السلام عليكم
هذه القصيده متواضعه مهداه إلى رجل الوفاء والمكارم
مـــــران بن قــــويــــــد المســــاعره الدوســــري ( حفظه الله واطال بعمره )
أمير قبيلــــة الدواســــــر
[poem=font="Simplified Arabic,6,black,bold,normal" bkcolor="transparent" bkimage="" border="none,6," type=2 line=1 align=center use=ex num="0,black"]
بسم الله ابدا وابتدي نظم الأبيات= واكتب جزيل القاف واترك هزيله
واغوص في بحور القصيد العميقات= واخذ معاني مالها من مثيله
من عادتي بدع البيوت الجزيلات= مااقول بيتٍ فيه نقصٍ وميله
وجزل القوافي نلت فيها الشهادات= لي الفخر لاقيل مالي عديله
يا راكب اللي لامشا في المسافات= يشفي جراح القلب يبرد غليله
يقصر دروب البعد في ظرف ساعات= هي منوته مسك الدروب الطويله
شراه منهو ما حسب للخسارات= توّه جديدٍ في معارض وكيله
فالفين وسته نازلٍ في الوكالات= فنس الخشوم موردينٍ موديله
لامن مشا بتقول خيل السباقات= تسبق هبوب الريح خيلٍ اصيله
عليه قرمٍ حاضرٍ في المهمات= صليب راسٍ في المصاعب دليله
من لابتي اللي رقو في الطويلات= (دواسرٍ ) افخربهم لي قبيله
اللي لهم في ساحة المجد صولات= عز الدخيل اللي حياته عليله
واعطيه خطٍ به من الطيب نفحات= ومن القوافي صغت فيه الجزيله
والا استدار وقام يعطيه نمرات= بعد الظهر من بعد ماانهى مقيله
فوَله بنزينٍ من أدنى المحطات= ونصّاه لديار الوفاء والفضيله
أهل الشجاعه والكرم والشكالات= ( وادي الدواسر ) عز منهو يجي له
هو موقع الأحرار وأهل الطناخات= فزاعةٍ للجار في ضيق ليله
تاريخهم شامخ يرفرف برايات= اللي فعايلهم عظيمه جليله
وينصا عريب الجد شيخ المروات= فكاك عسرات الامور الثقيله
شيخٍ على طيبه تدون سجلات= نسيانها عبر الزمن مستحيله
هو شيخنا (مران) رجل الصعيبات= ستر العذارى لارمو له بشيله
شيخٍ رقا في عالي المجد قمات= من وقفته ياكم همٍ يزيله
له في طريق الخير فزعه ووقفات= فعول خيره مثل وبل المخيله
سقم العدو لا اسقاه مر الأهانات= ولاذوقه مر الغبن والفشيله
ربعه هل الطالات واهل الشجاعات= اهل الزعامه والسيوف الصقيله
(الآد مسعر) طوَعت كل عيلات= كعام منهم يشعلون الفتيله
سلم عليه إعداد وبل المخيلات= واعداد كيفٍ فاح بنّه وهيله
هو السند يوم الزمن فيه ضيقات= ويومٍ قنب جرحي وزاد بعويله
والا أقبلت شهب السنين المغيرات= ولامن عناء وقتي سقاني بويله
فيه أنتخي واثني عليه الندايات= ( مران ) ياسيف الكرم ياسليله
(مران) ياستر العذارى العفيفات= لامنها ضاقت بهم كل حيله
بشكي عليك اليوم بعض الخفيات= يوم انها ضاقت علي الوسيله
من جور وقتي صابني اليوم طعنات= حتى السعاده في حياتي بخيله
وقلبي تجرع هم دنياه حسرات= من مات ابوي وصار همّه يشيله
اخفي همومي دون قوم الوشايات= اهل الحسد واهل النفوس الذليله
شذابة المقفين واهل العداوات= جارو علي يوم الزمن جار ميله
جنبتهم ولا سلمت الأذيات= والشر منهم قام يجرف بسيله
هو عيدهم لامن لقو بي هفوات= لكنها بعدٍ عليهم طويله !
ياليت فرقاهم تجي بالسهالات= واشد وارحل في ديارٍ بديله
باح العزاء مني وجاذبت ونات= وين السند اللي اجي واشتكي له ؟!
ماغيره (ابن قويد ) ريف الضعيفات= اللي ليا ضاقت علينا نجي له
يالله عسى اسنين عمره مديدات= وعسى حياته بالسعاده جميله
ويبقى ذخرنا بالليال الشديدات= الله يمتع به سنين ٍ طويله
النــــــــــادره[/poem]
[/align]
تعليق