مالقيت احدٍ بوسط السوق

ياسلام الله عليكم يا رجال المقدريه
من يبي ياخذ معي طاروق والعالم تشوف


ودي اسأل لي سؤال وخايف افتح لي قضيه
مالقيت احدٍ بوسط السوق والعالم تشوف

مرحبا ترحيبتن ماتعترف بالجاذبيه
مالها لاحق ولاملحوق والعالم تشوف


من سأل ماضاع ياراعي اللحون السامريه
وانت لاسابق ولا مسبوق والعالم تشوف

البقا بك وانت نايف مير لاتخطي عليه
شايفٍ لي علم فيه حقوق والعالم تشوف


ذي ثلاث ايام والعالم لها روحه وجيه
الميه شاهد خبر موثوق والعالم تشوف

علمنا طيب ولاياتيك من عندي خطيه
والمطر ياتي معاه بروق والعالم تشوف


انت ماخصصت في عيد الفطر والا الضحيه
اصلح النيه لاياتي عوق والعالم تشوف

انت ما قصرت يا نايف ولا جيت برديه
العرب جا حظها من فوق والعالم تشوف


والله ان الهرج يم اللي بجيبه تابعيه
مابغيت احدٍ يجي مفهوق والعالم تشوف

انكسر راع الشداد وفلّت حبال المطيه
كل عصيد وقابل المرقوق والعالم تشوف



ان حضرنا مانفهقنا واضرب براسك طميه
ماكسبناها بسرق وبوق والعالم تشوف

اخوي نايف كان هناك غلطه كتابيه في الرد السابق وقمت بتعديلها

فقط للتنويه


الله اللي يعرف النيات والنيه خفيه
مير جت لك رزق يا مرزوق والعالم تشوف

العرب ماهيب يانايف بوقت الجاهليه
من سرق ماهو كما المسروق والعالم تشوف

دام تنقض هرجك الي قايله في الاوليه
اختلافك عند برقا وروق والعالم تشوف

ياذكي خططت لكن فكرتك صارت غبيه
افتخر في الصاحب المشنوق والعالم تشوف