جورج بوش ..............جيانق زيمن ... ( محاوره )

جورج بوش
سلام رديه على حاكم الصين .... بالخير ياراعي النظام الشيوعي

ياجيانق بن زيمن نبى معك قافين .... والبرق عانه في المخايل يزوعي

جاينق زيمن

يامرحبا ياقايد الغرب واهلين .... ترحيبتن ترضي غفير الجموعي

البرق عانه يبرق يسار ويمين .... يوم الرعد حدر السحايب يروعي

جورج بوش

ماجيتنا ليلة لفونا المهنين .... يومن واشنطن تشب الشموعي

ليلة حكمت الكون في عام الالفين .... جوني هل الطالات غصبن وطوعي

جيانق زيمن

ارسلت لك يابن النشامى خطابين .... جت لك مناديبي تبارك فزوعي

وانا حكمت الشرق من عام سبعين .... ما اعلنت للحكام قبلك خضوعي

جورج بوش

انته تحسب الكون باقي بقطبين .... الراسماليه وطت كل شوعي

يانايم اصحى مرت اعوام وسنين ....ماعاد فيها يابن زيمن رجوعي

جيانق زيمن

يابوش حنا بال***** ملمين .... ومن دون هيبتنا بنينا الدروعي

ليتك تحل المشكله في فلسطين .... عز الله ان ابوك ماهو طقوعي

جورج بوش

ياجيانق انا طوفت وحده وثنتين .... والثالثه بتكون بين الضلوعي

الطايره وش علمها فالها شين .... اللي لها بحماك حول السبوعي

جيانق زيمن

الطايره ماردها غير بكين .... جانا يقالبها خبيث الطبوعي

وين احترام الانظمه والقوانين .... مثلك عن سلوم الدول مايتوعي

جورج بوش

ماهيب يمك رايحه للفلبين .... فوق المحيط الها نزول وطلوعي

مار اعترضتوا دربها يالشياطين .... عز الله اني من سواتك جزوعي

جيانق زيمن

يابوش يابن بوش تلعب على مين .... ماهوب انا اللي بالكلام مخدوعي

يابوش وطتها في الارض الشياهين .... كانت تجسس وهزعتها هزوعي

جورج بوش

هات الادله كان عندك براهين .... يومك تقول ارخت علاك السموعي

مخطين ياهل الصين منتم بمقدين .... وشيهانكم عود غرابن خروعي

جيانق زيمن

ركابها يابوش خمسه وعشرين .... عسكر من الجيش النظامي نزوعي

حاصرتهم يابوش بالجيم والسين .... حتى خذيت العلم منهم قطوعي

جورج بوش وهو يضحك ..

عينت طيارك غدا راسه طحين .... وامه على قبره تهل الدموعي

الطايره ترجع لنا بعد يومين .... اخذ الكلام ولاتطول تعوعي

جيانق زيمن

خل العلوم قصار واسمع لنا زين .... عسكرك جولك يالسنافي رجوعي

والطايره لاعاد تنشد لها وين .... راحت ديه في واحدن من ربوعي

وسلامتكم ..

ها ها ها ها ها ها ها ها هاها ها ها ها ها ها ها ها هاها ها ها ها ها ها ها ها هاها ها ها ها ها ها ها ها ها





صح السانك يا المبدع والله انك مبدع و تجيب افكار مميزه وحلوه مره

بس انشهد ان جاينق زيمن حشر بوش شف بيته الاخير وش قال فيه

خل العلوم قصار واسمع لنا زين .... عسكرك جولك يالسنافي رجوعي

والطايره لاعاد تنشد لها وين .... راحت ديه في واحدن من ربوعي


تسلم يا مبدع

[تم تعديل الموضوع من قبل ابو سلطان بتاريخ 04-24-2001 الساعة 06:24 PM]

الله الله اعقب يالصيني حاس الامريكي والله مالك الا من يترجمها ويوديها لبوش.خله يرد عليك



ههههههههههههههههه والله جميله بس لناطلب























نبي محاورة بين يلتسن وكوفي عنان.ترى كوفي عنان في الموال يقولون مبدع

أشوني قاريها في الأقلاع ورادن عليها يالمبدع ... بس تبي الصراحة ؟؟؟؟ على ما قال المثل (( سبقك بها عكاشة )) .

سهيل اليماني كتب ردية في الإقلاع قبل مده مهيب قصيره بين ( راغب علامة ) و ( عمرو ذياب ) ... بس خل عنك مسكته مهيب حول هذي ..


بس ما قصرت وصح لسانك و( لا يلام المرء بعد إجتهاده ) .

المبدع


مبدع فعلا

رااااااااااائعه رااااااااااائعه


وقيل لي انك كتبت محاوره بين بوش والقور عند الانتخابات ليتنا نقراها

ماشاء الله عليك

رغم اني لا اراك تشارك في المحاوره
غريبه


الفـــارســـه

الاخ الشاعر المبدع صح لسانك ومحاوره رائعه جدا
وتبي الحقيقه الصيني وهوب سهل عنده خصمه جيده

ترانا ننتظر منك الجديد ولله يوفقك يالمبدع

ابو سلطان :

صح بدنك ياغالي .. جعلك والله تسلم وهذا من ذوقك ..



.....


الشهراني :

انت تشوف الصيني مهوب على شكله .. وابد المحاوره الجايه في الامم المتحده ..


.....

ابو تركي :

تسلم يابو تركي كلك ذوق واشكرك انك رديت علي هنا وهناك .. وسهيل اليماني شاعر كبير ماني بحوله وانا اخوك ..


.....

الفارسه:

تسلمين يالفارسه ... هذا والله من ذوقك .. اما المحاوره اللي بين بوش وال قور موجوده في الاقلاع .. [url] http://www.eqla3.com/file/ubb/Forum8/HTML/002243.html [url/]

واما المشاركه في المحاورات والله اني اتمنى اني اشارك معكم بالمحاورات بس والله الوقت مايساعد وان شاء الله نلقى الفرصه والوقت المناسب ..


......

سرحان الوذيناني

تسلم يالغالي .. وصح بدنك .. والله لايهينك طال عمرك


وشكرا لكل من قرا الموضوع ..

[ابوسيف]

صح لسانك يالمبدع

أخوي المبدع

أولاً مساك أو صبحك الله بالخير

والله يالمبدع أنا أول ما وصلتني هذي المحاورة قلت هذي للمبدع أكيد

بس وأنا أخوك أشوف الناس يتناقلونها بدون أسم

وهذي مشكله لازم لها حل وين حقوق الشاعر



تحياتي للجميع

ياهلا والله وغلا يابو سيف ..

صح بدنك يالغالي .. والمحاوره ذي وانا اخوك مابقى موقع في النت مانزلت فيه وكل يوم باسم مهوب الثاني بس وش السواة .. مامعهم طريقه .. ابد يسوي نسخ للموضوع وينقله الواحد بدون اي وجه حق .. والله مشكله كبيره .. انا كنت في البدايه كل مالقيتها بموقع سجلت معهم بيوزر ورديت وتالي طالت الشغله صرت مغير اتابع المواقع واسجل .. تالي هونت .. والله انها مشكله كبيره مالها حل الا ان الحقوق في المواقع المشهوره مثل النداوي تصير محفوظه .. يعني ماحد ينقل قصيده من النداوي الا بشور المسؤلين عن الموقع مثلا .. هذا راي واللي عنده راي لايبخل به علينا ياشباب .. والله يسلمكم ..

المبدع