السارق المزاح

السارق المزاح

رجلٍ مدحته ما هو بكفو الامداح
وارخصت في مدحه سنا كل غالي
جانا بعد هذا جحودٍ ورماح
كشّر عن انيابه ورد الجفا لي
كان يتلون لي ويخفض لي جناح
لا حدته شمس الضحى في ظلالي
بالصف الاول مرتكي وقت الافراح
ياكل من اكتافي ويشرب دلالي
والحين يوم اصبح في البحر سباح
رد الوفا نكران واقتادها لي
والمشكله ما ني منه صرت مرتاح
يكسر مجاديفي ويقطع حبالي
لا هو رحل عني ولا هو بنصّاح
يشذب عراقيبي ويطعن خيالي
وإن طاح بيدي صار سارق ومزاح
يلعب على الحبلين طول الليالي
يا السارق المزاح غدرك لنا فاح
خلك على دربك ودربي لحالي
صدقني اللي مثل شرواك لو راح
يفرح بها قلبي ويرتاح بالي
قدرك يابو وجهين في خاطري طاح
لعبتك ما تمشي على اصغر عيالي

محمد بن حمدان المالكي

29- 12 - 1427 هـ - الرياض

صح لساااااااااااااااااااااااااااااااانك يا محمد


نص جميل وحكيم


دمت بود وحب

مشكور أخي المشاوي على زيارتك الكريمة