قصة راعي الطير

قصة راعي الطير

وهذي القصة له أكثر من رواية ولكن اخترت هذه الرواية وأسندها على الراوي / منديل ابن فهيد الأسعدي

تقول القصة :

إن واحد من اهل الجنوب نزح للشمال لبعض الاسباب ، وكان له والد صقّار ومولع بالطيور وهو دايم مع الدبش ويصيد .

وفي يوم من الأيام اجتمع راعي الجنوب مع راعي الشمال (وهم بعيدين عن بعضهم بالمنزل ولا يعرفون بعض) ويوم اجتمعوا :
قال الشمالي : وش يصيد طيرك .
قال الجنوبي : صيده على قدره ارنب وسمق .
والشمالي كان معه حرٌّ كبير يصيد الكثير من الحبارى .
قال الشمالي : أنا وياك اليوم خويا يكفينا طيري ، وطيرك اربطه مع (القش) ، وحنّا حوله .
وابتدوا بصيد الحبارى ولكنهم غفلوا عن الطير المربوط .
ولما رأى طير الشمالي طير الجنوبي المربوط انقظ عليه وذبحه .
فقام الجنوبي يتأسف على طيره .
فقال له الشمالي : إن الطير ما يسوى هذا الندم.
فقال الجنوبي : بلاي والدي ، يسوى عنده الطير الكثير .
فقال الشمالي : ابعطيك طيري ووالدك مثل والدي ، وابقول له الطير غدى .
فقال الجنوبي : طيري ما يسوى عشير طيرك .
فقال الشمالي : اقسم عليك إن تاخذه ، وإن ما اخذته تراي بااذبحه .
فأخذ الجنوبي الطير وراح لاهله .
ولما وصل الشمالي إلى والده قال له : ترى الطير غدى .
وكان الطير يسوى عند ابوه ابله كلها ، فندم ولا جاه نوم وشب ضويته وسهر عليها ....
أما الجنوبي فلما وصل ورأى ابوه الطير الكبير قال منين لك هذا ، فأخبره القصة فقال له ابوه : اخطيت ياولدي ، هذا الطير غالٍ على راعيه ، ويسوى عنده الشيء الكثير .
قال الولد لابوه : غصبني .
قال ابوه : ارجع به الليلة .
قال الولد : ما أدله .
قال الوالد : تلقاه ما نام ، رح وتلقا ناره تدلك .

وفعلاً مشى الولد بالليل صوب العرب ، ودلّته النار ، وعندما وصل النار ، لقاه يتسلى بالربابه ، ويغني بطيره ، اللي ضاع .
قال الجنوبي : ابشر بالطير .
فقع والد الشمالي وناطحه وقال له : ابشر بالبشارة ، فأعطاه حصان .
قال الجنوبي : إن كنت ملزم عطني بعير يكفي .
قال والد الشمالي : هذا ثمنه كثير وهو لك مني وإذا ما أخذته ذبحته .
فأخذه وأتا لوالده ، قال له والده ليش تاخذ حصانهم .
قال الولد : خيرن آخذه وإلا يذبحه .
قال والد الجنوبي : الولد والوالد كلهم بالطيب سوى .
انتهت القصة
أما الأبيات التي قالها والد الشمالي يتغنى بها على الربابه عند فقده لطيره :
تطلعوا بانظاركم يا مداوير
*************** للأشقر اللي بايسر الجو حامي
غدن به برق النحور المعاشير
*************** وابعد سمامه عن مقابل سمامي
واطيري اللي كن عينه سناكير
*************** حاطوب ما تبرد كفوفه دوامي
وش عاد أماري بة جميع الصقاقير
*************** عقب اشقر عدل الجناحين شامي
عنه غلام فاشحن له علي بير
*************** متمشلـح يسقـي قطيع ظوامــي

وسلامتكم واعذرونا على القصور .

(راعي الشمال أي شمال المملكة وراعي الجنوب المقصود على ما أظن واحد من أهل نجد).


أخوكم

-------
تركي الروقي



[تم تعديل الموضوع من قبل تركي الروقي بتاريخ 04-21-2001 الساعة 06:55 PM]

تسلم ياتركي

سلمت اناملك والله لايهينك اختيار جيد وقصة تيتحفق القراءة،،،،،،،،،،،،،،،

لاهنت

الاخ / سهم المنايا



تسلم والله يا بعدي ، الحقيقة تشرفت بمشاركتك ، لك كل المحبة والتقدير .



اخوك

تركي الروقي