عذراً حبيبي
عذراً حبيبي .. تراني ما تجاهلتك
كلي معك من شعر راسي .. ليا اقدامي آسف إذا ما انتبه قلبي وهملتك
مشغول بك ياحبيبي وانت قدامي
شفتك وسرّحت يوم إني تأملتك
سافرت في زينك اللي حاصر احلامي
في نون عيني عن عيون البشر شلتك
تنام فيها وجفني عنك ما نامي
أشغلتني في حلاك وطافت اسئلتك
=ما اوحيتك إلا وكفك يجذب اكمامي
وصحيت بك بعد ما ازعلتك ومللتك
=واسرجت خيلك وشبت شعلة خصامي
روق ترى الضيقه اللي فيك جملتك
وانته ما تلام وأنا فيك ما اللامي
وأنا أدري إني بغير القصد زعلتك
واحمرّت اوجانك اللي طبعها حامي
كل شي ولا زعلتك واخسر مقابلتك
وابشر نراضيك رضوه تروي الظامي
مير انت لا تبتليني يوم دللتك
يكبر تغليك وآنا فيك مترامي
ما بين ليلك .. وشمسٍ سحر جللتك
والمبسم اللي غدا من عظتك دامي
والدعّج اللي ما بين الخلق فضلتك
واعطتك ميزه ما بين زيون الانامي
لمسة حلا عن جميع الغنج كملتك
زينك محطم بحسنه كل الارقامي
مير التغلي يخليني ليا طلتك
ميت صبابه واعوض سالف ايامي
واللـَه ما طبت حتى إني تغافلتك
ورويت من منهلٍ برّا لي اسقامي
محمد بن حمدان المالكي
تعليق