بنـدر المصـلوخي !

[poem=font="Simplified Arabic,5,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
لا إله الاّ الله الخالق البرّ الجليل = جلّ شانه كلّما قال كن للشيّ كـان
وكلّما أفنى جيل ينشي بدال الجيل جيل = والبقـا لله واللي سوى الرحمـن فان
المسـافه ودّها ميـل والاّ ألفيـن ميـل = مـيّزت كبد المطيّه على كبد الحصان
للسّلَف تاريخ ماهـي سوالف قال قيل = وأنعـرَف مازان من جمْلة أحـداثه وشان
مضرب أمثال وحِكَم من قبيح ومن جميل = مثل قول فلان والاّ كما سوّى فلان
طيب يعني طيب مايعْتـرف بآخر مـديل = في زمان امسك دركسون والاّ امسك عنان
وقـولةٍ الأّول ما خلــّى مبات ولا مقيـل = ما أقتنعت بْها وتكذيبها ذا اليوم حـان
حاتم الطائي عليّ الحرام إنـّه بخـيل = وبالحـرام إن سالم الزيـر خوّاف وجبان
وأشهد إن طويق ماهو من الوزن الثقيل = وأشهد إن عزّ الملوك أنحسب ذلّ وهوان
وأشهد إنـّي صادقٍ عند ربّي والدليـل = بنـدر أبن خْلـيْف غيّر مفاهيـم الزمـان
الكرم والجود والطيب والمدّ الجزيل = والشجـاعه والنسب والفـراسه والكيـان
والنقا والصدق والثقل والظلّ الظليل = والشـكاله والوفـا والفصـاحه والبيـان
كلّبوها ملْك بندر عسى عمـره طويل = ينطق الكلمـه وبالفعل يضمنـها ضمـان
يدحم امتن جنب ويصير قدّامه نحيل = في المـراجل يدحـم الجمْع بجنوبٍ متان
كفـّه أمضى في عدوّه من السيف الصقيل = وايـليٍّ لا أعترض قاسي الصوّان لان
شيخ مقطع حقّ يفصل قبيلٍ عن قبيل = في لـزومه وكّل الله وبالله استـعان
أن حضر مثل المطر كل واديٍ فيه سيل = وأن وطـى القيعـان ما تنبت الاّ زعفـران
وأن تغيّب ماحدٍ سدّ بغيـابه بـديل = ميّزه ربّي بقدْرٍ كبير وعُـظم شـان
بندر المصلوخي اللي أبد ماله مثيـل = يكفي إن اسمـه لحاله يهزّ أكبـر مكـان
والله إنـّي قبل أخاويه في حالٍ عليل = ماخذٍ من عشْـري الوقت وصـدوفه ثمان
ويوم خاويته وبانت لي فعول الأصيل = والله إنـّه قام حظـي وشين الوقت زان
إعـنـزي ميـّل عقاله وراسـه مايميل = في العـلالي نظـْرته ما ألتفت صوب الطمان
أدري إن ألفين ديـوان في مـدْحه قليل = وإن تقصـيري مع الوايلي الشغموم بان
وإن عذري منه مهما تسيمـنته هزيل = ميـر طيبه يقلب هْـزال كلْمـاتي سمان
مستحـيل ألحق مداه بكـلامي مستحيل = لو معي ميتين قلبٍ وخمْس إمية لسـان![/poem]

ناصر الاحمري

هذه اللحظة رأيتها

احجز لاستمتع ثم اعود باذن الله

يا سلام يا سلام

لله درك و لله در بندر خليف اللي اظهر لنا هذه الدره

و من مدح يستاهل المدح و مثلك يا ناصر ما يمدح الا طيبٍ بان طيبه

صح الله لسانك مدد مهوب عدد

اقبل ازكى تحياتي

اخوك

ان حضر بندر المصلوخي مثل المطر
في الكرم والجود والنخوه وعلوم الرجال يستاهل المدح هذا

بس انت ان حضرت يحضر الشعر والروعه كلها بالأضافه لصفات ممدوحك

كم هو رائع هذا الوفاء

كم هي رائعه هذه الموده واعلاء مكانة الصديق الصادق

في زمن:
ما اكثر الاصحاب حين تعدهم = ولكنهم في النائبات قليل

قل ان تجد في هذا الزمان الذي يفزع ويلبي لازمك

صح الله لسانك اخوي
ناصر الاحمري

وبيض الله وجهك

اخوك ابو نايف