Aldleahy - - Twitter

خذيت من سيرة حياتي تجارب
حطيت في بنك التجارب لي حساب
مابين هجمه واستراحت محارب
فتحت باب اصحاب واغلقت لي باب
والوقت ماخذ فيه سدد وقارب
صمتي كلام وعارف الوقت غلاب
يصير زين احيان واحيان خارب
والناس تكشفها المواقف والاسباب
اصبح مقام الوجه في ظل غارب
ذابت عروش النايفه والوفاء ذاب
وصدقت من قال الاقارب عقارب
من قال مامنهم غثا قلت كذاب

كلٍ يرى نفسه رفيع المستوى
والمستوى في نسبته على حسب
كم واحدٍ منصب وراسه مااستوى
لافضلوا روس الاوادم بالنسب

القمر روعه لياحل الظلام
وانت بين الناس في روعة قمر
في جمالك تعجز حروف الكلام
حالتك بالزين حاله ماتمر

ودعتها مثل توديع السعودية ليوم الخميس
اعطيتها للأبد عطلة نهار السبت طول الزمن

احسب اوباما من كبار المشايخ
مير اوباما كاشفٍ بُعده وقربه
الخطاب اللي تكلم فيه بايخ
اتضح ماهو موجه فيه ضربه
والعرب مابين متسنّدر ودايخ
والأسد في سوريا شغال حربه

عندي على بعض العلاقات تشطيب
بعض اصدقاي اللي تغيّر شطبته
من لا حسبني في كبار المواجيب
طال الزمن والا قصر ماحسبته

ضو القمر جذاب لْمسامر الليل
والقلب عنده سر ذكرى قديمه
حفظتها عن ناشر القال والقيل
غلفتها بالقلب لعيون ريمه

يكفي الراتب ولا يكفي الراتب
يقضي الحاجه ولايقضي الحاجه
قصة الراوي على ذمة الكاتب
اتفرج واحسن المخرج اخراجه
والعتب مالي عتب وانت يامعاتب
لاتعاتب وانت بالوجه ماتواجه

المشاعر تندفع لك صادقه واحساسي
شوفتك قدام عيني مابعدها راحه
يابعد راسي رسمتك في بواطن راسي
قفل باب القلب غيرك ماخذى مفتاحه

عارف التقليد بانواع الذهب والخالص
امتطي عرفي ودايم بالأوادم بخصي
كاشف اصحاب الثقه واللي كلامه مالص
اتفحص قبل اصادق بالملف الشخصي

ياهل الترزّز خفّوا شوي خفّوا
كلٍ على عين المصور حضوره
احياء هياكل والمبادي توفّوا
ظهوركم عفناه في كل صوره

لي صديقٍ له سواتٍ ماتسوى
فيني اهل العرف ماسوو سواته
العلاقه معه تضعف وُتقوى
بين جز ومد في وده وهاته
له ثمان ايام ووعوده تلوى
كل ماحددت له ميعاد فاته

لعيونك النصر ناصرته وشجعته
وانا فريقي ماهو بالاصل نصراوي
وصادمّتْ من صادمك يانصر ووجعته
اصبحت قصة زمان وصرت لك راوي

انا عليك بْخاطري ماخذ شوي
ماهو زعل لكن عليك اتشره
صامت ولا علمت والسالفه هي
هجرك معي مرات ماهوب مره

في تويتر عارض الناس في موضوع تافه
وانت تلقى لك جماهير في ابسط طريقه
خالف وحالف على شي مامخلوق شافه
تصبح الكذبه عظيمه وتقرب للحقيقه