Tweet
[frame="9 80"][poem=font=",4,#8b0000,bold,normal" bkcolor="" bkimage="" border="groove,1,#8b0000" type=0 line=0 align=center use=ex num="0,"]
نبدا بذكر اللي جعل شمس وظلال=الله كريم وذكر ربي يدومي
يا الله يا ربي بحسنات الأعمال=يا رب عنا بالعبادة نقومي
سبحانك الوالي وتعلم بالأحوال=ذنوبنا كثر الحصى والنجومي
نسألك غفرانك ورحمتك في الحال=يا هازم الأحزاب مجلي الهمومي
تفني لك أجيال وتخلق لك أجيال=والأرض تحييها بوبل الغيومي
شديدٍ عقابه على كل من مال=يمهل ولا يهمل عزيزٍ رحومي
عاد وثمود راحوا اذكار وأمثال=وفرعون في قومه قوي العزومي
كم معجزاتٍ جاته ألوان وأشكال=ونفسه على أهل الحق قامت تزومي
فاغرقه في وسط البحر ربنا العال=هذي عبر للي عرف اليمومي
فلا تأمن الدنيا ولا كثر الأموال=لابد من يومٍ تصيب السهومي
وترحل عن الدنيا وعن كل الأزوال=مجردٍ ما معك حتى الهدومي
فأحرص على دينك ترى الوقت لا مال=ما ينفعك منهو يطيح ويقومي
دنياك لو زانت وتقبل لك اقبال=ترى المنايا فوق راسك تحومي
اللي نزل واللي عن الدار رحال=والموت يقرب كل مافات يومي
لابد لك موعد بقصاف الآجال=واللي زرع يلقى حصاده لزومي
ما تأخذ إلا اللي تقدم من أعمال=في جنة أو وسط نار وسمومي
يا خالقٍ خلقه وكلٍ بمنزال=نسألك يا رحمن جزل القسومي
دنيا مشاكلها عريضات وطوال=تسقي عسل وأمرار شري وسمومي
دنياك مهما صار همٍ وغربال=يااللي ورى دنياك تسعى وتومي
ترى القمر لو يكتمل يرجع هلال=ومن لا ادرك العليا ردي العزومي
ومن طاب له ذكرٍ ولو كان قد زال=والا الردي عايش وكنه معدومي
والعشب ما يطلع وواديه ما سال=والناس به معطى وفيه محرومي
للطيب رجالٍ وللعرف رجال=والسيف ما ينفع كثير الثلومي
لا ضاقت الدنيا بك وحدك الجال=أنص الرجال اللي تسد اللزومي
مجربه ماهيب قولٍ بلا أفعال=ولا يغركم زين الغتر والهدومي
للذيب منزالٍ وللنيص منزال=والفرق واضح بين حرٍ وبومي
جالاً يعنزلك وجالٍ ترى هيال=ما ينفعك ويزيد همك همومي
فاشتر رفيق الطيب لو تدفع المال=حرٍ تعلى فوق روس الرجومي
جمل محامل للثقيلات شيال=وبالطيب يبصم له بروس البهومي
وخوة رجال الطيب تشرح لك البال=اللي يعرفون القدى والسلومي
وخوة ردي الساس مثل أشهب اللال=للمرجلة والطيب عيا يرومي
ترى الردي فرقاه تشرى بالأموال=مالك ومال أهل الردى والرخومي
وفرقا رفيقٍ ما يسرك هو الفال=أذبح على فرقاه لو ديك رومي
لا جا لزومه قال يا عم يا خال=وفي واجبك ما يشتقي ما يقومي
فخلك بعيدٍ من هل القيل والقال=حتى ولو ترقا طويل الحزومي
فالنار لو شبت وتشعل لك اشعال=ترجع رماد وجمرها ما يدومي
وطرد المقفي ضعف بالعقل وهبال=لا ترتجي برقٍ بعيد الغيومي
ومنهو ضحك بسنون شامت وعذال=هاذا ومن مثله الد الخصومي
واللي يهينك هنه حده على الجال=لا تقبله لو كان متنه زحومي
والطيب أخير من الردى دام تحتال=ومحدٍ من الزلات قيل معصومي
فخلك مع ربعك ولو طال ما طال=ورجلاً بلا ربعٍ تراه مهزومي
لاجا نهارٍ فيه للشر زلزال=محزمك ربعك في نهارٍ كتومي
في عزوتك لا يدخلك ربع مثقال=راع الحكي لا تسمعه والنمومي
لاقابلك غنى على كل موال=ويرميك لمن قمت بردى العلومي
فالناس جهالٍ وفالناس عقال=والعاقل اللي محترم ومحشومي
والجهل ضد العلم راعيه ما نال=الا المشاكل والشقا والذمومي
ومن عال في دنياه في الناس عيال=كم واحدٍ للشر يسعى يسومي
والحق حق وكلمة الحق تنقال=يا العبد تب لله وخلك جزومي
هذي نصيحة للصناديد الابطال=ابنا الرجال الطيبين القرومي
تمت وصلوا عد ما هل همال=على النبي وعداد منهو يصومي[/poem][/frame]
تعليق