ردّية عقاب السمي وسهم الدهيمي

[align=center]أراد الشاعر/ سهم بن حمد الدهيمي البقمي أن يعتذر من فيحان السمي
فأسند هذه القصيده للشاعر / عقاب بن عبدالله السمي البقمي
طالبا منه الوساطه في الموضوع فجاءت هذه الرديه:

سهم يقول:

[poet font="Simplified Arabic,5,black,bold,normal" bkcolor="transparent" bkimage="" border="solid,4,black" type=2 line=200% align=center use=ex length=0 char="" num="0,black" filter=""]
ياعقاب يامشكاي فيحان زعلان=حقه مصيب ولايبيله محامي
علي حقه ثابتٍ مثل رضوان=بيّن لمن حوله جنوبٍ وشامي
انزع وعطه الحق وافي ومليان=القاضي انته والدلايل ابهامي
هذا اعترافي سيّد لكل برهان=يجلى الحقيقه مثل فجر الظلامي
يوم اجتماع الربع عندي مسيّان=نسيت ماناديت مروي الحسامي
سجّ الذهن ماهوب يالقرم حقران=عندي حشيم ومن ربوعٍ حشامي
لاشك فوت الحرص مافيه عقلان=لو أصبح الرجال حرصٍ ولامي
استسمحه ياعقاب عن كل ماكان=سمحان باله هوّ غاية مرامي
ياعقاب راع الطيب يجزى بالاحسان=واللاش ماله يالبليهي ملامي
لو كثّر الحجات بالسر واعلان=صرير جندب مايصحّي النيامي
جعله فدا اللي للمشاكيل مزبان=شهمٍ على قاصي ربوعه يحامي
ويفرح بتال الليل لا جوه ضيفان=ويكثّر الترحيب والاهتمامي
دايم وخاطر مفرح الضيف فرحان=ألا ليا ابطا مالفوله كرامي
يبات هاك الليل مكظم وغضبان=ماكن حوله من ينبّ الاسامي
هذا الذي ياعقاب يرجع له الشان=يستاهل التقدير دايم دوامي
والخاتمه ياعقاب ياطير حوران=أزكى تحياتي وكل احترامي
نعْمٍ بكل الربع شيبٍ وشبّان=ما غرّد القمري بغصن البشامي
وصلاة ربي عدّ من طاف الاركان=على الرسول أختم نهاية كلامي
[/poet]

فردّ عقاب:

[poet font="Simplified Arabic,5,black,bold,normal" bkcolor="transparent" bkimage="" border="solid,4,black" type=2 line=200% align=center use=ex length=0 char="" num="0,black" filter=""]
يابو فهد فيحان سامَح على شان=خاطرك ياهيف الخروف التمامي
جيته وعلّمته وعوّدت قنعان=ويقول سامحته وبلّغ سلامي
لو المراد الزاد ماهوب قرمان=ولاهوب جيعانٍ ولاهوب ضامي
الخير واجد عنده البيت مليان=تمر وسمن ولا مضيرٍ هشامي
وثلاجته فيها قعود ولحم ضان=ومما تيسّر في الدجاج القطامي
وفواكهٍ مابين مشمش ورمان=بانواعها ومكونات اليدامي
ماغير يوم انه على الربع شفقان=حبٍ لجا بين اللحم والعظامي
ومتوقعٍ يعزم على الحفل شيبان=آلاد داهم همّ وآلاد سامي
والا بقومٍ عندنا شانهم شان=إلهم وزن وإلهم وقار ومقامي
وسوالفٍ تجلا عن الكبد الاحزان=خصٍ ليا ناشوا فعولٍ قدامي
تذكروا ماقف محمد وقطنان=ودبوس واصحابه ومرمي ورامي
حنا البقوم مطوعة كل فسقان=نثنيه لين انه يصير انهزامي
يرجع معيفٍ منكفٍ عقب مابان=ان سلم ولا ان مات جعله هدامي
هل بندقٍ ميقاعها بين الاعيان=في الشيخ ولا في حتينه شمامي
مركاضنا يشبع به الذيب سرحان=فوق المهار ومقرعات المسامي
بمحشّراتٍ تودع العظم قطعان=وألا عروق القلب تومي توامي
تلقى صناديد الرياجيل نطلان=شئٍ صويب وشي ميت قوامي
صار الشريده يطلب المنع شفقان=قام ايتدرق في القطف والثمامي
واللي فتن طايش وطامع وطربان=أومت بثوبه موميات العسامي
خلوه ربعي طايحٍ فاسفل اقطان=أمسى عليه من الكواسر حيامي
أمه تعطّ الصوت وتجر الالحان=وحليلته تفتل عليه البهامي
وتغطملت عقب الزها والتزيّان=واخفت ملامح زينها والزمامي
كم مرةٍ جينابها حمّ الامتان=ماتنحسب مثل الجراد التهامي
شئٍ حيافه والقمر مابعد بان=وشئٍ على وضح النقا في المظامي
وقلايعٍ يعرضبها في رمادان=بوسوم اهلها لين جانا الكمامي
وان كان هبّت ضدنا بعض الاحيان=نصبر على جور الزمن والغمامي
واليا اعترض فرصه وشفنا القضا حان=نعطي المعادي درس قاسي وحامي
ننصر لك الله ذبحة افلان وافلان=يبا الثواري ماجديدٍ وعامي
هذي فعايلنا عل مرّ الازمان= ولا افتيك فيها هي حلال او حرامي
والله لو ينطق جبل حظن وظعان=وريحان والطارف وهاك المحامي
انك لتسمع كل حجه وثبتان=على مواقفنا نهار الزحامي
أنا ليا أطريت الرفاقه بمدحان=أطوّل الابيات مدري علامي
لولا القوافي قلت خمسين ديوان=دام القلم في الكف والبوك أمامي
واخصامنا ماهم بضعفه وشردان=أبطال بس المشكله في الخصامي
ظليمة الاجواد جورٍ وبهتان=موتٍ حمر يثنون دون الجهامي
وديارنا في موقعٍ بين عدوان=لولا شجاعتنا غدينا عدامي
كلٍ يبينا بس مزري وعجزان=بغبونهم لين استتب النظامي
الله يبيّض وجه من حطّ سيسان=وثبّت قواعدها على مايرامي
عبدالعزيز اللي حكمها بشامان=حقه من المجد التليد السنامي
خلاني أمشي مامعي مطرق الزان=ولافيه حتى الثايره في حزامي
أنعام ماصارت على كل الاوطان=يشكر عليها واحدٍ ماينامي
قبايلٍ صارت بني عم واخوان=ذولا خوالٍ لي وذولا عمامي
خلا الثعل والذيب والشاه جيران=تسرح صبح وتعود بعد الدوامي
حتى ايش لو معها مخالب ونيبان=ماعاد تتعب في حصول الطعامي
والله ماينكر فضايل كحيلان=الا جحود وعزك الله إخمامي
صارت صحاري نجد نهضه وعمران=اللي منوّل مرتعٍ للنعامي
ومساجدٍ يرفع بها صوت الايمان=صلّ وتصدّق والصيام الصيامي
هذا ردودي ياسهم قدر الامكان=على بيوتك يالرفيق الهمامي
ان شفت غلطه عِدّها زلة لسان=يابن حمد لاتغتنمها اغتنامي
من فيه ضغط وفيه سكّر وتعبان=ماينتواخذ يالشجاع العصامي
وصلاة ربي عدّ ماهلّ هتّان=على رسول الله شفيع الانامي
[/poet]


ومن غير قصورٍ في الجميع

وسلامتكم[/align]

ابو عقاب



الله لايهينك


طيب ولا تجيب اللا طيب


وصح لسان الشايب وسلم لي على خشمه بالنيابه



وصح لسان ابو حمد


شعراء كبار وقصائد لها وزنها وقيمتها

لاهنت ياعبدالله يايو عقاب,,,,,,,,

وصح الله لسان الشايب والشاعر سهم,,,,,,

تقبل مني أصدق وأعذب تحيه,,,,

أخوك:سعد آل كاظم المري,,,,

لاهنت يابو عقاب

وعقاب وسهم شعراء وقصايدهم من عيون الشعر

لاهنت يابو عايض


وما عليك زود


وسلامك وصل

لاهنت يابو علي


وما عليك زود


والله لايهينك على المرور

الله لايهينك يابو مشاري

وما عليك زود


ومشكور على المرور