يوميات رجل... (( رايح فيها))...

هذه الرساله ارسلها لكل اخواني في الله حتى يفكرون مليون
مره قبل ما يتزوجون , ورجاء لا تقولون اصابع يدك ماهيب
وحده ….لاني برد عليك وبقول لك الا وحده

الفرق بين المرأه في السنه الاولى من الزواج والسنه

شوفو واحكموا ............
العاشره او ما فوق
الساعه 6:30 صباحا :
تودع زوجها وهو طالع للعمل وتقول له ( بتوحشني يا حبيبي
)
الساعه 11 صباحا :
تتصل عليه في العمل وتقول له ( حبيت اسمع صوتك بس يا
عمري )
الساعه 3 العصر :
تستقبله وهو متشيكه وتبوسه وهو داخل للبيت وتقول له (
الغدا جاهز يا حياتي ..تحب احطه لك الحين ؟ )
الساعه 5 العصر :
تصحيه من النوم ببوسه وتقول له ( اعمل لك شاي يا حبي ؟ )
الساعه 6 المغرب :
تسبل عيونها وتقول بكل خجل ( يا ريت يا حبيبي .. يعني لو
ما عليك كلافه .. يعني اذا تقدر توديني شوي لبيت اهلي
..اذا كنت تقدر يا عمري ) وقبل ما ينطق بكلمه ( اذا ما
تقدر خلاص مو لازم ) وطبعا يضيع هو في نظره من عيونها
ويوديها لاهلها ولو انهم ساكنين في السويدي وهو ساكن في
العليا
الساعه 8 بالليل :
تتصل على الجوال وتقول ( اشتقت لك يا عمري .. يا ريت
تمرني ونروح للبيت ) وطبعا هو عارف وش بيجيه في البيت
فيطمر ويقول للشباب ( اسف والله يا شباب راسي مصدع ولازم
امشي )
الساعه 10 بالليل :
,
,
,
,
,
,

,
,
,
الساعه 6:30 صباحا :

اما عقب عشر سنين من قرادة حظ الماخوذ شفو

الساعه 6:30
هي في سابع نومه
الساعه 11 صباحا :
هي برضه في سابع نومه
الساعه 3 العصر :
تستقبله وهي نافخه خشتها وتقول ( شف لي حل مع ولدك علي
هذا ..حتى الان ما حل الولجب .. وسوير الله ياخذ عمرها
انشاء الله شاقه مريولها في المدرسه …عطني فلوس لازم
اروح اشتري لها واحد غيره … وصويلح يبي علبة هندسه تو
انه يقول لي يوم ان الاختبار صار بكره … وترى موضي
تكنفست مع الدرج وهي كانت في المشايه … والظاهر انها
تعورت …كله من هالشغاله الله يا خذها ….اسمع يا انا يا
هالشغاله في هالبيت ….ابيك اليوم تسفرها ما ابي اشوفها
….وابيك بسرعه تقدم على وحده ثانيه ….وما ابيها تصير
حلوه …..يا ويلك لو صارت حلوه …..وبعدين شغالتي ابيك
تشرط عليها اذا سفرتها ما عاد تشتغل عند احد ….عشان ما
تقول اسرار بيتنا للناس الي تشتغل عندهم ( ما تدري ان
اسرار بيتهم كلها عند الجيران من لسانها هاللي وش طوله )
و …و …..و
الساعة 5 العصر :
هي تفك هوشه بين سوير واخوها ويصحى هو على صوتها وهي
تهاوش وتدعي عليهم بجميع الامراض الخطيره الحديث منها
والقديم ( جعلكم للطاعون …جعلكم للحمى …جعلكم للوادي
المتصدع …جعلكم للحمى القلاعيه …والايدز ..الخ )
الساعه 6 المغرب :
هو جالس يشرب الشاهي وهي تقول ( نبي نروح لامي بتجيهم
بنت خالة جد ولد عم ابوي ..وبعدين نبي نروح نشتري للبنت
مريول ..وبعدين بنت عمي والده ولازم اروح اشتري لها هديه
من باتشي و ابي امر على المشغل ..وبعدين حطنا عند اختي
في الشفا من زمان ما شفناهم …………..
وفي هاللحظه فكر هو انه يشتغل ليموزين احسن له
الساعه 8 بالليل :
تتصل على الجوال ( وينك فيه ؟ وبعدين وين بتروح ؟ ومنهو
الي معك هذا ؟ ووش بتسون ؟ ومتى بتجي ؟ لا ما فيه الساعه
11 تعال الساعه 10 )
الساعه 10 بالليل :
جالسين هي وياه عند التلفزيون ..اخيرا هدوء ..والعيال
نايمين ..والجو جميل ..وفجأه تطالعه وهي ماده بوزها
وتقول ( الحين امك وش عندها اليوم ما ترد يوم اني سلمت ؟
هاه ؟ ) ( والله ما ادري كان سالتيها ) ( واختك وش
هالحركات الي مالها سنع …ليش عازمه الجيران وكل حريم
اخوانك الا انا ؟؟؟ لكن هين والله لاسوي عزيمه وما
اناديها …اصلا هي ما زارتني في المستشفى يوم اني ولدت
..وانا فاهمه قصدها ..لكن هين ..والله لو تحب السما ما
نيب زايرتها اذا ولدت ……وبعدين بنات عمك وش عندهم نافخين
عمرهم ؟؟ على ايش ابي افهم ….على جمالهم الزايد اللهم لك
الحمد بس ) تسكت شوي بعدين تقول ( وبعدين اختك نوره يوم
انها تقول ان علي ولدي يشبهني ما يشبه ابوه وش قصدها
…هاه )ملاحظه : علي هو اشين اخوانه) ( انا فاهمه قصدها
..وتراها اذا ما بطلت هالحركات والغمز واللمز تراني
ابسمعها كلمتين واخليها تحترم نفسها …..لا وذاك اليوم
تقول اخوي محمد ( الي هو الزوج ) حلو مره و3 من حريم
الجيران قد خطبوه لبناتهم ….من زينك بس ما ادري وش لاقين
فيك ) . يسكت وما يرد , تسكت هي ثم تقول ( وبعدين اخوك
شاري لحرمته ساعه قيمتها عشرين الف ريال ) يرد ( طيب وش
المشكله ؟ ) ( وانا ليش ما تشتري لي ..والا انا ما
استاهل ..ولو هي يعني احسن مني … بلاك ما شفتها ..شينه
وطبايعها شينه وحتى طبخ ما تعرف تطبخ ) ( خلاص اشتري لك
ساعه ) تعصب وتقول ( ايه تسكتني بهالكلام ….والله لانت
شاري ولا شي ) ( وش تبيني اقول يا بنت الحلال ؟ ) تقوم
وهي تبكي ( خلاص ما ابي منك شي )
الساعه 11 بالليل :
هي زعلانه ونايمه مع العيال
وهو……يلعن اليوم الي تزوج فيه





والله لا يبلانا؛؛؛؛؛؛؛؛؛؛؛؛؛؛؛؛؛؛؛





[تم تعديل الموضوع من قبل سعد القريشي بتاريخ 05-31-2001 الساعة 07:52 PM]

الأخ الغالي المراقب // سعدالقريشي


يوميات حقيقية بس ما هي كل يوم ياسعد!!!


وبعدين توقيت نشر هذه اليوميات لغرض في نفس يعقوب!!!


لأن الإجازة بدأت والأخ الغالي // عايض راشد سمعت انه على وشك الزواج، لا تصد نفسه يا اخي


وايضا سمعت علي بن حمري !


وان شاء الله انت اللاحق ،ولا تفتن الناس يا سعد




اما المذكرات اليوميه صحيحة لكن انت كيف اكتشفتها !!


دمت غاليا ياسعد ،والله يقوي الأخوان ويغيرون اليوميات الى افضل من هذه

احسن شي ان الصفحه مقفله ...

وبعدين ترا خويك هذا خبيل ......


والا فيه احد تسوي فيه مرته كذا ؟؟؟

قطع صيب ابوه .....

بتعرس يا سعد >

والله يستر عليك من حالته ...


عط المره على عقلها ... وربها عدل ... وشوف شلون تصير حياتك .

مو معناه انك تهينها ... لا ابدا بس فيه حد وفيه احترام ...

والحياه فيها من المشاكل ما يكفي للواحد بانه يعرف شلون يرسم طريق حياته ..

والدليل اني ثاني يوم من زواجي بكون سهران عندك ...واتحاور انا وعلي بن حمري .. <<< ايه هين


تقبل تحياتي ...

بس عجبتني سالفه علوي الشين ...هههههههههههههههه


اخوك:
عايض راشد