مبطي .. زمان اقصد .. ولا هوب بالحيل
يعني كذا .. من ستة اشهر .. او اكثر
كنت اشرب الدله وكنت اعشق الهيل
كنت ارمي جروحي على الصبر واسهر
كنت اانتظر شمسي وكنت العن الليل
وليا اشرقت بالحب .. همي تبخر
كنت الف قلب يغير .. حتى من سهيل
والشمس غيرتها بحر .. يمكن اغزر
كانت تصب الشعر في خاطري سيل
ضاعت عيون الشاعر.. اللـــه وكبر
,,,,
لو جبت كل السالفه بالتفاصيل
دانة قصيدي وصلها ما تعذر
يكفي غروب الشمس .. يكفي بهاذيل
يكفي ترى مجداف قلبي تكسر
لاتعنونين الحب روس المراسيل
قلب الذبول اليوم لو تمطر ازهر
قلبي ولا عمره قبل بالتعاليل
لاتحسبينه لعبتك .. غيرك اشطر
روحي عسى الله يسعدك فـ المقابيل
لاعاد ابي ربحك .. ولا عاد ابخسر
مدام صوتك صار ضحكة مواويل
غنـّي لحالك .. وابعدي .. قلبي اخضر
,,,,
يابنت قلبي شايل المغفره شيل
حساس .. بانفاس المحبه تعطر
ليا عشق فارس .. ومعشوقته خيل
ماتنعسف للغير .. لو غيره اشهر
ويا ويل من يقرب لمن حبها ويل
مايرحمه .. فـ الحب لي قلب ٍ اقشر
ياقف مع خله على العدل والميل
لاحب .. حب بصدق .. بالحب يفخر
كوني وضوح ٍ يشتعل لك قناديل
يادانة الدنيا الغلا فيني اثمر
والحين انا ويّاه عندك مداخيل
لاتلعبين بقلب بالطيب مغتر
طالت بي الجلسه وهي بس تحليل
عن ذكريات ٍ ثوبها ورد ٍ اصفر
زمان .. واقصد مبطي .. ومبطي ٍ حيل
من ستة اشهر .. هاه ؟؟!! لا والله اكثر !!
..........
الباريسي
[تم تعديل الموضوع من قبل الباريسي بتاريخ 06-03-2001 الساعة 01:41 AM]
تعليق