Tweet
الشاعر الكبير حامد بن على الحبابي 0
ارسل الابيات التاليه الى حمد بن محسن التعيمي عندما نشرت له أبيات فيها بعض الاخطاء , ورغم العلاقه
التي تربط الشاعرين الكبيرين فأن العتب لايفسد حميميه العلاقه التاريخيه الاخويه الطويله 0
قولوا لبومحسن في الابيات غلطات
الها تغيب وين حرف ماشوفه
ماهو حق ياعشير الخوندات
وانت الاديب اللي يرتب حروفه
النقص مايصلح على الشعر بالذات
لي قطع راسه من علابي كتوفه
وان قطع راسه مات وان مات مافات
تبقى تعاليق الخلايق تحوفه
والناس وان شافوا على الرجل زلات
معاد يبقى في قصيده طروفه
واللي يطرشلي بيوت وعبارات
مارتب القيفان مكرم ضيوفه
والحر يالضرغام يفهم الاشارات
وان شاف عنوان الخطا مايطوفه
وانا على ماقيل ماني بشمات
ادري رفيقي واتفقد ظروفه
وان زل مازليت وان جاب دانات
يتعب عليها من تعابير جوفه
وانا على الدانات عندي مغاصات
الغوص فيها والبحور معروفه
مابين ساحلنا وساحل الامارات
يوم الطواشه والتعب والنكوفه
والبوم والنهام والغيص ينشات
والسيب من حبله تقطع كفوفه
والنوخذا يسري على النجم مابات
يرفع شرلعه والهبايب تلوفه
واليوم سواها جسور وعمارت
خير عسى اله مايغير وصوفه
في نعمة كبرى والايام عدلات
وقلوب قادتنا علينا عطوفه
من عقب وقت مرنا والصعوبات
وايام فاتت ماعليها حسوفه
والشعر له ميزان وعقول واصوات
تدجر على فنه وعرضة سيوفه
والشعر الاول له فحول وزعامات
ناس قمرهم ماتواجد كسوفه
عنوانهم يبنى رموز ومقامات
وافكارهم تاخذ عليها بروفه
متفردين(ن) بالبيوت المهمات
رمز القصيد الفذ واجمل صنوفه
واليوم صار الشعر تلقيط وحتات
قلت سميناته وزادت ضعوفه
ينشر على صفحات بيض المجلات
شعر يسمونه قصيد العلوفه
والا على شاشات بعض المحطات
من شان عشاق القصايد تشوفه
اللي تبث أسفافها من عرب سات
الله يوطيها مصايب حذوفه
ياهل البيوت الطيبه والمروات
مافات من ذيك القصايد ذلوف
بالله عيدولي بيوتي سليمات
ان كان مايوجد عليكم كلوفه
تعليق