قصيدة صديق عزيز

قصيده للشاعر (( العاوي ))

يوم وجه السما قامت تلالا نجومه

...........................ما على جالها غير النجوم السواري

طال ليل الوحيد اللي تسوقه همومه

...........................قام ياتيه من بعض الطواري طواري

طاريٍ يشتريه وطـاريٍ ما يسومه

..........................لو غدا له مثل وجه الخويّ المباري

ضاع في ضولةٍ بين العزا والعزومة

...........................يستر الله ولا سترة ثياب العواري

من قصر حد صبره والليالي خصومه

..........................مثل من قام في وجه المقادير زاري

يوم كبرت بعين اللي ضعافٍ عزومه

..........................شفتها هينة واللي على اللوح جاري

عند باب الصبر تبقى اعداي مهزومة

...........................صبرنا مثل صبر امطربخات السماري

حذفها للقدم .. واللي الوجيه امحشومة

........................ما على الضلع وان هبت هبوب الذواري

عارفٍ الزمن لوهو ضحك في قدومه

................................عادته طعنةٍ بمسللات الشباري

قد طعونه بقلبي من مضارب سهومه

..........................مثل نقش الوشام اللي بروس الأباري

يغتنم غفلة الغافل وياخذ قسومه

..............................لا يغرك بضحكاته وزين المواري

كنه الصاحب اللي من طرايف علومه

..........................خاط وجه السحايب لا تطش البراري !

لو قدر منهج التاريخ حرّف ارقومه

.........................واختلس من حديث الترمذي والبخاري

وان كربت الحبل تلقاه ينفض اهدومه

..........................رابطٍ سبق طيره في ارجيل الحباري

ما على وجهها الفاني رفيقٍ تلومه

.........................كان ما قد دريت بتصبح الصبح داري

ذا زمانٍ غدت فيه الحقوق امهضومة

..........................والذمم فيه صارت بين بايع وشاري

كانه فلان قاموا له يقضّى لزومه

........................وكانه فلان قالوا له : قرار وزاري

كلبينا جنـــــود وكلبينا حكومة

.........................نحتمي الحق من هسات سحم الضواري

من يقول النفوس من الذنوب معصومة

...........................واصلٍ حد قوله في حدود المزاري

***

ليتني رحت عاد ان الظروف مختومة

...........................قبل يقرا فحاوي علمها كل قاري

الله الله ياسلاااام

مشاركتك اكثر من رائعة

سلمت يمناك وسلم غاليك

في انتظار جديدك