وليله عطرت عمري وعطر ليلتي غالي
.......... بعد قشر السنين ارتحت لي ليله على صدره
سكنت الحلم والغيمه تسولف له عن احوالي
.......... حضن همي ودفـّا هالضلوع وضعت في عطره
لمس ذيك الجروح اللي من الفرقا برت حالي
.......... تداركها .. تبسم وارتخى واشعلني بنظره
وقال ان كان لي خاطر تناسى دامك قبالي
.......... ومثلك لاحضن خله رمى الدنيا ورى ظهره
وطاح الهم مع ذاك الشماغ وقبله عقالي
.......... تنادت بالوصل ذيك الستاير خوف من بكره
قطفت من الزهر خده ..لثمته والزهر مالي
.......... وقمت اجمع وروده في كفوفي .. وابتسم عذره !!
سألت التوت والسكر عن الرمان واهدى لي
.......... حبيبي حبة ٍ بشفاه ذابت .. ثلجه وجمره !!
نثرني في بساتينه .. همس قال الكرز حالي
.......... قطفته وانحنى التفاح طايع للغلا وامره
لك الله وقت ضحكني وانا رايق .. من هبالي
.......... كرز !! تفاح !! من قدي ؟؟ قطعك الله يالسدره !!
الا ليت الزمن ملكي واعيشه بس بلحالي
.......... بدنيا مابها غيره واكون بدنيته عمره
كتبت من الحكي بعضه وياما شي في بالي
.......... حداني عن كتابتها التعب .. ياشعر لاتشره !
انا مدري وش الاول عشان ادري وش التالي !!
.......... هذيت بهالحروف ونمت لي ساعه على صدره
..........
الباريسي
تعليق