فتنة الربيع العربي

وش هالربيع اللي هبوبه حرايق = وش هالربيع اللي معه نار واعصار
العقل طار وصاير الصدر ضايق = وانا في احوال العرب صرت محتار
نصبح وسيف الذبح للناس سايق = يطحن عظام شعوب بالحرب والنار
ونمسي على شوفة عيونن توايق = عيون حره وطفل وكهولن اكبار
قلبي تعب وما بصدري خفايق = تعبت من شوفة علومن واخبار
في سوريا مانسمع الا الشهايق = وفي العراق وتونس وليبيا ثار
ومصر الكنانه في طريق الغرايق = ياناس وش باقي على مصر ماصار
نارن تشب بمخضرات الورايق = خوفي يجي للبيت ماصار بالجار
شرن بشهر الصوم ماهو بلايق = والمسلمين اقلوبهم صارت احجار
وش ذا الفتن هاجت وتصفق صفايق = تصفق علينا اعجاج من دار لادار
يالله طلبتك وانت رب الخلايق = تحمي وتكفي ديرتي فتنه ونار
درب السلامه خير والقلب رايق = من شب نار الشر ماله من اعذار
ماهو ربيع ان كان نبغى الحقايق = هذا خرابن يورث الخوف والعار

صح لسانك يا محمد

والله يصلح الاحوال