ديوانيه النداوي

هلا وغلا بالجميع ..

خصوصا الاخ سعيد الحمالي....

من اكثر الناس اللي متحمسين للديوانيه ... وله اكثر من 10 مواضيع ...

لاكن للاسف من غير ردود ...

عزاي انها تقراء من قبل الزوار ...
لاكن انا ودي انوه على حاجه ....

اعتقد ان الديوانه اكثر المنتديات اهميه ...لنها يتم فيها التقارب والتعارف بين الاعضاء ... ومن الغلط انها تهجر بالشكل هذا ... علما بأنها كانت من اروع المنتديات من ناحيه المواضيع والطرح والشي الاكثر اهميه ان البساط كان احمدي ......

بس ما ادري وش صار ؟؟؟؟؟؟

هنا وفي هذا المنتدى ...
لازم يتم تنشيطه ...... لازم تتغير المواضيع .... لازم تطرح المشاكل الخاصه بالاعضاء ويتم نقاشها ...

لازم تكون الدعوه مفتوحه والكل يقول اللي يبي ... طبعا من غير اجتياز الخطوط الحمرا ..
..

اذكر ان المواضيع الدارجه في هذا المنتدى كانت فكاهيه .. كان الضحك والمزح يميز هذا المنتدى عن غيره ..
يعني ارتاح كل ماجيت هنا واقرا المواضيع بين الاعضاء وكانت شيقه وممتازه ....

على ايه حال ما ابي اطول عليكم ...

ارجوا من الاخ سهيل ..... ان يحاول يغير نشاط المنتدى ويستقطب الاعضاء ومواضيعهم الحلوه ....

ترا يا جماعه شبعنا من الاشعار ...

نبي نقااااااااااش....

تحسون اني راعي مشاكل ؟

بالعكس ...
لاكن البرود بدى يجمد اعصاب ديوانيه النداوي ..





تحياتي للجميع ...

عايض راشد

أخي عايض,
صبحك الله بالخير....


من قال إنك راعي مشاكل؟؟


أفا عليك بس


ياأخي إنت أبو المشاكل وأكبر ...... في الحاره



لكن بصراحه موضوعك قوي ويضرب في الصميم ... وبعدين عد مواضيعي زين ترى لي أكثر من عشرين موضوع في الصفحه الأولى ونوعت فيها من جميع المواضيع لكن ماحولك أحد . الربع مسنترين في الشعبي ولا يفيد فيهم حتى لو نسحبهم بونش



أشكرك على لقافتك الجميله وعسى الربع يلقون في هالموضوع مادة دسمه تجذبهم للديوانيه ....




أخوك,

ارررررحب يابو راشد

لا بالله منت براعي مشاكل ....ووجهك ابيض يالقرم ......


وكلامك %100

وتمنى ان يقوم سوقه

ولا بد التنوع وطرح كثير من المواضيع .وليس لنقاش فقط ...

التنوع زين يالربع ........

واتمنى البدء ..من احد الاخوه المشرفين وتشجيع الجميع الاعضاء ...على الطرح ..في اي موضوع .......

سوا اجتماعي ......او موقف ...طريف ...او من هالمواقف الزينه الخفيفه ....الخاليه من

الدسم .........


تحياتي

اخوكم

نايف بن عيفان

هلا وغلا يابو ناصر .........
وان عدت سموني اكبر خبل بالحاره


اخوي الغالي ....... سعدت بردك ...... ولو انك هجومي هاليومين مدري وش فيك .....

الظاهر من عقب ماوقفت الفرس في نص السباق وقمت تعطيها بقوس وانت مستلج الله يستر ....... طيب كان تكلمت معاها بالمنطق يمكن تفوز من غير لشط وضرب بقوس ........ متوثم في البهيمه الله يغفر لك ...

المهم

هذا المنتدى من اجمل المنتديات لو لقى تفعيل .... ومو شرط نبدى كلنا بالمواضيع ..... لان الاعضاء منشغلين بالشعبي مرررررررررررره ...... يعني ما فيه امل تقنعهم بالديوانيه الا اذا لقوا شي فعلا يجذبهم ويفعل نشاطهم هنا ........

بس فيه ناس يخافون ......... وانا اعتقد انك واحد منهم .......

يخاف لا يبدى بموضوع وبعدين ينقلب عليه .. بمعنى انه ينفهم غلط او يطيح من عين الناس .......

طبعا الكلام هذا لناقص العقل اللي مهوب عندنا ان شالله ....


تحياتي لك يابو ناصر ....... والله لا يهينك على مرورك وشرطتك الكريمه

اخوك :
عايض راشد



















اوه نسيت اسئلك

افرض انك يوم عطيت الفرس بقس انها جاوبتك بواحط من حوافرها على خشتك ؟؟؟ وش بيكون موقفك قدام الناس ..

لاعاد تعودها ..

ارحب يابن عيفان ........

هلا وغلا طال عمرك ........ وشرفني تواجدك وتفاعلك مع الموضوع اللي اعتبره انا من اهم المواضيع الجيده للنقاش ...
على شان تعم الفايده للكل ....... ونطلع بنتيجه ....

انت قلت كلمه مهمه وهي اثاره النقاش ......

وهذا هو المطلوب ........

انا بيني وبينك جربت النقاش في المنتدى الادبي وتوهقت ........... طحت لي في عالم مدري وشهم قايلين ...

تدري ليش ؟؟؟

لاني اتكلم معهم بصدق ... وكلامي مافيه خلل ..... لاكن سبحان الله مدري وش لون يفهمون ...

اعطيك مثال .
قوله هذا كم1
يقولك هذا 2\1+4\1+4\1

طيب ليش العباله كلهاااااااااااا

بس انا عرفت طال عمرك وش السبب ....... الناس هناك على اعصابها ...
عكس المنتدى هذا تماما ....

لان المفروض اي عضو يكتب بالديوانيه يكون مروق على الاخر ........

وياخذ الامور بسعه صدر .......

وصدقني الفايده كبيره .......






لاهنت يا بن عيفان وعسى شيبانك بالجنه ...


اخوك:
عايض راشد

<<==== الاخ محضررر على حس الهوشات 00 والبقووس 00 عسى ماشر 00 عسى ماتعوور احد


تراني من اول مانزلتوا الموضوع وانا احووس ابا ارد بس ماتجمل الجهاز

واظطريت اتسللف جهاز الورع اصلحه الله <-- هذا اللي له علينا ندعي له ونصرف عليه غيره مافيه والنت والعمل مخليني وقت الله لايبلانا 00 عسى الله يعفي بس


وفيما جلست اسس اتصال 00 واثر المنتدى الشعبي فيه كم رد لازم اردهن 000 تقريبا كانت الردود اللي الواجب اردها يمكن خمسه 000 والله وكيلك ماطلعت الا ماحط لي بثلاثين رد ووالله اني صادق يمكن ينقصن 2 او 3 المهم خلصت وجيت كفخان للموضوع 00 واثركم قد عزلتوا اعتقد


المهم اللي ودي اقووله اني مؤيد الفكره 00 بس هي وش هي 00لوووول <<--- يؤيد وبس

وتبون الصحيح والله انا واحد ماعندي معرفه كافيه بنشاط المنتدى 000 شفت في البدايه الغاز ومحطت بلغز والى الان والشباب يصرفوني فيه يقولون ابا اروح اجيب الحل واجي 00 وهذيك معدلاته
وبعدين اخووي سعيد الحمالي 00 ماقصر شايل الحمل كله 00 وفعلا ماللحمول الا جملها


وفعلا الواحد محتاج مواضيع تقربه وتقرب افكاره من الزملا هنا 00 لانه بيني وبينكم المنتدى الشعبي
رسمي اكثر من اللازم 0000 ومسالة ان الشخص يقعد بالوضع الرسمي وقته كله اعتقد انه ممل 000 انا واحد اظطر اني اغيير الجوو في مواقع اخرى وانا مكره ماودي يفوتني شي هنا

<<----- اللي يشووفه يقول انه يضرب المشوار على سياره ماهوب ضغطت زر خخخخخ

بس ولو اذا صد الواحد شوي انشغل ونسى


وعلى ذلك اوقع

<<----- يفكر انه تعهد

لكم تحياتي

الاخ العزيز عايض راشد .. شكراً لك علي هذا الموضوع والذي يدل علي حرصك علي منتدي النداوي وخصوصاً منتدي الديوانية الذي اعتبره مظلوماً بين هذه المنتديات ... ابشر باللي يسعدك يا ابو راشد وصدقني اننا قدمنا وطالبنا بتفعيل دور هذا المنتدي بشتي الطرق وأن شاء الله في القريب العاجل سترى مايسرك ويسر الاخوه النداوية .. وشكراً للاخ سعيد علي مجهوده الواضح في اثراء جميع المنتديات والشكر موصول للاخوه الذين يتواجدون في منتدي الدوانية بمواضيعهم الجميلة .. نتمني ان تمهلنا يا ابو راشد حتي نتجاوز بعض الظروف التي شغلتنا عن التواجد المستمر وتبشر بالخير

لك كل التقدير والاحترام

هلا وغلا يا عكاشه ........

اجل راح عليك الموضوع ........... يبن الحلال حنا تونا في بدايته ...

وعلى العموم انت ماقصرت واللي ابيه انا من كل الاعضاء انهم يزورون هالمنتدى ...

يعني والله كسر خاطري الحمالي وهو يجر الصوت من جرح براااااااااااااااني >>> خاشه عرض


عكاشه يا عكاشه يا عكاشه

تدري وش اللي ابيه انا ؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!

ابي الدعوه هنا تصير بساط احمدي ... يعني فل حجاجك ...

بس ما اطلب غير كذا ...


وانا متأكد ان كل الاعضاء يبون الحاجه هذي .... بس تعرف الرسميات وماشابهها .. مع العلم اني ما ادري وشهو ماشاببها بس جات معي كذا ...



تحياتي لك يا الغالي ........ وشكرا على مداخلتك ...


اخوك:
عايض راشد

ارحب يا سهيل .......

هلا وغلا يابو براك ........ ياخوي ميت منتداك ... وجيت احييه من غير قصور فيك
بس الظاهر انك مشغول ياولد

على ايه حال المنتدى منتداك وانت كفو يابو براك .......


وانا انتظر الجديد منك ياغالي ..........



تحياتي لك

اخوك:
عايض راشد

هلا ياعايض ابن راشد

عندي سوال محيرني ؟؟


انت قاط مع سعد براك في منتداه؟؟


عايض ترى تبي تبلشوون في هذا<<---


<<----- اقلاعي

يعني انواع المصاله

هلا عكاشه ......

انت من جدك ؟؟؟؟؟؟؟؟؟؟ مافيه امل ابو براك يخلي احد يشاركه

ياعمي هذا منيونير >>>اخت مليونير

انت ماتدري وش العلم ....

ابو ثامر طال عمرك معشمني بجائزه اذا خليت المنتدى هذا يدّهر ..

لذلك انا بسوي له دعايه وبروشورات ( لو تسئلني وش معناها اقولك مدري) وبعزم النداويه في البيت وبخليهم ينهبلون .... وكل اللي بيقولونه بسجله وبحطه هنا .....

اووووووووووووووف شغل جامد يا ولد ... يبيلي اثنين من الشباب يساعدوني ماشالله عليهم اربع ساعه وعشرين (التبديل على قرش) وهم في الشعبي ....

ولهم ربع الجايزه وبيتقاسمونها ....... هم جعلهم يحيون مايقصرون بس انا ما ابي استغلهم تعرف المبادئ والقيم والسمك<<< لاتشره




تحياتي يا ابو عكشه ....


عايض راشد

<<<==== سمع جوايز وخق

<<====== جاب فروته وهذي جلسه مادام فيه جوايز

<<====== بيتاكد بس فيه جوايز والا ؟ ووش هن الجوايز؟ بعدها بيثني ركبه للمنتدى هذا بيخلي الواحد يحط موضوعه هنا يجي بعد ساعتين يلقاه في الصفحه الثالثه هذا اذا ماسطحته للمنتدى اللي جنبنا


اخوووي عايض

<==== انواع التلزق

خلاص صار صديقي هذا>>>>>>>

<<=== ماعاد هوب فاك عايض الا بكفيل

تصدق ياصديقي عايض اني معك على الخط لين وصلت هالجمله في رسالتك الاخيره اللي تقوول فيها
7
7
7
7يبيلي اثنين من الشباب يساعدوني ماشالله عليهم ..... بعدها صفقني اذا انا فهمت شي 000 وصفقني اذا انت بعد فهمت 000 شكلك كاتبها وانت راقد على الكي بوورد

ماكننا قلبناه تشااات ؟؟

انا خايف ابو ثامر معطيك جائزه علشان تطلع من اللي بيطيروون بالعجه معك وبعدين يطردهم


صديقي عايض تراني ماصدقت على الله اسجل هنا 00 لاتحطم مستقبلي <<==ابووه هالمستقبل بيل قيتس
لووووووووووول

اهلا يا اخ عكاشه <<<قلب رسمي قليل خاتمه

بما انك صرت صديقي اجل اسمع <<<المفروض اقرا

تبي الجد وانا اخوك
ترا ابو ثامر مهوب معطيني جايزه ولاشي ... بس قالي انه بيرد على موضوع من مواضيعي وبيعتبرها جايزه ... يا حبي لك يابو ثامر >>>خايف من الطرده


ترا الطرده مهي ببعيده يا عكاشه............ وانا الحمد لله لاجات الطرده عندي واسطه لبو ثامر اللي هو سعيد الحمالي...... ياخي سبحان الله هالادمي مايرضى انها توخسني ( شرايك في الكلمه) .. شوكه

عاد دور انت واسطه ذاك الوقت ........... ياالللللللللللللللللللللله

تخيل انك تنطرد من المنتدى ........
تصدق بموت حسره لاني اعتبر النداوي العنصر الرابع بعد الهواء والماء والمكبوس

ما اتصور نفسي برى المنتدى لانه بدى يشغل تفكيري وعقلي .... احبه ياخي >> شفيني مثلا؟

بس ماعليك يا عكاشه لازم تناضل معي >>>تناضل غير تنضل لان تناضل معناها انك تصير شديد
تنضل هي ان تعطي احد الاعضاء عيناً فيتوهق ويقول بعدها شعر اهل سرلنكا

وش كنت ابي اقول اصلا ؟؟ ايه

لايهزك ريح خلك شديد مثلي وقول اللي في قلبك كله .... واقلب الموضوع شات ولا يهمك << مايبي يوهقك


وانا معاك الى اخر رمق ...>>>>اتحدى احد يطردني بعد كلمه رمق


تحياتي لك

عايض

عكاشه... بثني ركبي.... و اقابل المنتدى..

شدعوه كيرم...



و انت بو راشد.. استح على طولك.. عفوا اقصد استح على قصرك.. مأذينا.. و مسوي زحمه بسوق الخلاقين..


عندك قصيده و لا فكنا من شرك..




وبعدين لا تنسى ان حاكم المعلا صار بالنداوي.. الحين..




و تعرف شسوى بالفقيره.. ذيك السنه بالمرابع..


انتبه..

وصل ولد الدبل يا شباب .......... افسحو الطرييييييييييييييييييييييييييييييييق .. لانكم بتسمعون بواري هوا زي حقت الكناور اللي في الظهران انشدو ابو ثامر عنها

طاااااااااااااااااااااااااااااااااااااط

وانا اللي كنت مرشحك لتسليم الجوايز يابو خالد بس الظاهر ان ماوراك فايده.....

وبعدين تراك ذبحتنا بقصايدك ............ ولا وحده فيهم حلوه >>>حاقد




لاتقول الا خير ............... وانا بيني وبينك اعتزلت القصيد واتجهت الى القصه القصيره >>امسح السبوره ياولد





وبتشوف ابداعي فيها ابتدائا من اليوم وعلى قوله المثل:

وبسم الله نبدئ افتتاح امجاد هذا الجيل