الوقـت [ خيـطٍ ] .... والصواديـف أبـره

" مواعيد بكـره "

مصافحة أولى ... علها ترتقي لذائقتكم وتشفع لنا
.
خط القلم جرحي - والاشواق حبره
يبقى الرفيق اللي له - جروحي تجود

الوقت [ خيــطٍ ] والصــواديف أبره
ومن [ وخــزَها ] كلٍ وله قسم معدود

دنيا الفنى تلـــوي علينا ( بمكره )
ضاقت علي ( وخـيط ) الايام معقود

مثلي مثل غصنٍ يضحي بصبره
يفـدي ضـلاله (ما شكى حيل مهدود)

أنا المعنى / وانت قصّـفت عمره !
الجذع يروى والظما لاحــــق العود!

مليت اصارع في مواعيد بكره
واخيـط فـتـقٍ للمـــعاذير ممدود

لا ميئسن منكم - ولاني بمكره !
فيني دبيب من الامل ماله حدود

الخاطر المكسور يا طول جبره
هذي سنه وسنين ما هب لك نود

ما أحتاج من وقتي تجارب وخبره
اخذت منها اللي مقدّر ومشهود

خطـو الـولد لا جاك من دون دبره
مثل الفـــشق لا صار ما فيه بارود

مهما يقـنـن ما يصيب أبه "وبـره
نيــشانها دايم عن الصيد محدود

اللي قنـــاها ما عرف كبر قدره
يقفي ويقــــبل والرجا منه مفقود

مشي الفــتى يبرى المخاطر بصغره
واليا كبر ما ينـلحـق كل مطرود

في رفقت اللي ما ينومسك شبره
ان ما نقص مكيال ما هوب لك زود

من لا يقلك وانت في وسـط عثره
وقت الرخا لو جـــاك ما دق عجرود !

خله وتلقى لك بدال الف عشره
يقسى بهم عودك ويقدح لهم عود

لو كثرت العميان لا عـــاد تشره
تعبْ المقدْي ما لقا منكم الفود

سقف الامل عالي - وشيدة جدره
وطماعتي [ فالمتن ما هيب فالذود ]

أما وصــــالٍ يعــتق اللي بأسره
ولآ سجينٍ دونـه الباب مـــردود . !

.
.
فهد المنصوري

(الدقيس)

مرحبابك يافهد وصح الله لسانك ولانعدمك على هذهِ المشاركة الجميلة بفكرك المطلع