بالله ياالطرقي نبي منك الاخبار

[poem=font="Simplified Arabic,5,#000000,normal,normal" bkcolor="" bkimage="" border="none,4,#400000" type=1 line=0 align=center use=ex num="0,#400000"]
بالله ياالطرقي نبي منك الاخبار = لعل جوحسين والقرن ممطور

حيثه مداهيل لحسكات الاوبار = ومدهال ربع بلمراجل لهم دور

بالله بشرني ترى الفكرمحتار = جار الزمان وشاب راسي من الجور

يامحلا لاصار للعشب نوار = واصبح عكر رمثه من السيل محفور

جعله من العارض الى حزم سنجار = ويجيك متحدر الى فرعة الزور

ياتي عطا رحمة على كل الاقطار = ولاينذكرلي واحد منه مضرور

يازين مسراح المصفح مع القار = لاسرحه راعيه مع شقة النور

لاجيتوا الساجي ولفيتوا ايسار = ينساح صدر اللي من العام محكور

اختر ودور منزلك ياابومختار = منته على ماتكره النفس مجبور

من حال تنزل باشر بشبة النار = وعجل بذبح الكبش وابليس مدحور

وبيت الشعر يجذب بعيين الانظار = من بعد يزمي لك كما نايف القور

واسمر مع ربع على الجمر سمار = تمسي بنو الخير والطيب مذكور

والصبح سج الرجل من دار لادار = يالادمي تراك منهي ومامور

ولاتستمع في شور عمسين الاشوار = شورك براسك لاتسمع لهم شور

شوف الزبيدي في صحاصيح الاقفار = وشوف الفياض وشوف من كنهن حور

يجلى صدى صدر عليه الدهر جار = تمسي مريح وتصبح الصبح مسرور

ريح النفل ريحة دكاكين عطار = تقول فوقه عنبر الهند منثور

خلك على سج المرابيع جبار = لفطار واضحيه وثلثين عاشور

وان جوك ربع قاصدينك بمسيار = رحب ترى من يفعل الطيب مشكور

واتعب على ربعة طويلين الاشبار = ولاالردي خله بتسعين عاثور

لابد ماتنكف وتنوي بمحدار = تاتي على بيبان فلتك ناطور

عقب الربيع وريح بنات الازهار = ياتيك حر يطبخك سبعة شهور

اصبر على ماجاك والوقت دوار = والصبر زين وراعي الصبر ماجور

يقوله اللي عارف نظم الاشعار = لاعدها ماجاك بالبيت مكسور[/poem]


محمد بن دغش الهاجري

اخوي الكريم

سعد

لاهنت ولا شنت على هاذى النقل الراااائع

وصح الله السااان الشاااعر \ محمد الهاااجري

أخي سعد
شكراً على إيراد هذه القصيدة الجزله
والفارهه في الوصف
ورحم الله الشاعر محمد بن دغش الهاجري
رحمةً واسعه وأسكنه فسيح جناته


تقبل خالص تحياتي ودعائي
أخوك غريب
أبو ولايـــــف