إلى كل من غمرني بالحب

اسعد الله أوقاتكم جميعا

عباة الليل تنقشها النجوم وخدك الوضّاح 000 وسميناك ميلاد الهوى يا اول مواعيده



علي اقبلت يجذبك الغرام المبعد المنزاح 000 بعد غارت خيول المهتوي وأومالها بيده



الا يامرحبا والسالفه ليل وراه أصباح 000 يعاجلك النهار بشقة ستــــــاره وتبييده



فلا تامن زمانك لو بكاك بدمعة النواح 000 تراك آخر ضحايا الوقت ومن آخر مواليده



تنثر في زوايا المجلس المترف ولا ترتاح 000 الين أنشدك عن حكم الهوى وتقول ياسيده



ترانا معشر العزه ومنا نجدة الصياح 000 نورد شاكي المضماه ونصـــفي مواريـــده



ربع ساعه نصف ساعه تروح وخاطرك منساح 000 وتجلى شرهة الخاطر وتسلم مـن مناقيده



أسافر في طرف عينك دروب ترهق السواح 000 واغني لك على طرق الغلا موال وآعيـده



الين الغصن الأخضر ينثني ويميل التفاح 000 يقولون اللــــقا عقب البطا هذي تقاليده



لريعان الصبا نشوه تضاهيبك نديم الراح 000 ولو إنك تعصى ما يشاه القلب ويريده



سكرت من الهوى وحده بوحده والقلوب صحاح 000 وراسك في محله معتلي ومشرفه جيده



صباح الخير صفينا الحساب وكل شي راح 000 عسى الله يستر الساري من الليل ومقاريـــده




( مشهور )

[تم تعديل الموضوع من قبل مشهور الخيّال بتاريخ 01-29-2001 الساعة 02:31 PM]

حياك الله يامشهور

الف شكر لتلبية طلب أخوانك ما قصرت

هلا والله بمشهور حياك الله

بين اهلك وربعك يا هلااااا

كتبت فابدعت في نظم الحروف

صح لسانك وسلمت يمناك .

لك مني كل تقدير على ما خطته اناملك الذهبية

الأخ مشهور الخيال
كلماتك تتراقص بينها شجون ومشاعر لاهبة شكرا لك على هذا الأبداع
اخوك الجازم

بسم الله الرحمن الرحيم

عين العقل يامشهور ..

والا كيف تترك ناس تحبك وليش ؟؟

مبدع يا مشهور

اتمنى تعديل البيت الخامس

تنثر في زواي المجلس المترف ولا ترتاح 000 الين أنشدك عن حكم الهوى وتقول ياسيده


تنثر في زوايا وليس زاوي ربما غلطه املائيه

صح لسااانك يا مشهوور ولا هنت ,,,,,

قصيد وافي وطيب مثل رااعيه ,,,,

مشكور على تعطيرنا من طيب شعرك ,,,,

تقبل تحياتي ,,,,

اخوك : ابو الاصاله

تسلم يخوي مشهور القصيده أكثر من رائعه

عجبني هذا البيت جدا
سكرت من الهوى وحده بوحد والقلوب صحاح 000 وراسك في محله معتلي ومشرفه جيده

ياسنايدي يابو خيال

رجعت الينا ورجعت بقوة مع هذه القصيدة ابحرت بنا الى عالم الشعر

تحيه صادقه مني

اسعد الله مساك يا مشهور والطيب ما يجيب الا طيب

قولن ماعليه كلام ولا ملام

صح الله لسانك بس يخوي ما كنك مقصر شوي
ترانا عطشى على تذوق قصيدك

تحياتي اخوك
طير شلوى

الشاعر مشهور مشكور على تعديل البيت واللهكما توقعت انه غلط مطبعي

اخوي ترانا مثل ما قال:

عطاشا عطاشا

[الطرقي]

الشاعر مشهور

غمرتنا بالابداع كما غمرناك بالحب

تحيه صادقه

شكرااااااااااا ايهااااااا المبدع

يمرحبا فيك يامشهور

اهلا وسهلا فيك يا مشهور والله يحفظك ويامرحبابك بعودتك بين اخوانك



************
حسب القوانين والساير ..... الي عليه العرب يمشون


جينا لاهل المنتدى نساير.... اهل الوفا بالوفا مضمون

**************

طلال الاحمدي
جــده

والله مادري وين هالقصيده منخشة مني , مع اني متابع المنتدى اول باول صح لسانك يامشهور 0
بس ودي اعرف من انت 0 رغم اني متوقع شخص والظاهر انه انت0
على كل انا ارسلت على بريدك من انا شاك فيه

وتسلم مره ثانيه
الغازي