Tweet
بسم الله
00000
000
0
00000
000
0
[poem=font="Simplified Arabic,5,black,bold,normal" bkcolor="transparent" bkimage="http://www.alnadawi.com/vb/images/toolbox/backgrounds/20.gif" border="double,4," type=0 line=0 align=center use=ex num="0,black"]
البارحه هبّت عليّ الهبايب = من كل حدب وصوب والقلب ذايب
وقرّرت احضّر كل من كان غايب = وجاني بشير الشعر عجله خطاويه
,,
ورحبت فيه وقلت حيّاك حيّاك = اعْداد ماتمشي على الأرض بخطاك
اقلط صَدر بالصّدْر حطّيت مركاك= واعرفك دايم لازمك ماتخلّيه
,,
واشعلت قنديلي بعد كان طافي = وشيّدت لحروفي كبار المرافي
وابْحرت في بحر الشّعِر والقوافي= وخطّيت قافٍ سامياتٍ معانيه
,,
الشعر وِهْبه يوم ربّي وهبني = غيري يديه تْهد ويديّ تبْني
أظهرت له ودّي وودّه غلبني = ومن فضل ربّي معتلي في مراقيه
,,
وياسامعٍ بيت القصيد المغنّا = ياللي على أرض القداسه تجَنّا
العلم جاك وردّد العلم عنّا = علمٍ صحيح وجاك من راس راعيه
,,
السيف يبقى سيف لو في جفيره= ومالي ومالك يالقناه الحقيره
حنّا الرجال اهل السيوف الشطيره = وارض الوطن بالدم والروح نفديه
,,
حنّا هل الطالات حنّا هل العز = مثل الجبل راسي ولايوم يهتز
كم واحدٍ لامن سمع باسمنا فز = واللي يعادينا من المر نسقيه
,,
حنّا خِلِقْنا احرار من نسل أحرار = وخيولنا تجتاح في كل مضمار
مانقبل الذلّه ولانقبل العار = طبعٍ لنا باوّل زمنّا وتاليه
,,
حنّا لنا الإسلام دين وشريعه = نَرْفع عَلَمْه ودايمٍ بالطليعه
والامر بالمعروف فينا طبيعه = واللي جَنَح فالدرب حنّا نقديه
,,
حنّا سعوديين أصل وفصيله = ويديننا ماهي يدينٍ بخيله
يوم انّْ ولد اللاش يخفي حصيله = حنّا نِمدّ المد والمد نوفيه
,,
عشنا بخير بدولةٍ كلّها خير= دوله ولا كل الدول دولةٍ غير
يامن بها الخايف ويشديبها الطير = ومن لاذ بِحْماها عن الغير تغنيه
,,
دوله على التوحيد شيّد بْناها = خيّالها اللي بالسيوف احتماها
جاها وحيّه يومه اقبل وجاها = قامت تغطرف له وقامت تحيّيه
,,
ومن حبّه ابْها ذاد بالسيف عنها = ودانت لبو تركي غلا واحتضنها
وحدّد طوارفها وعمّر مدنها= ومنها وفيها المجد وثّق عراويه
,,
واليوم في ظل المليك المفدّى = خادم بيوت الله نِعْم المبدّا
راهن على كل القلوب وتحدّا = ولافيه قلب الا يحبّه ويغليه
,,
نِعْم الزعيم اللي يقود المسيره = صقر العروبه ابن صقر الجزيره
اسمه يردّد بين ديره وديره = رمز الفخر واكبر فخر نفتخر فيه
,,
واذكر من المرات والصف مصطف = والكل لمشاهد مليكه توقّف
وقّف بجنبي شايبٍ قام يهتف = وقال الله يحَفْظه ملكنا ويحميه
,,
وردّدت مَعْه امين آمين آمين = وردّد معي مِن كانوا يْسار ويمين
داعين له ولخالق الكون داعين = والله تكفّل بالإجابه لداعيه
,,
والياذكرت المجد والجود سلطان = كفّه عطاها مثل همّال الامزان
( وغلطان مِنْ لاحب سلطان غلطان ) = قول الامير اللي بديعه قوافيه
,,
وحكامنا حكام وعيال حكّام = أهل الفخر والمجد وحْماة الاسلام
واحدهم يْعادلّه الفين ضرغام = وتاريخهم مجدٍ للاجيال ترويه
,,
قلته وعندي شي ودّي اقوله= ولاهمّني ناسٍ عليّه زعوله
الدرب واضح والجمال معقوله = والحق يِقْنِع كل عاقل ويرضيه
,,
إليا متى نصبر على الجور والظلم = والواقع الميئوس ايْشابه الحلم
وحنّا ندوّر سِلْم مع بايع السلم = اللي يخون العهد والغدر يبديه
,,
أكبر قضايانا قضيّة فلسطين = اللي لها اكثر من ثمنيه وخمسين
عامٍ وعيّا وضعها البائس يزين = وفي كل يوم الها فقيده وترثيه
,,
ومن بعدها أرض العراق العريبه = صارت من يدين العروبه سليبه
وقام الصليبي يركز بْها صليبه = ومن دم اهلها قام يَخْضب أياديه
,,
واليوم في لبنان شفت الفضايح = شعْبٍ يموت وصايح القوم صايح
وكم نايحه ناحت وكم ناح نايح = وماكن به آذان للصوت توحيه
,,
هذي مصايب والمصايب توالت = واعدائنا بالظلم حطّت وشالت
كالت وضدابناء الاسلام كالت = كيلٍ يفيض بحقد والحق ماليه
,,
ويامدوّرين الحل عندي لكم حل = درْب الهدايه غير عن درب من ظل
ومن حس بالرمضا يدوّر على الظل = ومن لايعرف الصقر بالنار يشويه
,,
الدين عز وعز الانسان دينه = وحباله حبالٍ جويده متينه
اتمسّكوبه واتركوا تاركينه = وناجوا كريمٍ ينصر اللي يناجيه
,,
وهبّوا للم الشمل والشمل لالْتمّ = يبري جروح الروح ويوقّف الدم
ويزيل عنا الضيق والهم والغم = ولايطمع ابْنا اللي خبيثه مساعيه
,,
في وقتها ننْسى الخطوب الفواجع = ولاعاد يبْقى في جسدنا مواجع
ونقول راجع مجد الاسلام راجع = مجدٍ شفيع الخلق بيديه بانيه
,,
وختامها لامن غدا الصوت مسموع = قل قالها شاعر وله جذع وفروع
طوّع بيوت الشعر في مامضى طوع = ستين بيت وخاتمتها على ايه
,,
[/poem]
تعليق