السلام عليكم ورحمة الله وبركاته
صباحكم سعيد
هذه قصيدة في احد الثقلاء... وما ادراك ما الثقلاء
لااعتقد ان فيه احد سلم من اذاهم ... الله يكافينا شرهم وان لايجعلنا منهم
اتمنى ان تنال القصيدة ولو على حيز بسيط من اعجابكم
وان تكون خفيفة دم على قلوبكم
بعض العرب دمه ثقيل
...................... كنك معه في مقطعه
اثقل من جبال السراه
..................... وشعابها المتفرعه
اللي يبي تكفير ذنب
.................... يجلس ربع ساعه معه
الثانيه في حضرته
.................... مثل سنه في قوقعه
تضيق بك وانته معه
................... كل الجهات الأربعه
موهوب في رسم الطريق
................... للضيق من عقب السعه
ومن ثقل دمه يعتقد
................... مواهبه .. متنوعه
ليا ضحكت مجامله
................... يفكر انك تشجعه
ان قلت عاقل محتمل
.................. وفيه احتمال انه امعه
بس الأكيد ان الحظيظ
.................. مايبصره ..ما يسمعه
لو تحذفه وسط البحر
................. يجيك بكره يدفعه
ويقول انا لاأستطيع
................ ان اهضمه .. ان ابلعه
شوفه يسبب لك شعور
................ ان الحياه مروعه
وان الليالي مقفيه
................ وان السنين مودعه
وان الطيور الطايرة
................. لابد يوم موقعه
وان النهاية مؤسفه
................ تحت تريله مسرعه
لو تذكر اسمه عند ذيب
................ تجيه اعاقه ف أربعه
على الهوا يعطي دروس
............... وقتك شلون تضيعه
هو مخترع سم الكبود
............... ومورده من مصنعه
ويحط لمساته عليه
............... ويغلفه .. ويوزعه
أشك في ثقب الأوزون
............... انه تسبب وفقعه
وانه سبب حرب الخليج
.............. واساس كل الزعزعه
ويمكن لو انه يلتفت
.............. للنيل وقف منبعه
ولو يلتفت يم القمر
................. يمكن يغير موقعه
جلسه معه وهو نشيط
.................. ياعنك ما هي ممتعه
امه خذت مقلب كبير
.................. ترجي وراه المنفعه
لو انها عنه درت
.................. من بطنها ما تطلعه
او انها يوم بلشت
.................. من ثديها ما ترضعه
الله يفكه من بلاه
................. ولاّ انه عنا يقلعه
ولاّ انه يسلط عليه
................. ويطيح له ف مقلّعه
تعلمه كيف الأصول
................ ان طاع ولا تصفعه
الناس ماهي فاضيه
................ للشوشره .. والقرقعه
____________ تمت ______________
مع تحيات اخوكم هملول
[تم تعديل الموضوع من قبل هملول بتاريخ 08-18-2001 الساعة 09:14 AM]
تعليق