... مرثية شقيق ...

السلام عليكم ورحمة الله وبركاته

مشاركة تعبر عن نفسها

[poem=font="Simplified Arabic,6,#FF001F,bold,normal" bkcolor="" bkimage="" border="none,4,#400000" type=2 line=0 align=center use=ex num="0,#400000"]
هذي ثمان سنين حسبه وتحسيب = وانا فتوق جروحي اوساع واكبار
اقول مع طول الليالي يبا يطيب = حالي واشوفه كل يوم ابتحدّار
مرحوم يا راسٍ حوى كامل الطيب = يا الله عسى مثواك جنات وانهار
مثلك فقيده يا عطيب المضاريب = لا شك حكم الله وتصريف الاقدار
ما فالقضا شكٍ ولا فالقدر ريب = ما قدر المولى علينا جرا وصار
ارزاق خلق الله على عالم الغيب = وآجالهم بيده طويلات وقصار
والله خلق كلش بحكمه وترتيب = وعند المصايب من صبر فاز بالكار
ويا خوي من بعدك دموعي سواكيب = وكن الحشا يسهج بحربه وشنكار
وكنّه تخالف به رماح وكلاليب = ويرجف كما رجف الطبل ليلة الزار
ويا خوي من بعدك جروحي معاطيب = والقلب من بعدك تفطّر تفطّار
والجوف تلعب به سموم اللواهيب = ويقطّع عروق المعاليق منشار
بديت في رحلة متاهه وتغريب = وعلى طريق الهم قلب العنا سار
لولا الحيا والله لقنب كما الذيب = واهج بهمومٍ طوتني من الدار
غدت لي همومي ضيوف ومعازيب = انا الضحيه والحزن زند جزار
عليك يا راع الونس والتعاجيب = يا كاسب الجزلات يا واف الاشبار
يا درع جنبي لا تحدو لجانيب = ويا عزوتي حزات زوغات الابصار
خوتك مكسب . والردي خوته عيب = خوتك تاج . وخوته للوفي عار
ما سرت بدروب الردا والعذاريب = ولا اشتكى منّك رفيقٍ ولا جار
ولا كليت اعراضهم بالاكاذيب = وما انته برعديدٍ ولا انته بثرثار
وما انته بنمامٍ يحش العراقيب = ما بين قيل وقال وشهو ووش صار
وبين الجماعه ما تشب المشاهيب = ولاْ شربوا بسبة فعايلك الامرار
وتخضع لشيبانك جناحك بتهذيب = وياالله عسى برك شفيعك عن النار
تخضع الـ/راع الصلب وراع الترابيب = لين انهم رضيوا عنِك سر وجهار
وعسى الله الـ/دعواتهم سمْعْ ويجيب = يدعون لك سر وجهر يا الوفي البار
ما شفت منك إلاّ محبه وترحيب = أخوتك فزعه وحشمه ومقدار
والحال واحد والتكاليف والجيب = والراي واحد عند تقديم الاشوار
انت الاخو اللي يرفع الراس ويثيب = وخطوا لخو يامال قصّاف الاعمار
ما كل ولْد امٍ يصف المشاريب = لخوان فيهم من يجرعك الاكدار
علة زمانٍ ما يعرف المواجيب = ما بين نار تصير باسبابه وغار.
ما انساك لو الزير يدله عن كليب = ودام الحرم ينصاه محرم وزوار
وما دام به رجلٍ تذب المراقيب = وما دام يذكر فيه طرقي وعبّار
وما دام يكتب بالقلم فالمكاتيب = وما غرد القمري على روس الاشجار
وما تغيب عن عيني ولو زولك يغيب = حفرت بافعالك مكانه وتذكار
ارّثت طيب ورحت منا على طيب = ما ارّثت لا درهم ولا ارّثت دينار
والعمر يطوى والليالي تجاريب = والموت يطلبنا كما طالب الثار
الموت واحد لو تعدد لساليب = ما يرحم ضعيّف . ولا هاب جبار
ومن حان وقته كلبشته المقاضيب = ماله مفر. لو نط. لو سار. لو طار.
ويا شيب عيني بعد فرقاك يا شيب = ويا صرم حالي عقب فرقاك يا البار[/poem]

وسلامتكم

عبدالله بن عايض بن رده الفهري

الله الله

يابو بندر


وصح الله لسانك

والله يغفر له ويرحمه


تحيتي وتقديري

عبدالله

الله يرحم موتاكم و موتانا و موتى المسلمين

قصيده مؤثره و من القلب

صح الله لسانك

عبدالله ((صــح لسانك))


والله يرحم موتاكم وموتى المسلمين اجمعين


عز الله انها قصيده مؤثره.


الله يرحمة ويسكنه فسيح جناته آميــن يارب العالميـن.

عبدالله يا مال الطيب


هذا الوفاااااااااء


رحمة الله عليه رحمةً واسعه


لله درررررررك يا عبدالله


مودتي

ارحب يااااااااااااابو بندر

والله يرحم اخوك والله يعوضه في حيااااته بالجنه

ويصبر قلوبكم

وصح الله اللسانك

الله يرحم موتاكم وموتانا والمسملين

عبدالله صح الله السان معبره



تحيتي

ابو نواف

صح لسانك وعسى الله يحسن عزاك ويرحم اخوك واخوانا المسلمين في هالشهر الفضيل

الله يغفر له ويرحمه ويسكنه فسيح جناته
وصح لسانك يابوعايض على معلقة الرثاء الجزلة