الدَّين كسرٍ للظهر

رهن (عبيد الصدى) نخله مقابل الدين وبعد مدة أرسل له الدائن إما التسديد أو أنه سوف يبيع النخل , فأرسل عبيد بعض النقود مصحوبة بقصيدة:

عديت رجم وتعجبني شخانيبه

..................رجم رفيع وعنه الغيم ينجالي

متذكر ديرة زين مراطيبه

..................ما بيع ربعه وشاله كل حمالي

ما شرب سيحن يسقنه مناجيبه

..................تسقيه حيلٍ على مطوية الجالي

يا حظ ياللي ربوض ويش أسوي به

..............أنا احسب أني عتقت وصار يبرى لي

حظي من العام شدتني كواليبه

.................واليوم في ديرة الاجناب نزّالي

أبعدت عنهم وكزوا لي مكاتيبه

................البعد ما فك من خبثين العمالي

من قال حقي لشك اليوم تدري به

....................همٍ وغمٍّ ودين الناس غربالي

إن قل مال الفتى كثرت عذاريبه

................وان كثر مال الفتى عدوه رجالي

ثلث لغوشي وثلث قلت ابا اوفي به

................والثلث الآخر على الديوان ودلالي


لغوشي : أولادي

أررررررررررررحب

الفهد..

سألنا عليك وينك...ويعلم الله أنك على بالي البارح وقلت أبغى أرسل له إيميل ..وتالى مدرى وش أشغلني...ياأخوي لاتطول الغيبات...وكان الظروف بسيطه سير لو مره كل يومين تراك من الروح يالفهد.

عموماً الله يعطيك العافية وتسلم على هالأختيار الرائع كالعادة..
ولاهنت يالغالي

تحيات أخيك ولدعبس

يا مرحبا والله يا ولد عبس
والله ما غبت عنكم وتراكم غالين ولكن ما شاء الله إزدحم المنتدى وحبيت إن الكل ياخذ فرصته بالمشاركة, وان طرى علي شي يستاهله انت واللي شرواك فإني على طول سأشارك به. بالإضافة إلى بعض المشاغل البسيطة.

الاخ الفهد

تسلم يدينك والله يعطيك العافيه

** ياخي اسم الصدي مارن على ممكن زيادة معلومات عنه ولاعليك امر

اخوك -------> شقران

هلااااااااا اخوي الفهد..

من غاب غيبتك جاب الغنايم

واختيـــــــار رائع

سلمت يمينك

في انتظار جديدك

بسم الله الرحمن الرحيم

يالله حييه .. ياهلا وسهلا ..

من طول الغيبات

شاكرني لك وجودك معنا من جديد ..

بيض الله وجهك يالفهد....اختيار ممتاز ويبهج الخاطر ياسلامي عليك يا اخوي عبدالرحمن...لاهنت لاهنت

تقبل سلامي وتحياتي

اخوك/عبدالله بن فلاح الهاجري

شقران
الله يعافيك ولا أعلم عن الشاعر إلا أنه من أهل المجمعة.

الواثقة أبشروا بالغنايم (بس ترى مهوب فقع)

هيفاء
شكرا

الواثق
وبيض الله وجهك وعساك دايم مبهوج الخاطر