استفتاء

مرحبا بالجميع ...

الشعر العذب يبقى مهما طال الزمن .... فأشعار المتنبي مثلا لم يكتب مثلها قبلها ولا بعدها ( من وجهت نظري )

وتطور الشعر على مر العصور الى ان وصل الى هذه اللحظه ..

اختلف شعراء العقد السابق عن شعراء اليوم ... وهذا طبيعي ... ولاكن .
استفتائي يتعلق بالمتابعه .. فانا اتكلم عن نفسي الان ... الحقيقه لا تشدني اشعار العقد السابق ولا اجد لها مايحركني او ما يدفعني لمتابعتها ...

هؤلاء الشعراء في حقبتهم الزمنيه او في منتصف عمرهم الشعري كانو ملوك الشعر ... ربما لو عشت معهم في ذلك الزمان لأختلف رأيي عن رأيي الان ...

انا لا احجم امكانياتهم او فيضهم ولاكن لم يبقى لديهم الان مايجعلهم وجهه للمتابعين...
خلافا عن ذلك ..

شعراء هذا الجيل ... واعني الشعراء الجدد المعاصرين ... احدثوا ثوره في الشعر ... فتجد افكارا غير مسبوقه وبكثره واتقان ...
ومن وجهت نظري ان شعراء الجيل المعاصر تفوقوا على شعراء الجيل السابق ...

وكثره الشيء تدل على جودته ... وهذا مانعيشه الان من ازدهار للشعر .. وكلما كثر الشعراء كبرت المنافسه وتسابقت الاقلام للأبداع ...




استفتائي للمتابعين .... وارجوا طرح ارائكم ...
من منكم يتابع شعر الجيل السابق ومن منكم يتابع شعر الجيل المعاصر ومن هو الافضل




تحياتي للجميع

عايض بن راشد

ياهلا وياغلا

وضح لو سمحت ( فصيح او شعبي )

فيه فرق بينهم ؟

موضوع حلو كثير .

على فكرة مازلت انتظر ؟

ماتداوي جروحي صورتك والهدايا ؟؟

فاكر ؟؟؟

الاخ الغالي عايض راشد

الموضوع جدا حساس ولاكن لامانع من طرحه للنقاش

من وجهت نظري الخاصه ارى ان الشعر حضاره والحضاره لاتبنى الا على حضاره قبلها اي ان شعرنا الحاضر هو مبني على شعر الذين قبلنا مع بعض المتغيرات الحضاريه مثلا:

الشعراء القدامى يرسلون سفينة الصحراء في شعرهم(حمراء من الهجن طفاح جوانبها)

شعراء الحاضر يرسلون وسائل المواصلات المختلفه في شعرهم(طائره -جمس -فكس ار000000)

وهي ضروره لمتغيرات العصر فلو قال احد الشعراء( راكب حمراء) في الوقت الحاضر لفهمه قله وربما قالو بطيئه جدا!!!!

دمتم بخير

محمد لطيف

[عندل]

مسا الخير اخى عايض

موضوع جميل 0



تقول انك لا تتابع الشعر الماضى ولا تفهمة ؟

اجل انت عندك مشكلة
اخى عايض اشعار السابقين لا زالت تنبض بالحياة الى يومنا هذا
وابتعاد البعض عن قراءة اشعارهم لايعنى ان الجميع قد ابتعد فلازال اصحاب الذائقة الاصيلة
متواجدين وبكثرة بيننا
ونلاحظ ان هناك بعض القصائد لقمم شعرية لا زلنا نرددها الى الان وبها من اللغة الفاتنة الجزلة الواضحة ا
اللتىستبقى خالدة على مر العصور والسنين 0
وانا من الناس الذين اجد في (بعض )قصائد الاخوة المحدثين صعوبة في الوصول الى ماذا يريدون في قصائدهم
فتجدهم يستخدمون الااف الصور والخيال والتعابير وفي النهاية تخرج من القصيدة دون ان يبقى معك شء في الذاكرة!!! فقط كلمات غير مفهومة وتراكيب غريبة 0ويمكن لو استعرض لك بعض الابيات لشعراء هذا الجيل
ليشيب راسك مافهمت وش المقصد اللى يبونه 0

ثم ان بعض شعراء هذا الجيل لم يحدثوا ثورة في الشعر حسب قولك ابدا
بل كانوا سببا في انتكاسة الشعر واحدثووا به تراجعا فكريا وذوقيا 0 الا البعض طبعا ولا اريد التعميم0
وكثرة الشيء لا تعنى جودته بل تعنى ردائته من وجهة نظري

فقصيدة ابن عـــــــــون التى يقول منها --


يا مل قلب يسج وفيه دولاجة
----من هاجس بالضماير قام يدرجها
في معزل عن جميع الخلق وازعاجة
--------- ماسمع من الناس لو تكثر لجالجها
بالصدر ضيقة ونوم العين هملاجة
-------عيني من العام والسهر متولجها


قصيدة كهذة في كل مرة نعود لها نجدها اصبحت ابهى واجمل ترى مالسبب من وجهة نظرك وما الذى جعلها
تبقى في ذاكرتنا كل هذه السنين ؟
اريد تعليل منك ان امكن !!!
فشعراء الجيل السابق هم المرتكز الذى نثق به ونثق بديمومته 0

ولفت نظرى قولك كذلك :

(... فتجد افكارا غير مسبوقه وبكثره واتقان )
لايوجد فكرة من شعراء الجيل الحاضر الا وقد تطرق لها شعراء الماضى
سواء شعراء الفصيح او شعراء الشعر الشعبي
ولكن يختلف التعبير باختلاف الزمن والمفردات وتطورها 0 وكذلك اختلاف البيئة وعواملها0


ولى عودة ان لزم الامر

هلا أبوراشد...

اولا...شاكر لك طرح الموضوع

وقبل ان ادلي بدلوي أرى ان هناك فهم خاطيء من الاخوة لما ذهب الاخ عايض اليه

فهو حدد الفتره الزمنيه (بالعقد السابق) أي التسعينات واواخر الثمانينات الميلاديه..ولم يقل القرن السابق.

وانا مع الاخ عايض بأن الشعر في تلك الفتره فقد كثيرا من ملامحه الا (ما ندر)....

تلك الفتره...طغت موجه كاد الشعر ان يفقد ملامحه ان لم يكن فقدها وعاد بعنفوانه في هذه الفتره وبالتحديد من وجهة نظري اواخر التسعينيات وحتى الان...وبقدر ازدهاره الا ان هناك الكثير من الغث...لوجود انتاج وفيروهذا شيء طبيعي فغزارةالانتاج حتى وان كان جيدا سينتج بالطبع نصوص دون المستوى.وستكون بعين الناقد والمتابع كثيره.

حبنا للماضي...ليس من المفروض أن يلغي كل ماهو جميل في وقتنا الحاضر

أنا اتفق مع الاخوه بان هناك نصوص وقصائد نادره لشعراء كبار...مازالت عالقه بالذاكره لتميزها..بل أنني من محبي اشعار تلك الفتره

والاخ عايض اعتقد انه حدد ماقصده بالعقد السابق..الى هنا وانا اوافقه وان كان غير ذلك فأنا اختلف معه

الاخت عندل :
الابيات السابقه ليست لابن لعبون هذا ما انا متأكد منه ...اما غير المؤكد فهي لعبدالله بن عون

تقبلوا تحياتي جميعا

حسن العرجاني

اعتقد انه تم طرق موضوع مشابه من قبل لكن ..

مابقي من شعر الشعراء الاقدمين وما وصل الينا هو اجوده (اكثره جودة) اما رديئه فقد سحب عليه الزمن اذياله واعفاه .. فلم يصل الينا .. لذلك فمن الظلم مقارنة ما وصل الينا من شعر الاقدمين بكثير من الشعر المعاصر ..

نقطة اخرى

الشعر القديم فيه ميزة التعتيق اي ان الزمن قد عتقه كما يعتق مرور الوقت طيب العود فيقال شعر معتق ودهن العود المعتق .. في مقابل صفة للشعر المعاصر وهو انه طازج بمفرداته الحديثة .. طيب ماهو الاجمل الشعر المعتق امن الشعر الطازج .. نقول وللناس فيما يعشقون مذاهب .. ولي عودة

اخوي الغالي سعود ....

هلا بك ومرحبا ..... اسعدني اطلاعك على موضوعي ...

وانا اقصد الشعر الشعبي ....


لا تساوين جرحي بالصور والعطور ...

تراني فاكر وانت والله على بالي ...

تحياتي لك عزيزي

هلا وغلا بأخوي العزيز سالم ....

يهمني وجودك بهالموضوع لان رايك يهمني ... شاكر لك حضورك ..

عزيزي ...

اولا هذا مو تهور ... هذا رأي ويقبل الرأي الاخر .... وانت تقول الله يعينك على الردود وانا اقولك اللي بيرد اخواني واكن لهم كل احترام ووجهات نظرهم المختلفه هي اللي تهمني .... اكثر من وجهات النظر اللي توافق الموضوع .

انا يابو سند مانفيت الشعراء ... لو تقرا كلامي بتركيز ...

وانا ادري ان الشعر ما انولد في لحظه بل هو امتداد لأزمان وازمان ...
وانا قلت ان فيه شعراء من العقد السابق باقيه قصايدهم ومبدعين ....لاكن قلّه ... واكثر واحد فهمني هو اخوي حسن العرجاني لاني اقصد الشعراء الي قبلنا بعقد .

اخوي سالم .... انت لا تحلف علي انا احفظ من شعراء اليوم اكثر من شعراء الامس ... ( معليش يعني )

صدقني ماراح اتابع شاعر من الامس وانا متأكد من كلامي

مسأله ان كثرة الشي تدل على جودته ان كانك ماسمعت فيها من قبل اسمعها الحين ... وانت لو تقارن وتقيس بأي شي ... بتلقا ان الكثره تسبب التنافس ومن هنا يبدأ التميز ... وعندي على ذلك امثله كثيره ..

انت تقول انك ما استفدت من الشعراء الكثر شي ؟؟؟ غريبه ... ياخي انت وش تبي تستفيد ؟؟؟ انت مش جاهل على شان يعتمد تفكيرك وقراراتك على الشعر ان كان هذا قصدك بالاستفاده ...
انت تبي حكمه يعني ؟؟؟ طيب الحكمه في كل العصور وبأشكال مختلفه ..والحكمه مو من الشعر بس ..
اخوي الاستفاده من الشعر من وجهت نظري هي في الاستمتاع فقط . انا اسمع لشاعر استمتع بقصيدته واجد فيها ما يرضيني


اخوي الغالي ......... كلام المجالس يتركز على الشعراء الجدد والشعر الجديد .... وهذا هو الواقع .

اخوي الكريم .... محمد اللطيف ...
يا هلا بك ومرحبا واسعدني حضورك ...

انا ما انكر ان الشعر امتداد ... والموضوع مايتكلم عن هالنقطه اطلاقا ...

انا اتكلم عن الجوده والاثراء والمتابعه ..بين العقد السابق وشعراء اليوم ...

انا عارف ان عوامل البيئه اختلفت عن اليوم وكل شاعر يتأثر ببيئته في نهجه ... ولا انكر ذلك ... وفيه شعراء من كتّاب ( ياراكب اللي ) قصايدهم من اروع ما يكون ...

افهمني يا عزيزي ...

موضوعي يختلف عن ماذكرته انت ...

لك خالص ودي .. والف شكر على المشاركه

هلا ومرحبا اختي الكريمه .... عندل ...

انا ما تابع الشعر الماضي .... لاكني افهمه ...
وانا لو ماني افهمه ماكان نزلت هالموضوع ..ولا عندي اي مشكله .. عدم المتابعه لا يعني وجود مشكله ولا انكر اني كنت اتابع ( من زمان ) بس الحين لا ... لان الشعر اليوم اصبح جدير بالمتباعه خلافا عن الشعر بالامس .
اختي عندل ..
الاشعار السابقه فيها الجميل وكثيرها الغث .. وعدم متابعتي لا تعني عدم متابعه الكل كما ذكرتي وهذا لا يعني ان ذائقتي مش ( اصليه ) لانها لو ماكانت اصليه ما اعترفت بوجود اشعار جميله جدا من اشعار العقد السابق .. او على الاقل كان ما ذكرت المتنبي اللي قبل كل العقود ... صاحب الذائقه الاصليه اللي تتكلمين عنه هو اللي يعطي اكبر نسبه للتميز في اشعار الامس ... وانا اختلف معاك لان الذائقه تتطور مثل الشعر ... فأذا تطور الشعر ... من باب اولى ان الذائقه تتطور مثله ... وهذا الطبيعي
انتي تقولين ان الشعر السابق بسيط واعطى امثله بالابداع والسهوله والتميز ... وهذا صدق .. لاكن بنسبه بسيطه جدا ....
في كل وظائف الشعر .... تجدين ان الشعر السابق كان بسيط لدرجه التفاهه ... وهذا كان موجود عند شعراء كثر من شعراء الامس ... ومع ذلك انا اقولك ان بعضهم تميز وابدع لاكن قليل ..

بالنسبه لشعراء اليوم اللي تقولين انك تجدين صعوبه في فهمهم ... اذا ماكنتي تشملين الكل ...
فيه شعراء موجودين حاليها اتنرفز لما اسمع قصايدهم ... ومش هم اللي انا اتكلم عنهم ... وهم على فكره قلّه ... عكس اللي انا ذكرت بالسابق... واذا انتي ماتفهمين معاني الشعر اليوم .. فأنتي اللي عندك مشكله

اختي الغاليه ...

انا لما اقول احدثوا ثوره في عالم الشعر ... تراني صادق ..
والدليل انه صار فيه تبعيه ومناهج واساليب ترضي جميع الاذواق ... وجميع الاذواق اصليه ... والي مو اصلي هذا مش من بيئتنا وحتى لو كتب له سطرين خرابيط بينبسط .
الدليل على كلامي ... انه فيه شعراء تأثروا ببعضهم الان .... وبيّن الشاعر من المستشعر ... وفيه شاعر نجم ولاكن لكثره المنافسه والتميز هوى نجمه ... وهذي ظاهره صحيه تأيد الجيد وتنفي الضعيف ... وهذا هو الاصح واللي لازم انه يصير ..

اختي العزيزه ...
ابيات ابن عون مدري ابن لعبون قديمه ... وجيده عند بعض الناس وهذا ذوقهم انا ما اقدر ارد الناس عن اذواقهم لاكن تبين الصدق .... هالابيات مايستشهد فيها الا اذا بغوا يذكرون البحر الهجيني بس ...

وانا ماتعجبني هالابيات وان كانها بقت في بالك هذا لانك متابعه للأشعار القديمه .. انا مستعد اجيب لك العدد اللي تبين من الناس ذوي الذاقه المميزه واللي يحبون ويتابعون الشعر ولو تسألينهم عن هالابيات ماعرفوها ! وهذا مو عيب فيهم ولاهو عيب في الابيات .. لا لاكن وجد الان ما خطف وجهات المتابعه له .

عزيزتي ...
فيه افكار ما سبقت ...

والنقاش في هذه النقطه يكون بالادله ... اذا تبيني اسرد لك ابيات ما سبقت افكارها انا مستعد ..



شكرا لك لأثراء الموضوع ... واذا بغيتي ترجعين فهذا من دواعي سروري

اخوي الكريم ..... حسن العرجاني ....
هلا بك وانا ممتن لردك ... الف شكر لك ...

انت صادق ... وانا اقصد الشعراء في الفتره اللي انت ذكرتها ... وحتى اللي قبلها .... بفتره بسيطه ..


اعتقد يا حسن ... ان الشعر في تلك الفتره بداء يتحول وانوجد شي اسمه الحداثه ... فضاعت العالم ... بين اللي هم متعودين عليه وبين الشعر الجديد .... يمكن تناجه يكون شعر اليوم.... مدري .

لاكن الاهم ... ان شعر اليوم لا ينافسه شعر الامس .... ولا بمثقال ذرّه ... قياسا بالعدد ..


لاتحرمنا من متابعاتك يابو علي


تحياتي لك

اخوي الغالي ........ داهم العصيمي
اسعدني وجودك ويا هلا بك وغلا

عزيزي ...
انا اشوف انه ما فيه اي مانع من مناقشة الموضوع مره ثانيه .... وان كان هذا الموضوع طرح من قبل وانت استفدت فما يمنع اني انا وغيري نستفيد .

عزيزي ...
انت تقول انه ما وصل الينا الا الجيد ... من الشعر القديم ..
وانا اخالفك الراي لانه لو كل اللي قريناه جيد ما اختلفت ارائنا ولا عرفنا انه فيه جيد وغير جيد ..
وان كانك تقصد الاشعار اللي مالها قيمه فهذي حتى بوقتنا الحالي مالها ذكر ولا طاري
وبعدين انا ما اتكلم عن اشعار قبل 700 سنه .... لاني ما اعرفها ولا ابي اتكلم عن شي ما اعرفه ولاهوب هذا موضوعي .
انا اتكلم عن اشعار قبل 30 ... 40 سنه ...

ما انكر ان بعضها ممتاز .... ولاكن قلّه ... عكس الشعر اليوم تماما ...

اقصد النسبه والكثره ...


وبعدين ياداهم ترا العود المعتق نفس ريحه العود الجديد .... الفرق بالسعر

وفيه عود جديد اغلى من المعتق .



تحياتي لك يا طيب

ماعاش من يتعبك يا بو سند ,,,,,,

طيب انا اسف اقصد قبل اربع عقود او ثلاثه ...

وانا انصحك انك تبتعد عن اللي يتعبك .... المسأله رأي ورأي ثاني ....
وذائقتي وغيري كثير تتفق مع بعض وحنا نعتبر شريحه من المجتمع اللي يتابع الشعر ويحبه ...

انا ما اغلطك او اعتبر رأيك غلط .... لا لاكن ابي اشوف اكثر الناس وش تحب ووش تتابع ...
وفوق ذلك مو شرط ان رأيك يكون صح ..... شوف الناس الثانيه وش تقول وقيس على الكل ...
اذا اعتبرت بأراء الناس الثانيه


لا تحرمنا من متابعتك وارجوا اني ما اتعبك او اتعب غيرك ...

تحياتي

هلا ياعايض

الموضوع مازال خارج السيطرة ؟

تتكلم عن المتنبي والموضوع عن الشعر الشعبي وتستشهد به ؟

تقول شعراء الجيل المعاصر تفوقوا على شعراء الجيل السابق ؟؟

اعتقد ان الجيلين معاصرين لعدم وجود فارق زمني . خاصة ان من يكتب الشعر غالباً مايكون عمرة

فوق الخمس وعشرين هذا من يتقن الشعر ويبدع وأنت تتكلم وتقول قبل (30او 40سنه ) يعني كم الفرق ؟


ابيات ابن عون ليست قديمة وهو شاعر معاصر ؟

للمفردات مدلول خاص مثل العقد ، الجيل , ل

اتمنى تحديد الاسماء في تلك الفترة لانها فترة قريبة جداً والاسماء معروفة .

في تلك الفترة المقصودة لم يكن الاعلام متواجد بقوة خاصة في مجال الشعر لذا لم تكن فترة ذهبية

او مميزة .

كان بودي لو وضعت نماذج لشعراء تلك الفترة والشعراء الان لنتمكن من معرفة نوع الشعر الذي

يسكن ذاكرتك ولنعرف اكثر الاتجاه الذي يشدك وتجد نفسك فيه .

عل الود نلتقي .

تحياتي العطرة يابو راشد .

هلا وغلا يا سعود ....

سعيد بعودتك ...

انا ذكرت المتنبي للأستدلال على ان الجيد والمتميز يبقى مهما طال الزمن ...

وبصراحه شعراء الامس لم يصنعو ما يبقى في البال بالنسبه لي ...

طيب يا سعود انت تقول انه مافيه فرق وانا اقولك انه فيه فرق كبير بين 20 و10 وحتى 5 سنوات ...

لانه لو تشوف شعراء اليوم ولتميزهم وفي فتره بسيطه حققوا اللي ما يقدر شاعر من الشعراء القداما ان يحققه بنفس الفتره ... ولا تقوللي اعلام ... ترا الاعلام موجود حتى من قبل ... وبعدين المسأله واضحه وتأيد كلامي لانه بوجود هالكم الهائل من وسائل الاعلام الى ان الشعراء المصطنعين في الوقت الحالي لم يبرزو . وان تواجدو لمره او اثنتين وبس ..

اخوي الغالي .... انا ما ابي احدد اسماء ..

لاني لو تكلمت عن شعر شاعر قديم بأسمه بيقولون هذا يهمش من هو اعظم منه لكي يصل ... وانا ما ابي هالحكي ..

والله يا سعود ان فيه قصايد قديمه انه مافيها اي قيمه ابداعيه ولا ابتكار مجرد سرد ... وكثير كثير زيها ...
وانا اعرف انه بهالوقت انعكست الايه ... فالجيد كثير والضعيف قليل ...


لاهنت على مداخلاتك وردودك تسعدني ...

تحياتي