من درر الشعر

أحفظ دبشك اللي عن الناس مغنيك

اللي ليا بان الخلل فيـك يرفـاك

وأعرف ترى مكة ولاها بناخيـك

لو تطلبه خمسة ملاليم ما أعطاك

والحر مثلك يستحي يصحب الديـك

وإن صاحبه عاعا معاعات الأدياك


بركات الشريف

```````````````````````````````````````````````````````````` ```````````````````````



مقامالفتى في منصب العز ساعة

ولا ألف عام يصحب الذل صاحبه


راشد الخلاوي

```````````````````````````````````````````````````````````` ```````````````````````

من عوّد العين المنـام تعـوّدت

ومن عوّد العين المساري تعاود

ومن عوّد الصبيان زاد بيتـه

عادوه في عسر الليالي الشدايد

ومن عود الصبيان طعنٍ بالقنا

نادوه يوم الضيق يابا العوايد


راشد الخلاوي

```````````````````````````````````````````````````````````` ```````````````````````

ليا عاد ما للرجّال رأيٍ يدله

يأخذ من أشوار الرجال دليل


الشريف جري الجنوبي

```````````````````````````````````````````````````````````` ```````````````````````

فتـى بـلا عـزم حياتـه مذلـة

والعزم لقلـوب الرجـال طبيـب



من لا صبر بالعسر ما ذاق يسرها

وباب الفرج للصابريـن قريـب

محمد الأحمد السديري






```````````````````````````````````````````````````````````` ```````````````````````

الحمّـرة تـدرك معوشـة عيالهـا

وألا الرجل يبغى منه بعض الأحوال


خلف أبو زويد الشمري

```````````````````````````````````````````````````````````` ```````````````````````



منحل دار النـاس حلّـوا ديـاره

لابـد مـا تسكـن ديـاره ويغبـن

ومن شق ستار الناس شقوّا ستـاره

ومن ضحك بالثرمان ضحك بلا سن


شالح بن هدلان

```````````````````````````````````````````````````````````` ```````````````````````

النوم رأس اللوم بان الردى بـه

واللي يبي الطولات نومه شلافيح

الذيب ما يرقـد ورزقـه نهابـه

يدوّر الغرات عنـد المصاليـح

واللي يبا الطولات يتعب ركابـه

والعز بأكوار النضا ياهل الفيـح


مريبد العدواني

```````````````````````````````````````````````````````````` ```````````````````````

من لا يديس الرأي من قبل ما ديس

عليـه داسـوه العيـال القرومـي

ومن لا يقلّط شذرة السيف والكيس

يبدي عليه مـن الليالـي ثلومـي

والقصر ما يصلح على غير تسييس

ومن لا تعلم مـا تفيـد العلومـي


تركي بن حميد المقاطي العتيبي

```````````````````````````````````````````````````````````` ```````````````````````

الناس ما تسقيك لا صرت عطشـان

ولا يشرب المضمي كود من ذراعه

أضرب على الكايد ليا صرت بحلان

وعند الولي وصل الحبل وإنقطاعـه

عيبٍ على اللي يتقي عقب ما بـان

وعيبٍ طمان النفس عقب إرتفاعـه


عبيد العلي الرشيد



```````````````````````````````````````````````````````````` ```````````````````````

حيٍ يورّيك المذلـة وتغليـه

أنا أشهد إنك ميت القلب عامي

من لا يوّدك لا توّده وترجيـه

أرفع مقامك يا عزيز المقامي


محمد الأحمد السديري

```````````````````````````````````````````````````````````` ```````````````````````



لايأمن المظهود جمع المعـزة

ولا يأمن الجمع العزيز الظهايد

أيضا وبيت الفقر لا يأمن الغنى

وبيت الغنى لا يأمن الفقر عايد


راشد الخلاوي

```````````````````````````````````````````````````````````` ```````````````````````

لا تأخذ الدنيا خراصٍ وهقوات

يقطعك من نقل الصميل البرادي

لك شوفةٍ وحده وللناس شوفات

ولا واديٍ سيله يفيض بـوادي


عبدالله بن سبيّل

```````````````````````````````````````````````````````````` ```````````````````````

يا بايعٍ جوخٍ على غيـر أهاليـه

مثل الذي ينزل بقصـرٍ خرابـه

ولد الردي لو طاب لك لا تماشيه

يومين والثالث يبين الـردى بـه


مشعان بن هذال



```````````````````````````````````````````````````````````` ```````````````````````

الأجواد إن قاربتهم مـا تملّهـم

والأنذال إن قاربتها عفت ما بها

الأجواد وإن قالوا حديثٍ وفوبـه

والأنذال منطوق الحكايا كذابهـا

الأجواد صندوقين مسك وعنبـر

ليا فتحت أبوابها جاك مـا بهـا

والأنذال لو غسّلوا ايديهم تنجّست

نجاسة قلوبٍ ما يفيد الدواء بهـا


محمد المهادي



```````````````````````````````````````````````````````````` ```````````````````````

برقٍ مصدٍ لو مزونـه لهـا نـور

لا تستخيله لـو ربيعـك شفاقـه

من لا استشارك لا تعدّي له الشور

ومن لا يوّدك نور عينـك فراقـه


الدقيس الجمّيليّه

```````````````````````````````````````````````````````````` ```````````````````````

شابت لحانـا مـا لحقنـا هوانـا

وعزي لمن شابت لحاهم على ماش


مناحي بن معدل السهلي

أرحب يابو فارس


مجهود تشكر عليه فعلاً من شوارد الحكم



تحياتي لك

أرحب يابو فارس


حي ذي العين



لاعدمنا هذا الحضور المثري



الله يحفظك

اررررررررررررحب يابوفارس



ياسلاااااااااام عليك وعلى اختيار الراقي



لك تقديري

ابووووووووو
فارس
كما يقال اختيار الفتى قطعة من عقله
صح لسانك وصح قلبك اختبا ر مووووووووفق
تقبل تقديري

[align=center]ارحب يابوفارس

الله لايهينك

ابيات من ذهب

تقبل تحياتي[/align]

لاهنت يابو فارس وبيض الله وجهك

كلمات ليست كالكلمات لله درك

ورحمهم الله ... عندي استفسار

الابيات هذي كان يدور في ذهني انها لشليويح العطاوي ولاادري ماهو رأيك

النوم رأس اللوم بان الردى بـه

واللي يبي الطولات نومه شلافيح

الذيب ما يرقـد ورزقـه نهابـه

يدوّر الغرات عنـد المصاليـح

واللي يبا الطولات يتعب ركابـه

والعز بأكوار النضا ياهل الفيـح


وتقبل تحياتي

.

:

شايع العيافي .. .
درر غالية // كل الشكر لجهودك الواضحة .. .


.