Tweet
/
.
البارحه هبت على الأفكار نود
.........انسامها نفحه من الجوري وكاد
ساقت عليّه ديمةٍ تنثر ورود
.........ورفت عيوني بعد ماطال السهاد
في ليلةٍ ترقا بي اشعاري سنود
.......منها تجاوب هاجس حروفي وعاد
من عقب ماضنيت بإنه مايعود
.......صدمه وعدت والجروح بلا ضماد
مرت عليّ ايام شفت البيض سود
.......واسرارهــا علامــها رب العــباد
تسابقن حروفي الشرّد وفود
.......لامن كتبت الــبيـت جنّي بإزديـــاد
خيم عليّ الشعر في لحظة ركود
.....مدري ركود إعجاب وإلا الشعر ساد
اسج واسرح في خيال بلا حدود
.......كل مابغيت اوصل نهــايه فيه..زاد
اطرد سراب افكار واوصلها وازود
.......واحط لي فــيها عــلم وابني بـــلاد
نسيت بإني فرد في هذا الوجود
......تشيب بي فكره والأخرى في المهاد
احيان احس بداخل إحساسي جمود
........واحيان حسي ينقدح مــنّه زنـــاد
اروي كبودٍ ضاميه واجرح كبود
.......واكتب على كف العتب ياويش عاد
افضل مشاعر لااعترض قدمي حسود
...........انثر حروفي وسط عينه كالرماد
ولاّ ليا من شفت من غالي صدود
..........ابيع تاريخه واســوي له مـــزاد
إن كنت انا الغلطان نقاض العهود
...........يبشر بما يرضيه لو طال البعاد
وإن كان مقفي ماله بصدري قعود
...........إبعاده اكبر من حدود الإبتــعاد
قلبي جبل من هيبته يصنع جمود
..........ماقــد خبرته لـــين إلا بالعــناد
الصد والهجران من طبع الجحود
.....والزرع تعّرف قيمته عند الحصاد
الله يقطع صاحبي كانه شرود
.......لاغاب عني فالمواقــيف الشداد
الجود جود اللي بوقفاته يجود
.......وقت الرخا جايد وبالشده جواد
اشجع رجل لاصار للعليا يقود
...واضعف رجل لاصار من غيره يقاد
بعض البشر فوق البسيطه كالأسود
.......وصقور في كبد السمى عند الهداد
وبعض البشر لامنه لا نفعه وفود
.......ولا يعشق الا الظل وأنسام البراد
وبيت الشعَر مايرفعه غير العمود
.........والطيب مثله مايقوم إلا بعماد
هذا الكلام اللي من الراس معدود
........عشته بليلٍ سرمدي على إنفراد
من عقب ما هبت على الأفكار نود
........ورفت عيوني بعد ماطال السهاد
/
\
.
[/align]
تعليق