محاوره بين مطلق الثبيتي رحمه الله وشبيب الدغباسي

محاوره من نوع المربوع



شبيب:


الليله الوقفه صعيبه ماهي مثل ماضي الليالي



ماكل رحل فيه شده الا قويين العزومي


الى عوى ذيب لذيبه الحرب تظهر له رجــالي




وتعوض بالهدات رده الله يقود لي السهومي







مطلق:




مابيننا شده غريبه ياولد ابو زيد الهلالي



عرفت اهل مكه وجده واللي ورى ضلع البقومي





الجرح ياتي له طبيبه لو كان بالعشر التوالي



واللي معه راس يكده مثل القمر بين النجومي









شبيب:




نعمين فيكم ياعتيبه اللي بعيد والموالي



لا شك كل دون وحده وانته بخيص بالسلومي




الملعبه مثل الخطيبه تبغى لها عز ودلالي



ولا كل رجال توده لضيوفنا يمكن تشومي







مطلق:




شبيب سواها شبيبه والسعر جوا السوق غالي


والذيب ماينباح سده لو راحة الفرك الخشومي



والصدر لو يبدي حضيبه كل عطا له فج خالي



واشعيل والله مانضده لو مات وطيوره تحومي






شبيب:


مانيب راضي بالغليبه بجاهدك لوني لحالي



كل بد يرجع يم بده ترى الرخامه للرخومي




الجدي ماحد يقتدي به معروف بالجدي الشمالي



وان راح عن مسراه رده كنه على الهضبات يومي






مطلق:



الخبل يسكر من زبيبه مابه جواب ولا سوالي



عسى جنودك مستعده ياقايد تبدي اللزومي




الجدي ماحد يعتري به ولا على راسه ضلالي



والسيف لو جربت حده ماشلت بعضات الهمومي







شبيب:





الذيب هو ذل في خيبه يبغى الرواعي بالمفالي




من دونها شده وشده تتعبك مع ذيك الحزومي



كل بخيص في قليبه والمي تظهره الحبالي




هد الصعب يارجل هده لا يتعبك غوج عزومي









مطلق:



الذيب ماينقص نصيبه لو تحترك صم الجبالي




وان لد له بالعين لده مايقدر الجالس يقومي





سريت وادروبي تعيبه واحترت في عمي وخالي




والسجن جدره مايهده غير الذي يجلي الهمومي











أتمنى اني اخترت اللي يحوز على رضاكم


أخوكم/عبدالعزيز الودعاني









[تم تعديل الموضوع من قبل عبدالعزيز الودعاني بتاريخ 12-08-2001 الساعة 09:20 PM]

شكراً للأخ عبد العزيز الودعاني على هذه المحاورة الطيبة

واتمنى من اغلب هذا المنتدى ان يحذوا هذا الحذوا الطيب

وتزويدنا بالمحاورات القيمة من اجل الفائدة والاستمتاع



سلطان المنصوري

اخي وعزيزي المحترم عبدالعزيز الودعاني



تسلم يامبدع جزل والا تجيب الي الجزل اخوك محمد الحبابي


يقدملك اطيب المشاعر علي جهودك الفذه

تقبل تحياتي

وموضوع قيم ومفيد للغايه


الله لايهينك يالقرم

أخووووي الغـــالي/ سلطـــان المنصــوري




شاكر لك من الأعماق على ردك الجميل.




وان شاء الله نشوف من النشاما محاورات لها وزنها وقيمتها




لا هنت





أخوك/عبدالعزيز الودعاني

أخووووي الغــــالي/ محمد الحبـــابي




شاكر لك يالقرم مرورك على هالمشاركه المتواضعه.




اما الجهود الفذه فانت يابو مطرف راعيها وصاحب مجهود ملموسه




لا هنت يالأجودي





أخوك/عبدالعزيز الودعاني

الاخ الودعانى


محاورة ذات طراة..

رحم اللة مطلق عمود شعر المحاورة..

لاهنت وصحتك يمينك ونترقب منك مثل هذة المحاورات القديمة الجزلة..


الشريفى