أتمنى المساعده في هالقصيده.........

[طويل المسرى]

بسم الله الرحمن الرحيم

السلام عليكم ورحمة الله وبركاته ....
الغيبه طويله لكن مانسيناكم , ولانسينا طيب هالمنتدى...
تحية طيبة للمشرفين ولكافة الأعضاء الكرام

------------------
القصة قصة الشايب اللي تنكروله عياله بعد تربيته لهم , وماقاموا بواجبهم تجاه شايبهم
حاول يجمعهم اكثر من مره ولا قدر.... ويوم دخلت الماده واطماع النفس قدر لهم...
المهم بعد ماجمعهم بدى قصيدته ذكرهم بتربيته لهم وتعبه على ذلك ... استغرب الردى منهم وانكر وجوده بالعمام والخوال... وبالأخير دعى عليهم دعوة الوالد ... اللي يجيرنا ويجيركم من دعوة مثلها....

0000000 يااخوان القصه والقصيده مرت علي اكثر من مره وباكثر من مناسبه ... لكن للأسف ماقدرت أحفظها او اتذكر من ابياتها شي ..... هي بالتأكيد مشهوره ...

اتمنى من الأخوان اللي مرت عليهم هالقصيده بابياتها يرسلها على بريدي اللي راح اكتبه لكم في نهاية هالموضوع... أتمنى مااكون طولت عليكم ... اتمنى من الاخوان اللي عندهم هالقصه وابياتها سرعة المراسله ولكم مني كل تحية وتقدير

tweel_almasra@yahoo.com

هلا والله بطويل المسرى

حياك الله بين هلك وربعك


تقبل تحياتي

هلابك طويل المسارى

مساك الله بالخير يالقرم





وانشالله انا نقدرنكون عند حسن ظنك بقدر الامكان




ونورتنا بالحضور البهى يا بطل




والى مزيد من التالق والابداع





**// اخوك مطلق العبيسان

طويل المسرى مرحبابك

اذا القصيده اللي تبيها مطلعها هذا الأبيات علمني عشان اكمل سردها وذا ماهي هي اذكرلي من القصيده بيت ولا بيتين عشان الذاكره تستوحيها و اقدر اساعدك

وهي لشاعر اسمه جحيش :
[poet font="Simplified Arabic,14,black,normal,normal" bkcolor="" bkimage="" border="none,2,gray" type=0 line=200% align=center use=sp char="" num="0,black"]
قال اللذي يقرا بليّا مكاتيب= ياللي تقرّون العما من عماكم
ياعيال ياللي تشرفون المراقيب=تريّضولي وقصروّا من خطاكم
خوذوا. كلام جحيش مابه تكاذيب=مثل السند مضمون للي وراكم

[/poet]

[طويل المسرى]

يعطيكم العافيه

الأخوان عبدالله ومطلق تسلمون وماقصرتوا ...
اخوي ابن هضيبان ... قنصتها يالذيب ...هذي فعلا ابيات من القصيده المطلوبه .... أتمنى تسردها ومعاها قصتها كامله ... لاهنت يامحمد

السلام عليكم و رحمة الله و بركاته

و اسعد الله اوقاتكم بكل خير

و حيالله اخوي الغالي طويل المسرى

و ابكفيك يا ابن هضيبان لا عدمتك ...

هذي قصة جحيش السرحاني من اهالي الجوف . و عندما كبر و عمي صار ينصح اولاده و يوجههم لطريق الخير ..و الشامه و السيره الطيبه .. لان كل انسان يحب انه تجي عوايله تجي مثل اوايله ..و في يوم من الايام و كان رايح للمسجد و يقوده واحد من اولاد اولاده و كان لصغر هذا الولد و لسوء طبعه اراد انه يتخلص من جده فساقه الى حفره في الطريق و لكن جحيش كان يعرف مكان هذه الحفره قبلان يكف بصره و كان معه عصا فلما احس بقرب الحفره مال عنا و كمل طريقه و لما صلى بالمسجد و رجع للبيت قال هذه القصيد اللتي يتشره فيها على اولاده اللي يرسلون معه هذا الطفل العاق ..و يذكر فيها انه تحمل المشاق و المصاعب في البحث لهم عن لقمة العيش و كيف كان يفز قلبه عندما يسمع بكا واحد منهم و يحثهم في هذه القصيده على العمل الطيب و مكارم الاعمال و الاخلاق و الصدق و فعلا لازمه ابنه الكبير بعدها و قام باقي اولاده بخدمته على اكمل وجه حتى توفاه الله ..

قال الذي يقرا بليا مكاتيب *** ياللي تقرون العمى من عناكم
يا عيال شوفوا لحيتي كلها شيب *** و هذا محل لقعودنا في ذراكم
قمت اتوكا فوق عدل المذاريب *** و قصرت خطانا يوم طالت خطاكم
ديّنتكم دين و ليّه مواجيب *** عطوني السلفه جزا ما وزاكم
احبكم و ارطب القلب ترطيب *** و يفز قلبي يوم يبكي حداكم
ياما توشعلت القبايل تقل ذيب *** من خوفتي يقصر عليكم عشاكم
صيور ماهو عاويٍ بيننا الذيب *** لا مت ما افرق طيبكم من رداكم
يا عيال انا ليّه عليكم مطاليب *** نصيحة تبقى الكم من عماكم
المذهب المذهب ترا المذهب الطيب *** ترا ردا المذهب يبور نساكم
و ترا النمامه من كبار العذاريب *** و اكل البلاسه ما يطول لحاكم
يا عيال وان صرتوا ضيوف و معازيب *** ترا الجواب الزين ملحة قراكم

وسلامتكم

ماقصر طيــر شــلوى فــيصل حي والله العين يافيصل



اخي طويل المســرى اتمنا انك وفقت في طلبك يالقرم

وخلنا نشوف

صبحكم الله بالخير ....

هذه قصيده للشاعر جحيش وقد قالها في أبنائه ...
وقصته كما ذكرها الخ الشاعر فيصل ... مشكورا ويسلم


قـال الـذي يـقـرا بليّا مكاتيب
............................. ياللي تقرّون العما من عناكم
ياعيالي الـلـي تشرفون المراقيب
......................... تريضولي وإقصروا من إخطاكم
خوذوا كلام جحيش مـابه تكاذيب
............................ مثل السند مضمون للي وراكم
ياعيالي إن صرتوا ضيوف أو معازيب
............................. ترا الكلام الزينِ ملحة قراكم
تـرا البلاسه مـن كبار العذاريب
................................ وترا البلاسه ماتطوّل لحاكم
تصير بعيون الرفاقه تـقـل شيب
.................................. لامنّه أقبل قيل هذا بلاكم
ياعيالي المذهب ترا المذهب الطيب
............................. وترا ردى المذهب يبوّر نساكم
يـاعيالي مـاسرّحتكم للمعازيب
............................ ياعيالي ماعمر المعزّب ولاكم
ويـاعيالي مـاضربتكم بالمشاعيب
........................... ولا سمعوا الجيران لجّة بكاكم
ياما شريت السمن من عرض ماجيب
................................يفز قلبي يوم يبكي حداكم
يـاما تسعّرت الخلايق تـقـل ذيب
........................... من خوفتي يقصر عليكم عشاكم
أحفيت رجليني بـحـامي اللواهيب
............................ وخلّيت لحم الريم يخالط غداكم
واليوم شوفوا لحيتي كلّها شـيـب
........................ شوفوا محل تخوضعي في ذراكم
قـمـت أتركّى فوق عوج المصاليب
..................... وقصرت خطاي يوم طالت خطاكم
يـاعيالي يـاعيالي عليكم مطاليب
........................... عطوني القرضه جزا ماوتاكم
خوالكم ياعيالي هم ماكر الطيب
.........................ياعيالي مدري هالردى منين جاكم
يـاعيالي ياعيال الخنا كلّكم عيب
............................. ياللي على الوالد كثيرٍ لغاكم
نصيتكم وسنّدت وادي سلاحيب
........................... ولقيت بالرمضا مدا فيق ماكم
ياعيالي بعتوني بصغر العراقيب
............................. ماهي حقيقه سوّد الله قراكم
أطلب عسى نسواكم لاتحمل ولاتجيب
..................... وتغيب شمس الصبح وتعتم سماكم
لابـد مـاهـو عاويٍ دوني الذيب
......................... بالقبر مفرّق طيبكم من رداكم

تسلمون وتحشمون
إن شالله إننا بعيدين كلنا عن عقوق الوالدين ....
فرضا الله عز وجل من رضا الوالدين ...

وتحياتي لكم

جلال الخالدي

[طويل المسرى]

يعطيكم العافيه

أخوي فيصل يعطيك العافيه وماقصرت...
الأخ جلال الخالدي .... الله يجزاك خير وانا شاكر جدا لمجهودك الطيب...
.
.
.
يااخوان الى الآن لاتزال ابيات القصيده غير كامله وبعضها لم يكن بالصيغه الأصليه التي وردت في احدى البرامج التفلزيونيه الشعبيه ... أتمنى من بقية الاخوان المشاركه ... ولكم مني كل تحية وتقدير