لا لمحته لد بالعين لاقدامه

قصيده غزليه جديده ارجو ان تنال رضا الجميع

مل صب طاوله خافي هيامه
000000000000000 يحسبه من لا درى داله ناسي
صوبه من ناعس الطرف سلهامه
000000000000000 سبل رموشه وهي كان نعاسي
لايمه لو شافها كان مالامه
000000000000000 ويش ريم ربعت روس الاطعاسي
لا لمحته لد بالعين لاقدامه
000000000000000 من حياها لااقبلت تنكس الراسي
وان تبسم, تل قلبي تبسّامه
000000000000000 وانجلى همي وغمي وعوماسي
وان تكلم, زين نغمة تكلاّمه
000000000000000 تبري الوجعان وتلين القاسي
واشقر مثل الذهب يضهد القامه
000000000000000 ويل لدن العود لو كان ميّاسي
والخصر شبر يجي قيسة حزامه
000000000000000 ماشبرته مير ذي هقوة قياسي
يايمين الشاعر الذرب واقلامه
000000000000000 وبنت فكره لا كتبها بقرطاسي
ياصدى رنة قوافيه وانغامه
000000000000000 لاتزفرها مع حر الانفاسي
يامداه ويامعانيه والهامه
000000000000000 لاتهدّينه وهو مرهف احساسي
كلمة في خاطر الذرب حوامه
000000000000000 (آه احبك) حطها بين الاقواسي

وسلامتكم

الاخ العزيز الذرب

السلام عليكم ورحمة الله وبركاته


لالمحته لد بالعين لاقدامه

...................من حياها لاقبلت تنكس الراسي


صح الله السانك اخوي الذرب وقصيده بمنتهىالجمال


تقبل تحياتي

اخوك وقـــــــاد العتيبي

الاخ وقاد
السلام عليكم اسف لاني تأخرت في الرد عليك لكن ماحصلت الفرصه الا الان, على كل حال اشكرك جزيل الشكر على تعليقك والله لايخلينا من الطيبين شرواك.

اخوك الذرب

[كحيلان]

صج الله لسانك يابو عبدالرحمن
الود ودي انسخ القصيده كلها واجردها بيت بيت
مير كل بيت يقول الزود عندي ويبي له صفحات
قصيده ولااروع منها الا قائلها

لاهنت يالسنافي

اخوك
فالح

والخصر شبر يجي قيسة حزامه
000000000000000 ماشبرته مير ذي هقوة قياسي

يا سلام عليك يابو عبدالرحمن ...................

شاعر جزل ومعانيك جزله ....

وش هذا كله ؟؟؟ الدندان ماضاع ورثه ...

الله لايهينك وتقبل اعجابي بشخصك الكريم وبقصايدك ....


اخوك:
عايض راشد

الاخ كحيلان

وين الغيبات يابو صقر نبي جديدك, على كل حال الله لايهينك على تعليقك.

الاخ ابو راشد

الله يمسيك ولاّيصبحك بالخير وتسلم والله لايخلينا منك

الذرب000000عزالله العزيز انها قصيده قويه00جميله00محبوكه صح وشلون هذي فاتتني وكيف ماتبقى فالصفحه الاولى الا الاوله ترجع للاوله0000


مبدع واسم انشاء الله على مسمى



علي بن حمري

سلمت يمينك يالذرب

قصيده شامخه بها نبرة الأصاله وهذا ما ندر من الشعر في وقتنا

صح لسانك

حتى انا لم أرى القصيدة الا الآن ربما لتراكم المشاركات في وقت واحد لكن من بركات على الحمري انه رفعها لنا




الفــــارســـــه

الذرب.. الغالي...

يا سلام عليك...

قصيده جزله...

تقبل اعجابي.

صح لسانك وقصيدة في غاية الروعة والجمال وأشكرك على هذه الهدية الثمينه



والخصر شبر يجي قيسة حزامه ماشبرته مير ذي هقوة قياسي



ياسلااااااااام البيت هذا يسوى له قصايد


وشكرا جزيلا لك

الاخ علي
تسلم يالغالي ولا عليك زود عقب اللي سمعته من قصايدك ماعادني
بقايل شي.
الاخت الفارسه:
شهادتك افتخر فيهاوتهمني لانها من شاعره متمكنه

الاخ خيال القوافي:
اعجابك بالقصيده عندي احلى من القصيده والله لايخلينا منك

الاخ ابن هيال:

لاتلومني ياخوك في هالبيت , وعلى كل حال الله يصح بدنك وتشرفنا
بتعليقك يالغالي

جميع الاعضاء الكرام اعتذر عن تأخر شكري لكم على تعليقاتكم وذلك بسبب الظروف.