Tweet
----اٍٍٍٍٍٍٍٍٍٍٍٍٍٍٍٍٍٍٍســــــــــــــــتـــــغــفـــر الـــــــلـــــــه----
-------------------------------------------------------
على ذكرى الجروح وغفوة النايم وضيق البال
ــــــــــــــــ فرشت بساط همي بين بدر الليل ونجومه
وبدت لعبة هواجيس الدهر تضرب لي الامثال
ــــــــــــــــ على آخر جروح الوقت والمقهور وعلومه
وقدعت السم وأسهرني من ادلال القهر فنجال
ــــــــــــــــ وبديت استغفر الله .. أحسد النايم على نومه!!
وأنا ناظرك يانواف وشكيلك رداة الحال
ــــــــــــــــ كذا من لوعتي لو كلمتـي ما هي بمفهــومه
وأنا عيني عليك تكرّر النظره وطيب الفال
ــــــــــــــــ على العـز وعلى المجـد وعلى الماجـوب وسلـومه
وأنا يابوك عايشت القهر في كافة الاشكال
ــــــــــــــــ وأنا اللي مـن يديـه أدمي حشاه وركـز سهـومه
وأنا يابوك ماني من رجالٍ يعبدون المال
ـــــــــــــــــ أنا رجلٍ ليا جات اللوازم صان ملزومه
وأنا ما ملت يوم ان الزمان بكل حمله مال
ـــــــــــــــــ على نفسٍ من أقرب مالها بالارض مظلومه
وأنا سميتك إسم اللي عليه نطـّري الافعال
ـــــــــــــــــ على اللي ليت ربي كاتبٍ يومي قبل يومه
هذاك أبوي صج ولو يسمى بالنسابه خال
ـــــــــــــــــ عسى روحه من أهوال القبر والنار مرحومه
وأنا بوصيك يانواف عن تبـّاع قيل وقال
ـــــــــــــــــ ترى نقل الحكي خصلة ردى بالرجل مذمومه
وعليك بطاعة الله والصلاه وصحبت العقال
ـــــــــــــــــ وحج البيت والشهر الفضيل إن وافقك صومه
ولا تستحقر العالم… ولا تخضع مع العيال
ـــــــــــــــــ ولا تجزع من الاقدار.. والارزاق مقسومه
ولا تغويك نفسك وعرف انك بين جال وجال
ـــــــــــــــــ وترى ماكل سباحٍ يطب البحر ويعومه
ولاتشكي على العالم.. ترى مايشتكي رجال
ـــــــــــــــــ وترى الشكوى لغير الله يانواف محرومه
ولو حاجتك بيدين ال*** لاتقرب الانذال
ـــــــــــــــــ ترى الانذال عن فعل الردى ماهيب معصومه
ولا تغتر باللي .. لابسٍ له غترةٍ وعقال
ـــــــــــــــــ عليك بجوهر الرجال لا تغتر بهدومه
ولا تمشي طريقٍ تجهله لا ضاقت الاحوال
ـــــــــــــــــ ولا تمشي بليا خطةٍ للدرب مرسومه
ولا تضحك على المبلي ولا تستغفل الجهال
ـــــــــــــــــ ولا تحسب حرار الجو تعطي قدر للبومه
ولا تركض ورى الموظه ولا ترقص على الموال
ـــــــــــــــــ ودوّر للرجال اللي تطول المجد وترومه
واذا صدرك حوى سر العرب لا ترسل المرسال
ـــــــــــــــــ ترى خير النفوس اللي على الاسرار مكتومه
واذا جاك المسير شب نارك وضبـط الفنجال
ــــــــــــــــــ ولا تهرج معاه بهرجةٍ ماهيب مهضومه
وقـدّم ماتيسـر من عطى رب الملا المتعال
ــــــــــــــــــ وحق الضيف فرض وسنةٍ للناس معلومه
وعليك بطاعة امي واخفض بصوتك ولا تختال
ــــــــــــــــــ رضاها من رضايه يا حديث القلب وعلومه
وعليك بطاعة امك امك اللي مالها امثال
ــــــــــــــــــ وطاعتها عليك بملة الاسلام محتومه
وأنا يابوك وحداني ما بين الحل والترحال
ــــــــــــــــــ وليامني جزمت أقوم للقومه هي القومه
رفعت بهامتي فوق السحاب وزدت بالمكيال
ــــــــــــــــــ وبو بلعوم خليته يموت بسم بلعومه
وعساك تنفّـذ اللي قلتلك وتحقق الامال
ــــــــــــــــــ وشوف اللي معاديني يموت بكثرة همومه
هذا ما جابته ذكرى الجروح وضيقةٍ بالبال
ــــــــــــــــــ على بساطٍ فرشته تحت بدر الليل ونجومه
وســــــــلامــــتـــــــــكـــــــــم
تعليق