اقدم بين اياديكم أحد قصائدي
لم أكتبها لشيْ الا رغبة في الحصول على إعجابكم
. (نــصــيــحــه)
أنا أنصحك من حربٍ ضحاياها (أنا ويّاك) * يليت انّك قبل تبدا تفكّر في عواقبها
أطيعك . لكن ان بيّنت لي درب الخطا أنهاك * ولا ودّي تسرّع في امورٍ منت حاسبها
ترا روحي إذا أشرت لي بيدك تروح فداك * ولكن (تقتلك) لو جيتها بيومٍ تحاربها
أحبك كان ما تدري . واحب ارضٍ بها ماطاك * ولكن ما نطقت بكلمتي (خايف تكذبها)
تحاربني . تعاندني . ولاني عارفٍ وشـ جاك * تعذّب نفسك . ونفسي بتعذيبك تعذبها
حرااام انّه بفعلك في محبّك يشمتون عداك * تراك تسير في دارٍ كثيراتٍ عقاربها
انا (لحافك) اذا هبّت مراويح الهوا و(غطاك) * انا عونك من الدنيا اذا جاتك مكاربها
أحاول انّي استسلم اذا ظنيت فيه رضاك * ولكن عزّتي دايم : تطالبني بواجبها
اجاري فعلتك . ماكنت باللي شفته اتحداك * ولو تفعل فعول الطيب انا بالطيب اجاذبها
وهذا كل ما عندي . وعقلك مركب و ودّاك * وشوف بأي (مينا) عقولنا ترسي مراكبها
وسلامتكم
. أخوكم خوي المطاليق
تعليق