متعب الدلال: دغيم الظلماوي

كان دغيم الظلماوي الشمري رحمه الله من أحرص الناس على عمل القهوة والإعتناء بها حتى أصبح مضربا للمثل في ذلك (عسى ما قهوتك قهوة دغيم الظلماوي) وهو إلى جانب ذلك كريم حد السخى شاعر وفارس. وقد كان معاصرا للأمير محمد العبدالله الرشيد رحمه الله وقصة اختبار الأمير لصدق دغيم في قصيدته التالية معروفة حيث كان غاضبا عليه في البدايه.
قال دغيم الظلماوي:

ياكليب شب النار ياكليب شبه **** عليك شبه والحطب لك يجابي
أنا علي ياكليب هيله وحبـه **** وعليك تقليط الدلال العذابي
الوالمه ياكليب عجل بصبـه **** والرزق عنداللي ينشي السحابي
إدغث لها ياكليب من جزل خبه **** وشبه ليا منه هبا كل هابي
أبي ليا شبيتها ثم قبه **** يجلب سناه اللي بعيد غيابي
شرقية ياكليب صلف مهبه **** ليا هب نسناسه تقل سم دابي
متكتفين وناطحين مهبه **** متلطمين وسوقهم بالعقابي
صبه لقرم صرفته ما حسب به**** يوم البخيل مكنهب الوجه هابي
وصبه لمنعور من جاه نبه **** يرخص بعمره والدخن له ضبابي
وعده عن اللي مايداري المسبه**** اللي يدور بالقصير الغيابي
لياباطن الهلباج خطو الجلبه**** يازين تالي الليل خبط الركابي
افرح لهم وابدي سلام المحبه ****ليا شح بالهين كبير العلابي
سلام احلى من شخاليل جبه **** واحلى من السمن الجديد الرعابي
وخطو الولد يوم الملاقا نكبه **** يصير معنا من حساب الزهابي
وش عاد لو يلبس زبون وجبه **** معيرة على غضير الشبابي
أنا لقيت الصبر يازين غبه **** يرقيك روس مشمرخات الهضابي
ومن لا صبر ياكليب في حكم ربه **** هذاك يوم البعث ماله ثوابي


والمعذره عن سوء التنسيق،،،وسلامتكــم

الله يعطيك العافيه والله من جمال هذي القصيده اني اسمع الشيبان يتغنون بها

وللمعلوميه جمبي جار ساكن ولازال صوت نجره يطيب اسماع هل الحي وكل ما زرته سمعني هذي القصيده


الله لا يهينك




اخوك/عبدالله