الشعراء والشاعرات المتزوجين.....

بعد التحيه والسلام :


إنها تجربه لم أخضها بعد ولكنني أفكر في حل لها من الآن......

تجربه فيها نوع من الإحراج والإستحياء لأنها ترتبط بالمشاعر الوجدانيه والغراميه في كثير من الأحيان....

تخيل بأنك شاعر أو دعنا نقل بأن لديك محاولات شعريه وأحاسيس غراميه تحتضنها أدراجك.....

هل ستسمح لزوجتك بأن تطلع على هذه الكتابات......؟؟؟


هل يحق لها أن تحاسبك على الماضي ؟؟؟


حتى لو لم تبادر بسؤالك ...ثق تماما بأن هذه الكتابات ستشكل خطرا عاطفيا لديها.....

وستتخيل بأن كل كتابه جديده لك هي من أجل الوفاء بحب الماضي وجروحه......

ألا تجدون ذلك يجرح مشاعرها ويظلمها كثيرا.....



وماذا لو حدث العكس.....


ماذا لو قدر الله وتزوجت شاعره.......أو لنقل بأن لديها وريقات تحمل بها مشاعر الماضي......

بالطبع ستبادر المرأه بدفن موهبتها.......

فموقفها صعب بالنسبه لشريك حياتها...



ياترى لمن كانت تكتب ؟؟؟؟

لماذا تمسك بالقلم دائما.....

هل لديها أحاسيس وجروح وحب ماضي ؟؟؟؟


ماذا سيكون موقف الزوجه


هل ستتكتم عن موهبتها أم تستمر في الكتابه وتأخذ رأي زوجها.....





أطرح بين أيديكم هذه الأسئله المحيره.....


وأتمنى منكم مشاركتي لنجد الحل لهذه المشكله الاجتماعيه والعاطفيه والشعريه في آن واحد......


وأخص من لهم تجربه من الشعراء المتزوجون....





في أمان الله

[الجارح]

اللله يستر بسس....

حياك الله يا ودعاني ....
موضوعك والله حسااااس جدا ..... وهام بعد
لكن اعتقد ان الماضي يجب ان ينسى بشقيه الحلو منه والمر ....
والبدء بمستقبل حاضر خالي من الشوائب ...والتجارب التي اكثر مايقال عنها ذكرى حلوه او مرره في حياة كل انسان...



تقبل تحياتي
اخوك الجارح

اخي عبد العزيز الودعاني 0000 طابت ايامك ولياليك


موضوعك ماهوووب صاحي 00 والدليل خووف الاغلبيه من الدخووول اليه

او قد يكوون وقت الطرح 000 وقت متاخر 00 واكثر المتزوجين 00 قد بدا عليهم فرض الحظر

اخي اسئلتك واجد 00 لكن خلني انقلهن هنا واجاوبك كاحد المتزوجين

هل ستسمح لزوجتك بأن تطلع على هذه الكتابات......؟؟؟


هل يحق لها أن تحاسبك على الماضي ؟؟؟


وذكرت قبل السوالين هالجمله((بأن لديك محاولات شعريه وأحاسيس غراميه ))


انا مدري مقدر احكم على اشعري هي احاسيس غراميه والا 00 بس الوكاد ان كل مخزوني الشعري المتواضع بمتناوول الجميع

وبالنسبه لسؤالك الثاني تحاسبني عن الماضي ؟؟ اقوولك

اعتبره زي ماتعتبره وانا اخووك 00 بدري عليها
هههه في الحقيقه ياخووي مالي ماضي يستحق اني اتحاسب عليه لاتقول وش جايبك اجل؟؟ انت قلت المتزوجين وجيت


بالنسبه لسوالك لو كانت شاعره 00 والله مدري لاني ما مريت بالتجربه هذي

لكن ابا اقولك او ابا امرر نفسي تحت هالمحك واعطيك انطباعي


اذا كانت شاعره 00 واشوفها تكتب قصيده ماهيب فيني ياقرررد حظها
وش اللي مجبرها تتزوجني

جروح ماضي مدري جروح حاضر مايمشي عندي قصيدها لازم يكون فيني والا تنثير <---تراه متحضر000والا صمختها بهجائيه 00 والله وكيلك عاد الهجائيات اللي عندي من نوع عشرطعش سلندر

لاتقول هماك تكتب انت في الغزل 00 وهل معنى هذا انه في زوجتك 00 اقوول ماهوب شغلكم

والله تبي الصحيح الغزل عندي قليل جدا 00 لاني يمكن مامريت مرحلة مراهقه او ماكان عندي فرصه 00 اني اتعرض لمهيجات الغزل 00 بلشنا بدورة العيشه وتجوزنا ما وصلنا 17 سنه 00 انا والله وضعت ردي هذا تشجيع للاخوان انهم يجوون ويشاركون لانه بالفعل موضوع حساس 00 ولاعاد تتعودها يابو سعوود

لك تحياتي وتقديري لاعدمتك


سيف السيف

جاءء واحد قبلي مادريت

ابوو سعوود سجل اثنين شجعان

السلام عليكم

صراحه ماقريت الموضوع .. بس شفت رد عكاشه يقول سجل اثنين شجعان ..

سجلوني الثالث .. وترى ما ادري وش العلم

لي عوده ان الله سهل ..

وانا الرابع من الشجعان بعد عكاشه وابو ثامر والجارح ..
عبدالعزيز وضع هنا موضوع جيد بالحيل وما كل واحد يملك الشجاعه الكافيه او الصراحه بمعناها الصحيح .
لكن انا باجيب اللي اقدر عليه والله يستر منك ياعبدالعزيز

انا اقول ورزقي على الله ما فيه شاعر ماعنده غزليات اللي واجد واللي شوي وانا اولهم لكن الحمدلله انها ماهيب واجد

ولكن انا يمكن اني ما اسمعها زوجتي ماهوب ذل منها ولكن احتراما وتقديرا لمشاعرها ولكن ممكن تلاقيها وتقراها وتتحمل اللي يجيها من الضغط النفسي والعصيبي والا وش اللي خلاها تقراها وهي عارفه وانا قايل لها ان هذي من وحي الخيال واهم شي انه يكون فيه ثقه متبادله وللمعلوميه ام مهدي تعرف اني اكتب قصايد غزليه ولكن مطنشه لانها خايفه تدخل معي في نقاش ثم اضربها بالثانيه هاهاهاهاهاها

يازين كلام الفراغ

واحيانا يجيها خبر من رفيقاتها اللي يقرون ويتابعون المنتدى ولكنها ما تعطيهم وجه وتقول لهم بكيفه انا ابخس
مادري هي ذاله والا ضامنه ههههههههه انا ماني مسوي شي كل الدعوى حكي في حكي .

لكن والله بعض الاحيان يجي قدامك ظبي يشق الوجه ولا شعوريا تلقاني اوصفها ولكن كل الدعوى كلام والا والله اني انظر الى الجميع وانا اغار عليهم كأنهم خواتي وهذا طبع فيني ولاهوب تطبع لان محارم الناس كأنهم محارمي والا ما يغار على محارم الناس ما يغار على محارمه تنتزع الغيره من قلبه .

اما الزوجه اذا كانت شاعره فهذي موهبه من الله حرام تقتلها فيها ومن ناحيتي ماني رايح ابحث في الشي اللي راح لان هذي من سفاسف الامور ولا يعود في المناحي الا البقر والحصان لا عثر طمر .
لكن بعد ماتكون زوجتي تروح تتغزل في غيري لا والله ماعاد يلمس جنبها جنبي لابوها لابو من جابها ..
اما الشعر العفيف مثل المدح والرثاء والنصائح فهذا له جواب ثاني وفي حدود بعد .

عساني ما طولت عليكم وترا نصف الحرب دهوله

اخوكم /// ابو مهدي

يالها وغلا فيك اخوي الـجــــارح.....

أقدر رايك ونظرتك بأن الماضي يجب أن ينسى.....

ولكن المستقبل بالمرتبط بالماضي الى حد كبير.....

وأنا أشوف انه من الوفاء لشريكتك أن تخبرها عن ماضيك حتى لو لم تسأل عنه....

لأنك تحسسها بمزيد من الصراحه والثقه......


وشكرا على مرورك العذب



الودعاني

ياهلا وغلا


طيب الله ايامك يالشجيع ياعكـــــــاشه.....

ماقصرت قلت رايك بصراحه كفيت ووفيت.....

وشكرا لروحك المرحه اللتي جعلت لردك رونق جميل......


تقول ياعكاشه : انك مامريت بمرحلة مراهقه....


أجل انتبه وانا اخوك ترى فيه مراهقه متأخره......


وابشر عز الله اني ماعاد اتعودها.......




أخوك/الودعاني

ما يعود في المناحي الا البقر و الحصان لا عثر طمر
ما يعود في المناحي الا البقر و الحصان لا عثر طمر
ما يعود في المناحي الا البقر و الحصان لا عثر طمر
ما يعود في المناحي الا البقر و الحصان لا عثر طمر
ما يعود في المناحي الا البقر و الحصان لا عثر طمر

الله جميل جدا ذا المثل يا حكيم ... صدق من سماك حكيم ...

شكرا اخوي الودعاني على هذا الموضوع

وبالنسبه لسؤال الاخت امسيه فارجو انها اذا كانت متزوجه انها تحكي لنا عن هذا الموضوع .. فرأيها و رأي الاخوات الشاعرات يهمنا كرجال ..لنرا تصرف الشاعره في هذه البلوى .. لان نسائنا لا يملكون الموهبه الشعرية فلا نستطيع الحكم و معرفة وجهة النظر الا من شاعره .. فنرجوا منها التكرم بالاجابة مشكوره ...


اخوكم فيصل

مساء الخير جميعا ..

والله انا الموضوع هذا شدني من البدايه وكنت افكر ادخل لكن انتظرت الردود .. الي بتجي وبعدين صرت احتري قلم نسائي .. يجرئني شوي ..

وقلت يالله مالي الا ادخل واقول الي عندي ..

اول ما قريت الموضوع قدام عيني دارت كل الأ حداث الي مريت فيها …

لكن اتكلم بشكل عام ..

اولا شي نوع العلاقه بين الطرفين اهي تحدد كل شي وتحدد حرية الكتابه ولالا يعني ..

لو كان زوجي شاعر مع العلم انه مهوب شاعر ابد .. والوضع غير سليم يعني دايم الشكوك تدور حوله .. واشوف ان القصايد الي كتبها غزل صريح والوضع غير مريح … غير مريح هذاك الوقت ممكن فعلا ابد هجوم ((( وشوله هالكلام وليش انكتب ومتى كتبها … الخ ))) لكن اذا والله الرجال صريح معي وكل شي يقوله لي وحاطني في باله وصايره انا مرجع للقصيده قبل لا تمنتهي ويعلمني متى حس فيها ومتى قالهها وليش قالها ومو مهم انها انكتب فيني بس لمجرد ان حاس بها الشي … ذاك الوقت اتعوذ من الشيطان واخليه يكتب الي بخاطره لأنه شاعر .. واضح واشوف شعوره طبيعي
بنسبه الماضيه اني كفيله بالماضي اذا ما قدرت انسيه ما ضيه الذنب مني مو منه … وهذا اتحملها انا


وبنسبه لو ضعي انا كون الله عطاني موهبة اني اقدر اعبر واكتب احساسي ابد ومستحيل ادفنه ودايم احاول اكتب بشكل واضح ..واشاوره مع انه يحوس ما يرتب لكن اسم اني اخليه في الصوره عشان افتك من اسئلته .

والماضي بنسبه لي غير موجود لأني تزوجت صغيره ..

وارجع واقول ممكن القصيد يسكن ألدراج ويتخبى وممكن انه يكون وسط البيت وبنتكب بكل حريه وهذا كله تحدده علاقة الزوج بزوجته والتفاهم الي بينهم….

مدري هذا اريي بشكل سريع …




اختكم


أمسيه

هل يمارس أحد الزوجين دور الرقيب على الاخر .. عندما يكون أحدهما شاعر .

هل الشاعر / الزوج أو الزوجة / الشاعرة يمنح الرقيب مساحة من مراعاة الطرف الاخر عندما يكتب القصيدة .

هل يفتش الزوج عن ذاته في القصيدة التي تكتبها الزوجة الشاعرة

هل تفتش الزوجة عن ذاتها في القصيدة التي يكتبها الزوج / الشاعر


اعتقد وبحكم ثقافتنا الذكورية لا مشكلة في كون الزوج شاعر ... الامر يكون أكثر حساسية عندما تكون الزوجة شاعرة ... ولا يتجاوز هذا المطب الا القليل .. ممن لديه القبول بابداع المراة بشكل عام . أو لتميز العلاقة بينه وبين زوجته الشاعرة .

هناك سؤال اخر :

كيف يتعامل الزوج مع اعجاب الاخرين في شعر الزوجة / الشاعرة . وكذلك الزوجة كيف تنظر الى المعجبات بشعر زوجها .


انا لست شاعر وخرباشتي لا تهم الزوجة في شيء ....


الشكر لــ عبداعزيز الودعاني .. على جمال الموضوع .. والتحية للجميع

اررررررررررررحب



استاذنا/ابوثامر


مسيت بالنور والسرور...


رايك مهم يابو ثامر نبيه......


عود علينا......




الودعاني

ياهلا وغلا



نوووووووووووورت الصفحه يابو مهدي........


وأعجبتني صراحتك اللامتناهيه.......



وصدق لا قالوا العود من اول ركزه.......



اللي فهمته من كلامك يابو مهدي انك راكز العود صح ماشاء الله عليك.......






وفعلا على الشاعر في بداية حياته الزوجيه أن يتخذ موقف حاسم خلال هذه القضيه.......


ومصارحة زوجته بأن قصائده السابقه والقادمه هي للشعر ومن الشعر وإالى الشعر.....


مع ضرورة اهداء الزوجه لقصائد خاصه عشان يطمئن قلبها.....



وشكرا يابو مهدي على مرورك العذب....



أخوك/الودعاني

[عليا الهلالية]

مسيتوا بالخير


ومساءك اطيب يا امسية

بصراحة اعطيتينى الجرأة بردك يالغالية فسرت على خطاكى عسى ما يضيع قداك

واللة الموضوع يفتح نوافذ كثيرة مغلقة يتجاهل البعض فتحها

وانا بصراحة ودى اعرف وجهة نظر زوج وزوجة كلهم من الشعار ويكتبون بصراحة معلنة

فاعتقد ان مثل هذا الرد هو اللى بيمثل الرد الامثل لهذا السؤال

وهذا لا يمنعنى من ادلى برايى فى هالموضوع مثل ما فعلت اختى امسية (يعنى سجلوا امرأتان شجاعتان)

بصراحة زوجى مهو بشاعر (الحمدللة )والا كان بموت بحرتى مع علمى ان اغلب الشعر من نسج الخيال

لكن هواجيس المرة وش اللى يركدها 00فلما يوصف والا يتغزل بوحدة عزاللة انة طاح بليلن مابة مسرا

ويبدا شغل الموساد والتحرى 00منهى؟وين شفتها؟وشلون عرفتها؟

يعنى بصريح العبارة يكون الغزل كلة لى ولويذكر صفة مهيب فينى معناة انة يعرف غيرى(وخلة يفك عمرة عاد

ولو ان رايى انة اذاكانت الزوجة شاعرة يمكن يكون الوضع اهدا قليلا لعلمها انة نسج خيال فتكون مساحة الحرية اكبر

وبالنسبة للمراة الشاعرة (فمصيبتها مصيبة)واذا كانت المراة تشغل الموساد لما تقرا لة غزل يتراوالى انة بيشغل

ايدينة وعقالة لمن يقراء لها غزل

ومن ناحيتى بصراحة تراهو ما يدرى عن اغلب قصيدى يعنى يشوف المسموح والغير مسموح احتفظ بة لنفسى

ولكم والا هو ما يدرى عنة وهذا السبب فى غيابى عنكم (يعنى اغتنم فرص غيابة ودوامة)

اعرض علية فقط قصايدالحب اللى فية والعتب والشرهات وهذولى واجد والقصايد اللى اكتبها عن الغالى تروكى

وبس لانى عارفة شك الرجال ما يميز بين خيال وواقع

وعسى ان نسمع راى باقى شاعراتنا

اخوي القدير / عبد العزيز الودعاني
اخواني واخواتي الأعزاء00
اسعد الله صباحكم جميعا00

"

موضوع شيق جدا ولا اذكر انه قد مر علي موضوع جريء كهذا ابداً ويسعدني المشاركه به وما تخطه اناملي
لا يمثل الا رأيي انا فقط00وارجو ان تتسع صدوركم لما سأكتب00

بالنسبه لي كشاعره مرتبطه بشاعر فحتما سيكون التوافق اقوى (اذكرو الله وامسكو الخشب) وهذا ما هو حاصل بيننا و الحمد لله اننا لم نواجه مثل هذه المشاكل التي تحدث عنها عبد العزيز00
ولا اخفيكم سرا اننا منذا البدايه تعاهدنا على الصراحه سواء كانت ماضيه او حاضره او مستقبليه....!!!
وهذا ما يجعلنا متوافقين في اغلب الاحيان00
وهنا اضم صوتي لصوت اخوي عبد العزيز ان الماضي جزء كبير من الحاضر ومن الأساسيات لبناء حياة ناجحه بين الزوجين لسبب بسيط انه لا توجد شجره ليس لها جذور00
واذا كان الزوج متفهم والزوجه كذلك فلا اظن ان هناك مشاكل ، وبالنسبه لقصايد زوجي الماضيه لا تشكل لدي
محطه للو قوف لأنني اعلم انها مجرد قصائد لاروح فيها ولا تمثل الاخياله00وهو كذلك00اقسم بالله انه وحتى هذه اللحظه لم يسألني عن اي قصيده غزليه او غيرها لسبب بسيط انه عرفني عن قرب00
والثقه هي أساس اي علاقه تربط بين اثنين00

ولا انكر وجود الغيره بيننا فالغيره هي الابنه الكبرى للحب00

اما بالنسبه للأدراج التي تحتضن تلك القصائد التي تخصني فمفاتيحها مع ابو فيصل والعكس صحيح ومن تالي صار فيصل وسلطانه يلعبون بمفاتيح ادراجنا والله يخلف00

اخوي عبد العزيز:
الشعر فن مثل الرسم والعديد من قصائدنا من نسج الخيال وانا عشت مئات القصايد وجسدتها بدون روح وهذي الحقيقه وممدوح كذلك والمرأه تعرف زوجها بعد عشرتها معه وهل كان لديه ماضي ام لا والرجل كذلك00
فما بالك اذا كانت الصراحه اول ولد بينهم00

تخيل انك متزوج رسامه ورسمت لوحه بتحقق معها وش تقصدين بهاللوحه وش هالفارس اللي فيها ؟ والا ليه حاطه قلب منشرخ؟
طبعا من السفاهه انك تسأل هالاسئله00
يا اخي الشعر والرسم فن جميل لا يملك احدنا التدخل في جمال صوره او تشويهها والا وش راي الجماعه؟؟

وبعدين بالنسبه للمعجبين او المعجبات في حياتنا هذي بطاقه لا تحتمل الصرف بيننا اي لا نتقبلها بأي شكل من الاشكال00

واحنا اكبرمن هالسوالف هالسوالف مخلينها للمراهقين00(قويه) صح00

واللي بتقرد نفسها تعجب بممدوح انا ماعندي الا الشوش

طبعا وجهة نظري تمثل حياتي مع ابو فيصل00

ولا انسى موضوع الرسايل اللي تصلني من الجمهور بالطبع لا اتفاجأ اذا وصلتني مفتوحه لأن ممدوح يقرأها قبلي ولا عندي اي اشكال في هالشيء00

على العموم ارجو اني قد وضعت بعض النقط على الحروف واذا هناك اي تساؤل ابشروا00

اخوي عبد العزيز00
كلمه اخيره00
الزواج بدون ثقه وتفاهم لن يستمر مهما كان00
اذا صممت على الزواج لأبد ان تكون كتاب مفتوح امام زوجتك وهي كذلك00
الماضي هو الاساس فاذا خبيت عليها ماضيك بيجي اليوم اللي يعلمها غيرك وذيك الساعه فك نفسك00
الكذب سبب رئيسي في انعدام الثقه بين الطرفين لذا انتبه00
شكرا مليون00

موفق انشاء الله 00

اعتذر على الاطاله00