مشهور .. ذكرتني بالي قلته للمتنبي

مشهور الخيال
قصيدتك حديث النفس قافيتها الثانيه ذكرتني قصيده ودي تقراها انت وباقي الاخوان من الأعضاء

القصيده ارسلتها للشاعر الكبير سعد بن جابر العلوش الهاجري (المتنبي)
واسمها ( الـغـنـيـمـه )

اقول فيها:

هاض الضمير وشاقني واستحبيت * ابدع بيوت الشعر وابني عمدها

فتحت صندوق الضماير وفكيت * كل القفول الي زماني وصدها

ومنّه لجزلات المثايل تنقيت * عشان في بدع البيوت اعتمدها

الشعر يالشاعر ولو به تفانيت * ينعاف دام المعرفه يفتقدها

الشبح في مغزا البيوت ان تغنّيت * لافي قوافيها ولا في عددها

لوما بدعت من المثايل سوا بيت * به فايده تنفع بها من وجدها

اخير من كثر البيوت المفاليت * لاخير لافيها ولا من قصدها

واحذر تزل المعرفه وان تحاكيت * اقنص لزينات المعاني وصدها

ولا تجيب علوم ماقد تحرّيت * عنها ترا يلزم بها من جردها

والورع والكذاب لو خبّرو (كيت)* أخبارهم حذراك تصغي لـ احدها

لو جبت منهم شاهدٍ واستدليت * شهادته ماتعتبر لو شهدها

ولا تعطي الهذار سرّك لو اعييت * ولا المره حتى لو انّك ولدها

لو تبدي اسرارك لهم جالها صيت * حتى الغريب اليا نشدته سردها

وفي طاري الغايب اذا يوم طرّيت * خل النفوس الغايبه في رغدها

لايصبح الغيّاب منك مباهيت * تاكل لحومٍ ميته في لحدها

وان بان لك في غيرك العيب وابديت * عيبه : تصيّد لك عيوب ورصدها

تراك مثله لك عيوب ان تعاميت * عنها فغيرك شافها وانتقدها

واياك عن ظلم العباد ان تبليت * نفسٍ ولا تجلب عليها نكدها

تبلا بدعوة مسلمٍ له تجنيت * يدعي بها في سجدته لو سجدها

ومن جاب لك عيب المخاليق واوحيت * هرجه لغيّاب البشر يضطهدها

قل له هبيت ويوم غابو تجرّيت * شجاعتك قدامهم تفتقدها

وان جاتك الزلّه وفيها تفاجيت * احلم ونفسك لاتخلّي رشدها

لو جالك المخطي بعذر وتغاضيت * جمالةٍٍ والنفس يجلا كمدها

وان كرر الزلّه ومنّه تشقّيت * أو جاك بالزلّه خبيث وعمدها

لقّه ردود تفتت الكبد تفتيت * وادبل بها وان طوّل الهرج زدها

خلّك عزيز ولاتجرّي الهلافيت * نسل الرخوم الّي رداها قردها

ترا عدوّك ينخذل لو تعاليت * وفعايلك تجلب لعينه رمدها

وعلى الطلاقه ثبت النفس تثبيت * بحبال عزٍ والمراجل وتدها

خلك بطيبك تنذكر حيٍ وميت * ومن يزرع امّات الجمايل حصدها

ودنياك دجها واحذر تقول ملّيت * شرّق وغرّب . دام لك ساق قدها

دروسها في كل ديره منابيت * طفها وحاول قطفها واستفدها

وانص الرجال اهل التجارب لو ازريت * تفهم صعيب الدرس واطلب مددها

تلقا بهم راي القدا كل مااشفيت * واهل التجارب تهدي الّي نشدها

والرجل مايملا يده قول (ياليت) * ومايدرك الغايات لوما طردها

غايتك لوهي في قلوب العفاريت * انزع بيدك قلوبها من جسدها

والنفس عطها شفّها لو تماديت * استمتع بدنياك واطعم شهدها

مدام راسك حي خذ مااستلذيت * وروس الحبال يحلّها من عقدها

لاخير فيمن بالمذلّه مناعيت * مات الذليل وليلته مارقدها

الذل مابه منعةٍ يوم ذلّيت * ومارد ساعات القضا عن وعدها

ولا خير في رجلٍ حياته تناهيت * يشكي ونفسه ماتبيّن جهدها

عزمه ضعيف ويرتجي مدّة مقيت * والرزق من خلف عتبه ماصعدها

ولا خير فيمن مربطه حجرة البيت * له هجدةٍ لوجيت بابه هجدها

قومٍ تصك جحورها لو تعزويت * وان فارقتها ماتعدّت بلدها

ولا خير في جاهل وله زول خرتيت * بير المراجل زلّها ماوردها

متشاغلٍ عنها بشلّة سرابيت * من شافها من خلق ربي نقدها

وشـ جاك ياوقت العنا يوم شنّيت * حربٍ ضروس ونادر الّي صمدها

حرب الجهاله طايشه لو تتقيت * لازم تنوشك بالمقادير يدها

شفت الضحايا عقبها يوم مرّيت * عقولها جرحى . سليمٍ جسدها

ومن شوفة سلوم المخاليق ضجيت * تنزف . وابر عيالها الّي جحدها

الوقت حربه في ضياعٍ وتشتيت * لعيال من تبني الظفر في عهدها

عن سلم ابوها الّي بنا طيّب الصيت * يصدها بجيوشه الّي حشدها

عساك ياقصرٍ صمدت وتحدّيت * تبقا ملاذ نفوسنا ياسعدها

انت الوحيد الّي بقيت وتعاليت * شاهد على صبر الرجال وجلدها

نصيت رجلٍ من سباعك وناديت * باسمه واصوّت يا(سعد) يا أسدها

جاوب يبو جابر تراني تعزويت * باللي ليا منّها تشربك فردها

أنصاك يوم انّي من الوقت حسّيت * ضيقات في نفسي بعيدٍ أمدها

ان زحتها بسيف التناسي وطشيت * كل القدايم تبتليني جددها

وجيت اشتكي لك يالسنافي وحطّيت * حملٍ على متوني ثقيلٍ جهدها

وابديت لك كل الخبر واستهليت * بعض النصايح توّنا في صددها

دروس من وقتي بقلبي مناحيت * متدارجاتٍ توّها في مهدها

وابيك يوم ابدع بالابيات واصغيت * تفزع تبيّن زلّها من سددها

ماني كبير السن ويقال مرّيت * على تجاربها وماضي عهدها

لكن لوضع الناس بالعين لدّيت * وسمعت من شاف الحياه وزهدها

دنياي اراقب فعلها كل ماابديت * مشرافها وشـ عزها من مسدها

ونزلت في دارٍ ومن دار شدّيت * وعاندت ما قرّب لعيني سهدها

ياكم سنين لـ أمسها الميّت احييت * وفي يومها مسعاي واخاف غدها

واصبر لبلواها وسرت وتقاويت * والبل ما تثني ركبها غددها

وياكمّ بمزون الهموم استضليت * تبرق نكايد والمصايب رعدها

وغضّيت عيني عن بلاها وصدّيت * لو كان ترذبني بهلّة برَدها

وكم صبت من شاره وكم شاره اخطيت * وما صابته يمناي جا من ركدها

واليا ارتبشت اعليت رميي و وطّيت * دونٍ من الشارات والا بعدها

وجيت استشيرك في كلامي ولاجيت * اعلّم صقور الهدد عن هددها

إمّا تقول احسنت كفّيت وفّيت * والا تقدّم للجريحه ضمدها

وصلات ربي عد ما اصبحت وامسيت * وعداد ما ترمي البحور بزبدها

على رسولٍ شتت الكفر تشتيت * واصنام مكّه هدّها ما عبدها

وســـلامـتـكـم

خوي المطاليق


ــــــــــــــــــــــــــــــــــــ
ما يشاف الرجل بالعين الوسيعه * غير لامنّه فزع لعيال عمّه

بيض الله وجهك , وصح لسانك على هذي القصيده0

هذي مافيه قول ياخوي المطاليق0

لكن اللي مايدري مايدري00000000000000000000000؛


كم واحد له غاية ماهرجها 000يكنها لوهو للقصين محتاج

يخاف من عوجا طوال عوجها 000كلمة قفا يسعابها كل هراج

يقضب عليك المخطيه من حججها 000حلو نباه وقلبه اسود من الصاج



مشهور الخيّال

اخوي خوي المطاليق

صح لسانك احسنت كفّيت وفّيت ولاهفيت .... ماقصرت قصيده جزله وهذا رايي كمتذوق للشعر ولو اني اجد نفسي محرج في اني ارد على شاعر مثلك ومثل الاخوان الشعراء الى هنا (من غير قصور في حق احد ) ...

يقول الشاعر جزاء صالح الحربي

والناس ماخلو يتيم بالالحاد
************** حتى يتيم القبر يمسك كراعه

ولولا الجواري والحوادث لها سناد
************** كلن تلمس راس غيره وباعه


تحياتي لك وللجميع

اخوك شقران

خوي المطاليق..............انت رهيب ....كبير ومهدي لكبير

صح الله لسانك يا خوي المطاليق انت كبير ومهدي قصيدتك او درتك بمعنى اصح الى (الاسطورة متنبي الشعر الشعبي) هذا الاسم اللي احبه رغم اختلافي معه في بعض الامور لازلت اقول انه احد اعظم الاسماء التي سوف يكون لها مستقبل رائع تذكروا هذا الاسم(المتنبي)والله ثم والله انه مبدع وانه من اجمل الاسماء التي قرأت لها بس مشكلته!!!!!!!!
اني احبه لذلك اقسو عليه من دافع الاخوة...ويظل الاخ دايم صغير في عين اخوه اللي اكبر منه.

لله درك يا خوي المطاليق شهم ورائع ,صدقني قصيدتك قرأتها اكثر من سبع مرات وفي الثامنة اضطريت اني اطبعها واحتفظ بها تدري ليه؟؟؟
لانها تستاهل اللي يحتفظ فيها نعم قصيده من النوع اللي يحبه قلبي.

تحياتي لك

اخوك/عبدالله بن فلاح الهاجري

صح الله السانك




صبحك الله بالخير






صح الله السانك عجزت وانا اقولها.؟


بس اعنادلك مانيب حاط الرد)



يبينا كم صفحه.


ولو اقول وش اقول شهادتي فيك مجروحه

صح لسانك
هذا صرح من القصيد
مابقيت للشعار شي



جزلات صقرٍ معتلي راس مشراف ,,,, غنايمه هتكٍ بضرب المخاليب

طيبٍ على طيبٍ وذا سلم الاشراف ,,,, جزلاتهم مدات طيبٍ على طيب


الــفـــارســـه

صح بدنك يامشهور وبيض الله وجهك

شقران جعلك والله تسلم وصح بدنك يالغالي

الواثق انت كبير وصح بدنك

المتنبي هلا وغلا والله صح بدنك والرد ننتظره

الفارسه صح بدنك ابياتك مشكوره عليها قويه بمعنى الكلمه

بيض الله وجهك

بيض الله وجهك

بيض الله وجهك


قصيده مليانه بمعني الكلمه وتضاهي قصيده الشاعر الكبير بركات الشريف.... نصيحه..... وعلوم طيبه
والكلام الطيب ليس بوقف علي شخص معين ...... الله لايهينك ويستاهل ابو جابر
وقصيدتك مدرسه كبيره جداً .... ومنها نستفيد
بيض الله وجهك ....وهذا ثمر القصيد اللي يستفيد منه الناس

أخوك / بحــــــــــــر

و وجهك ابيض

و وجهك ابيض

و وجهك ابيض

صح بدنك واشكرك يا بحر

دام البحر قال شهادته فهذا بحد ذاته شرف لي وللقصيده

اخوي خوي المطاليق بيض الله وجهك انشهدانك وفيت وكفيت صح لسانك
على هذه المعلقه.

حكم ودرر ثمينه تسوى وزنها ذهب الله لا يضرك . وين اصحاب العقول والالباب لينهلوا من هذا المعين الصافي اللذيذ.

تقبل تحيات اخوك وتلميذك/ حكيم الجامعه

صح بدنك ياحكيم الجامعه

وشهادتك وسام

ماعندي الا بعض مما عندك

والله لا يهينك

بيض الله وجهك على هذي القصيده الرائعه بعيدة المدى

الغازي

صح بدنك يالغازي

ولا هنت على كل حال وتسلم

بعد قرائتي للمقابله مع الشاعر اخوي سعد بن جابر(المتنبي)

ولعدم وجود الوقت الكافي للمشاركه بجديد

احب ان ارفع لكم قصيده قديمه شاركت بها منذ مبطي



خوي المطاليق