Tweet
انتي اجمل من صباح السالفه وارض الكلام
انتي اغلى من بياض القلب وانتي بسمته
ياهلا بك من هنا لين اولك لين الختام
ياورود ٍ علمت قلبي يضج بهمسته
ان نثرتك في يدين الحلم .. ناداني المنام
وان زهمتك ينتثر قلبي على اول غلطته
يامشاعر غيرت تاريخ عشقي والهيام
يارياح ٍ تشرح لدربي معاني عثرته
لا النظر كان العيون ولا الزعل وجه الخصام
ولا الحكي دفتر سنين ٍ مات داخل كلمته
انتبهاتي لطرفك .. وانفعالاتي سلام
وارتباكي في حضور الشعر كنتي حزته
كل ما اجلس بين سمعك والنظر غار الغرام
من وجودي في وجودك .. خايف احرق شمعته
استعنت بطاير اشواقي يحد ّ من الزحام
وانتهى بي كل شوق وغرقتني زحمته
الله اعلم وين رحتي بعد ترتيب الوئام
والله اعلم وين انا ؟؟ يوم الهنا .. انتي قصته
كبـّلي طول المسافه واكسري خشم الحرام
واقهري برد الليالي وارسمي لي دمعته
لا اظطراباتي حقيقه ..لا ارتعاشاتي وسام
كانه اخفق هالخفوق ولا ارتقى بك شطحته
كيف ابوصف لك هواك .. وكيف اغرد باحترام
وكيف اقول اني جعلت الليل يرشي ظلمته
كيف امازح هالطريق اللي عطا قدري .. خطام !!
وكيف اقول لبعد بكره : ليلة البارح جته !!
فهميني ياوهج صدري .. ترى الغيت النظام
من حياتي ياحياتي .. وانتي اللي شتته
لك حروفي .. لك ذنوبي .. لك غرور الانتقام
لك بداياتي وجهلي .. لك نهاية خطوته
لو حدث في ضجة الواقع ولو : همـْس ارتطام
لوّحي باصدق حلوفي .. واحلف انك سبـّته !!
ماعلى ادراج الرياح ان صدّك جنوني .. ملام
ولا على جنوني ملام .. ان بان فيني حرته
لا بداياتي قصيد .. ولا النهايات انهزام
ولا اعتذاري عن هواي .. ورود .. كونك شوكته !!
اقتحمتك في سنينك واكبر الظلم اقتحام
لكن اللي فزت فيه : الحرف ذاك ورعشته
لو تواريخي سوالف كان اسولف للأنام
عن غياهب حبنا اللي كنتي انتي لذته
لك مطاراتي مدرج .. كل كلـّي لك مقام
ياعسى طاب المقام اللي كسيتي فرحته ؟؟
وان تغليتي علي ّ ولا اعجبتك ارض الكلام
ويش عذرك من بياض القلب ؟ وانتي بسمته ؟؟
....
الباريسي
تعليق