امل الوجار وخلو الباب مفتوح

اخواني الاعزاء اسعد الله اوقاتكم بكل خير

القصائد الجزله كثيره ويحتار الشخص وش يختار منها ولكن انا احاول ان اجيب القصائد التي مانشرت
واعتذر ان كان هناك اي غلط او نشرت من قبل


أمل الوجار وخلو الباب مفتوح
************* خوف المسير يستحي ماينادي
نبغي الى جاء نازح الدار ملفوح
************* وشاف البيوت مصككه جاك بادي
يقلط لديوان به الصدر مشروح
************* ورزقه على رازق ضعاف الجرادي
يانمر مافي صكة الباب مصلوح
************* ولاهيب ءالنا يامضنة فوادي
تصلح لمخلوقً يبي يستر الروح
************* ناشي عليها معتمدها اعتمادي
يانمر لو المرجله سدو مسدوح
************* كلً نقزها حر والا برادي
لكنها من دونها المر مطروح
************* وارض تبي من بذر فعلك سمادي
رجال تقصيره مع الناس مسموح
************* لحيث ماله في القديمه شدادي
ورجال تقصيره مع الناس مفضوح
************* وكلً يقول النار تخر رمادي


الشاعر/ محمد بن شلاح

ما تجيب الا الطايله وانا اخوك

نسمع بيتين منها في الباديه من اول تلعب على الشنه

ولا اعرف منهي له

ما قصرت يالذيب

اختيار موفق

مرحبا والله يابو علي وتسلم على ذا القصيده التي اوردتها وعزالله انها من نوادر القصيد ومايجيب النادره الا نادر.وشكرا

الاخ الغالي سعيد المري

اختيار طيب واللة لايهينك يامحلفي..

يقال ان فية رجال بدوي وكلن يدور في جدة لعلة يلقى لة باب مفتوح ويتضيف عندهم, يحسب انة فالديرة كما هي العادة البيبان كلها مفتحة للضيف والعاني وانت خابر بالامور ذي كلها..المهم الرجال تعب من الدورة البيبان كلها مقفلة..مدينة والكل مسكر بابة..الين طاح على بيت مفتوح بابة واستغرب انة لقى الباب مفتوح وفي جدة..دخل وتقهوى قهواة الصبي ( ولد ابن شلاح) ونشد من راع البيت وقالوا لة هذا بيت محمد بن شلاح المطيري.. ..ابن شلاح كان موجود بجدة ذيك الفترة بحكم عملة فالعسكرية..واستعلم الشاعر محمد بالعلم وانشد القصيدة ينصح بها ولدة كما هي فالقصيدة...وممكن ان السالفة اطول او ان شرحها ولكن هذة القصة من احد الاخوان اللي عاشر احداث الشعراء الكبار امثال ابن شلاح والجبرتي وابن تويم والمسعودي وابن جرشان والذويبي والاعمى وهلال وغيرهم وقالها لي.. واللة اعلم




تحياتي

اخي الشريفي

بيض الله وجهك على هذا التوضيح

ودائما وافي

اخي العزيز/ ناصر بن بطي

اولا اعذرني فانا رديت عليك من قبل ولكن الشبكه ضعيفه ويبدو انها انقطعت قبل دخول الرد
ثانيا شكرا لك جزيل الشكر على كلامك الطيب ومتابعتك لجميع ما اكتب واسمح لي على القصور تراني مقصر معك وانت دائما وافي معي الله لايخليني منك

وتقبل تحياتي

اخي العزيز/ المري

الله لايهينك على كلامك الطيب ولك مني جزيل الشكر يالغالي

وتقبل تحياتي