الدكتور صالح الشادي


وكتب هذه القصيدة يشد من أزره فيها


[poem=font="Simplified Arabic,5,darkblue,bold,normal" bkcolor="transparent" bkimage="" border="none,4," type=1 line=0 align=center use=ex num="0,black"]


ولاتهتم ، مادامــــــــــك صنيعة ربك الباري =إذا ربي خلق مخلــــوق ماينسـاه، (يا سلطان)!
(ياسلطان) أنا قبلك تعكـّــــــر نهري الجاري =وضاقت بي مساحات الوجود وضاقت الأركان
شقيت أكثر من اللازم غرقت بلجـــة أفكاري =رحلت ولا جنــيت الا اغتراب ٍ، زادني حرمان
حسبت إني باغيّر دفة الأيـــــــام بإصراري ! =وحسبت إن الزمن لوحة ،وأنا الألوان والفنان !
ونسيت إني بشر، يعني قدر،ما أملك أقــداري =ونسيت إن الليـــــــالي ساجدات بمعبد الرحمن
(ياسلطـان ) : ربك فوق يدري فيك ، ويداري =ولا ينسى ، ولا يقسى ،ولكن.. يصنعك إنسان!
عسى أن تكرهوا شيئا وفيه الخير..من داري؟ =وعساك تحب شي ،وفيه ماتلقى سوى الخسران!
تِذكـّر..وش حصل(لآدم أبوك)،وذنبه العاري! =وتِذكـّـر (نوح) وعقوق القريب،وفزعة الطوفان
وتذكر( يوسف الصديق)،ونجدة محمل ٍساري =وتذكروش حصل(لايوب)،وصبرأذهل الشيطان
وتذكر( يونس) وبحرالظلام ،وحوته الضاري =وتذكر ســـــالفة (موسى) كليـم الله ، والطغيان
وتذكر (صالح )المرسل مع اللي مالهـــم طاري =وتذكرطيب (عيسى)، واليهود، وقسوة الخذلان
على سنة (محمد )،وكـــّـل الله دوم ياجـــاري =(ولن تشقى)،(ولن تبقى )على حالك كذا زعلان
وإذا تنسى ..تِذكـّرني ، تراها تسـّـرك أخباري =طلبت الله .. ولاخيّب رجــاي ، وزادني إيمان
وصارالكون من حولي بفضلـــه يشبه غباري =صغيـر وتــــافه وهيّن ،ولو فكرت به غلطان.
تعدا الهم (يابو قيس ) وخذ شوري ومخباري =وسامح من جفاك ، ولا تهمك عثــرة العميان
مساكين وغلابا ، هالخلايــــق بـايع وشاري =وفيهم بــــايع نفسه ، وفيهم شـــاري الحقران
وفيهم من تعلاّ .. لين طــــــاح وذرّه الذاري =وفيهم من سجن روحه ،بلا سجـن ولا سجان
وفيهم من عرف ربه ، وربي بالخفـــا داري =وفيهم ناس مثلك يشبهون الشمس (ياسلطان ) [/poem]الدكتور صالح الشادي