Tweet
مدخل
==========
الدهر ماخلف الا الذاريات من الهبايب
======== كل ما جمعت هقواتي على جاله نثرها
=========== كسرة السكر =========
الهموم اللي تمر الذاكره مثل السحايب
=== مابقى جرح قديم ولا جديد الا سهرها
درهمي يا الذاكره مادرهمت عيس الركايب
=== دام هاجوس الدهر لامرت الذكرى عبرها
اجمعي باقي شتاتي جعل حظك للذهايب
=== كان دورتي على التركه وما خلف دهرها
الدهر ماخلف الا الذاريات من الهبايب
=== كل ما جمعت هقواتي على جاله نثرها
وكل ما لاحت لي الفرحه وقلت الحظ طايب
=== لاقت الفرحه قبل ترقص على شفاتي قدرها
الزمن والحظ رزو فوقها حدب النصايب
=== واحد جهز لها التابوت والثاني قبرها
باتصبر دامني مانيب وحدي في المصايب
=== مثل ناس حظها في ساعه الحاجه غدرها
كم على غدر السنين القشر فاضت عين شايب
=== وكم عجوز خنجر الدنيا تركت في ظهرها
يابيوت الشعر وردتك على سوقي جلايب
=== ياكسبها من شراها ياشراها من خسرها
يابيوت الشعر سخرتك لعين ام الذوايب
=== وحدة لاقلت الكسوه تذرت في شعرها
ون تجلت بالحلا كن القمر ماكان غايب
=== ون بدت للصبح كن الشمس تشرق من نحرها
بين شفتها عناقيد الحلا والشهد ذايب
=== وبردي كسرة السكر هبت له من كسرها
رايب في عينها من ذابح العشاق رايب
=== شغلته لاكثرت العشاق زود في قهرها
طرفها الناعس كثافه رمشها عنده سبايب
=== كنها كسلانة لامن بغت تلفت نظرها
وردت قلبي حياض الحب وراد النجايب
=== فوق عد ديرته ماطب فيها الا مطرها
والغرام اللي سكن بالنفس وراها العجايب
=== واشهد انه سم كبدي سمها حتى فطرها
والهموم اللي توالت نوخت عيس الركايب
=== والجروح اللي تشالت ما تشالت من سهرها
======= ناصر علي الحارثي (هداج ) =====
ــــح
تعليق