الكنّــــــــــه
عذب السجايا وعوده... باول الكنّه
.. متى تزين السوالف... وآخذ علومـه
واسامحه عن خطاة..الجرح.. والونّه
.. واعاتبه.. لو يصدّ شوي.. والومــه
واذكّره باول المسفار... حتّى انـه
.. اليا تذكّر زمان اول... نسى نومـه
يومّانه اقبل خدين الروح يوم انّـه
.. واقبلت اراعيه والقومه هي القومه
من يومها والحشا ماعاد له خَنّـــه
.. الا لصـوته وميعـاده وملزومـه
( عِفري ) هَنَف للضلوع وجالهن حنّـه
.. واستانست له فياض القلب ورجومــه
لبّا جبينه ليا ارتجّ الغطا كنّــه
.. برقٍ يصبّ الرفيف بكبد ديمومــــه
ماقول: شفته؟ وشفت البيض يتلنــه!!
.. اقول: شفته؟ وشفت الشمس منجومــه !!
ماقول: كن الجديل الليل..لا؟..كنّه!!
.. ليلٍ.. خَرَعه الظلام وضيّع نجومــــه
ياقَبلَة الله هكاالعنقود... لى منـه
.. قام يتهجّا شذا عطره... ويشمومــه
فيه انتهى النور!!! لاوالله بِدا منّه
.. فجرٍ نعس بالوريـد ونام بهـدومــه
وردٍ( تفَرعَن حَمَاره) قلت ابا اكنـه
.. الى متى؟ والحنايا منه( مفطومـه )
فَزّ وتطرّق رطيبه قلت : ماعنّــــه
.. بالم شيحِه... وريحانِه... وقيصومِه
صَد وتلعثم هديله في بَرَد سنّـــــه
.. ياقوم ذا النور يوم انكتّ ياقومـه
الله عطانيه.. والله يعطي الجنـــــه
.. واليا استجد الهوى... كلٍ ومقسومه
........ مساعد الرشيدي
تعليق