الواثق الواثق الواثق الواثق ........

هلا باللي تنطّحه القصيد وخانه التعبير ****** ولو بعض الحنين وكلمتين داخل أعماقي
على كثر التغزّل في هواه أحسّ بالتقصير ****** ليا من لدّ بالعين وهنف لي بعثر أوراقي
معه يحلى الكلام إلاّ معه طعم السوالف غير ****** نشانيش الغرام اللي تزفّ إحساسها الراقي
أحبّه كثر ما غرّد ورفرف للصباح الطير ****** وأحبه كثر مشروهي عليه ولهفة أشواقي
عليه الله ليا منه انثنى وأفرد بي التفكير ****** وردّد كل ضلع في الحنايا صفق خفّاقي
جلست أحسب سنين جعلها الله للعمر تكفير ****** على غصن تشتت للهبايب من ردى الساقي
وسقت الرجل يمّه والخطاوي مالها بالسير ****** تخاف الرجل دربٍ شاح وجهه وأعلن افراقي
حبيبي لا يغرّك تحسبن ذيك الجروح بخير ****** أكابر يوم أشوفك وأتبسّم والوجع باقي
فديتك مدّ لي من شمس وجهك للدجى تنوير ****** وقبّضني مجاديف الليالي وازهل الباقي
تعبت من الرموز اللي عجزت ألقا لها تفسير ****** تعبت من السنين ومرّها معاد ينذاقي
تذكّر يوم كان الحلم في ذيك الشفايا صغير ****** كبرت وكبرت أحلامي معاي وضاقت آفاقي
أبي ذاك الصباح وما لحقت إلاّ بقايا عصير ****** وتخطريت الليالي والطريق وهقوة الهاقي

لأخوكم الشاعر / بـ،،،،،ـدوي . أتمنى أن تنال إعجابكم .

[تم تعديل الموضوع من قبل معزب الضيفان بتاريخ 12-21-2000 الساعة 03:42 PM]

بدوي بدوي بدوي بدوي............يابعد الواثق ....سم

هلا والله وغلا هلابك هلا سم فديت خشمك يابدوي...الله عليك بدوي شاعر
star5 -vip نعم هذا هو بدوي صح لسانك...ياشيخ قصايدك في المختلف خلتني اشيل المجلة معي في سيارتي وقصيدك هنا في الانترنت الظاهر بتخليني احط الانتر نت في جيبي ...بيض الله وجهك
يا(مطيع)اللي جابك.
نبي منك اكثر لاتحرمنا منك. والله لايهينك على الاهداء.


اخوك/عبدالله بن فلاح الهاجري

تستاهل يـ( ابو فلاح ) أكثر من كذا ... وأبشر .. القصايد بأكتب مجموعة لا باس فيها ،، في المنتدى قريبا ان شاءالله ...
ولك تحياتي .

.................................أخوك / أبو محمد ..........................................