قصيدة الرد للشاعر محمد بن عبيد الحارثي

السلام عليكم ورحمة الله وبركاته


واسعد الله مساكم بكل خير اتشرف ان اطرح لكم قصيدة للشاعر محمد بن عبيد الحارثي وهي قصيدة الرد على قصيدتي السابقه (رجال دحيم مدهال الفخر ياعز مدهالي ) هذا ولكم جزيل الشكر والاحترام

*********************


انا مانيب ياسلطان لارايق ولا طربان **** ولكن قرّب الريشه وهات الطرس بالحالي



اشوف الناس من حولي احد شاعر واحد فنان **** مهابيل البشر قامت تشوت القاف وتلآلي


ترى ما للقصيد الا رجالاً تنزل الميدان **** ولا مني نزلته بعدم الاول مع التالي


عفى الله عن زماناً راح يوم الشعر له فرسان **** زمن نطّاحة التالي زمن حمّاية الجالي


ليا مني سمعت اشعارهم يهتز لي وجدان **** درر مصيونة المعنى حكم وافعال وامثالي


ماهيب اشعار سلتوحن ليا غنى تقل سكران **** ماغير يقلّب اعيونه حشى 0000 ماهوب رجالي


سفيهن همه المرزام والقلاب والحذيان **** هذا اللي صارفن بالي عن التفكير00واشوالي


الا يالشاعر المرهف00الا يالشاعر التعبان ****طلبتك00تكتم انفاسك ولّد ايمين وشمالي


شف مساعد0 وابن عافت0ونايف صقر 0مع0 ضيدان **** بياطير القصيد وغيرهم شّعار واجزالي


شف ابن دحيم يوم انه قصد بسم الله الرحمن **** جذبني وانجبرت اكتب وانا اللي طاوي احبالي


ابي منك السموحه يافهد00صآحبك ذاقرفان **** يمين الله وعهد الله كتبت بدون ما ابالي


نبي نسلم من المكسور والمجبور والعميان **** هذا اللي مشغلن فكري ومخلف بعض الاحوالي


...... مشاعر شاعرن يطرب اليا اوحى حامي القيفان **** ولا مّنه بغى ينقض ترى ماهوب محتالي


هلا بك يالدحيمي وانت فالك سمن فوق سمان ****ترحب بك بني الحارث شباب وشيب وعيالي


انا اشهد ماكتبت الاّ قصيدن وافين مليان **** زحول بيوت معدنها اصيل وسعرها غالي


لفتني ثايره تزبد تكلم لي بدون لسان **** سمعت اول ثلاث ابيات قبل اقرى000وطوالي


اخذت اقلب المعنى على جمر الغضى مابان **** رميت السمر فوق الجمر الين اشعلته اشعالي


حذفت بوسطه المعنى 00صبرنا ثم طلع دخان **** عرفت العلم كل العلم دون ازعاج واجدالي


وانا قبل اعرف المعنى نخيت ولآبتي شجعان **** ركبت المهره الصفرى معي سيفي وسربالي


تقدم يافهد واطلب على ماتشهد الاعيان ****لك الله مانصيت الا رجالن ترخص المالي


بني الحارث اليا منّه نصاهم هاشل الخليان **** يجيهم دون خاطرهم مواري طيش واهبالي


من اجل الضيف واحدهم يضّحي في حدى الورعان **** اجل وشلون لو صارت حروب وهوش وقتالي


الا كم شيخ قومن نزلوا راسه من الامتان **** الا كم خفرتن تبكي اخوها يوم الاهوالي


فعايلنا تنومسنا ليا من عدّوا العربان **** ومن عنّز علينا يبشر بصملات وافعالي


يمين الله يابو محمد يمينن تنطح الايمان **** لوقف لك عهد وامسك 000هذا البسام واعقالي




محمد عبيد الحارثي

الشاعر فهد ابن محمد

صح لسانك على الا وله وسلمت يداك على نقل الرد وصح لسان الشاعر/ محمد ابن عبيد

قصايد جزله من شعار جزلين

ونعم فيكم وفي قبايلك وفي جميع القبايل

لك تحياتي