دعوة لدراسة ونقد قصيدة الشاعر عايض راشد(الحر والنسر)

بسم الله

أولا وانهاء للجدل بين محن والدبل

الوزن مختل لأن العجز زايد وبأزالة الهاء يستقيم الوزن

ثانيا
مافيه شئ أسمه الصدر له وزن والعجز له وزن ....لأنه بيت واحد وما ينطبق على الصدر يتقيد به العجز

ثالثا
القصيده فارغه من الروح....بمعنى ان مافيه موضوع او موقف معين والخلل واضح في التنقل بين الأبيات

الخــــــــــــــــــــــــــــــــــــــــلاصه

الآن أغلب الشعراء يأتي بقافيه غريبه على شان يعسفها لفكرته ومن ثم يكون خرج بعمل شعري مميز .......لكن اللي نشوفه وهو نسبة السواد الأعظم للقليل مانراه ان القافيه تعسف اغلب الشعراء فينقاد معها تارك الفكره والموضوع خلف ظهره
والنتيجه نص عقيم خالي من اللون والطعم

هذا والله أعلم
ا
ل
غ
ا
ز
ي

[شفق]

اخي وصديقي ابو خالد

مداخلتي فقط لتقريب وجهات النظر , وهذا نقاش والاختلاف لا يفسد للوذ قضيه.

وانت استاذ كبير في الشعر وشاعر اعلام معروف في الاوساط الشعبيه وهذه تكفي للاعتراف بك كاستاذ اكن له التقدير والاحترام.


تقبلك لوجهة نظري اعتزاز لي باني نلت الاحترام لمصداقيتي مع الاخرين.


تقبل اخلص الحب واعذبه


شفق

الغازي.. العزيز..

انشالله مافي جدل..

و انا احترم.. رايك..


و لكن.. انا مستعد اجيب.. لك.. . 20 قصيده.. لــبن لعبون.. الصدر.. على بحر.. و العجز.. على بحر.. ..

و قصائد.. كثيره.. لحاكم.. مشعل المعلا.. بنفس الصفه..


و اترك بن لعبون لان شاعريته.. خارج,, نطاق التغطيه.. ولا يمكن لاحد ان يقدح.. فيها

اما حاكم.. فــ بشهادة الجميــع انه شاعر.. كبير.. و له وزنه و ثقله.. في الشعر.. الشعبي.. ..


و حكم.. له الكثيــر من الشعراء.. امثال.. خضير البراق.. و راشد بن جعيثن.. و غيرهم الكثيــر..


فــ ياخوي الغازي..

انت اذا عندك قاعده.. او نقل.. عن.. استاذ بالشعر.. الشعبي.. يقول انه الصدر.. و العجز.. لازم يكونون لا بحر واحد.. انقلها..

اما اذا هي غير مدعمه.. فصعب انك تفرضها..


.............

اتفق معك.. ان القافيه احيان تعسف.. الشاعر.. و كان فيه.. موضوع.. كنت اتمنى.. تقراه.. في العدد السابق من في و هجيــر.. " الصفحه الشعبيه بجربدة اليوم" عنوانه.. القوافي الصعبه هل هي فرد عضلات... اتمنى انك ترجع.. له و من المصادفات ان عايض بن راشد.. كان احد الشعراء.. اللي اخذ رايهم .. في الموضوع..


..............

نصيحه لوجه. الله..و اتمنى انك تتقبلها بصدر.. رحب..زي ما انا اتقبلك بصدر رحب... تخفف شوي من الاسلوب.. الهجومي.. اذا كنت فعلا تبغانا نستفيد.. لانه سبحان الله طبيعة البشر.. ينفر.. ممن ينصح.. باسلوب.. هجومي..



.............

ختاما.. يالغازي.. يالغالي..

اقرااااااااااا الياااااااااااء.. في حظي.. كامل.. "حظي العسٍــر" لا تقراها زي.. ما تقرا" حظ.. العسر.. "لا تلغي الياء... و بعدين ابغاك تعقب.. اذا نفس البحر. و لا .. لا


و اعذرني.. اذا تماديت..


دمت اخ..

و شكر..



...........................................

شفق.. حبيب قلب اخوه..


انا و الله لا استاذ.. و لا ني بحولها.. حنا كلنا نتعلم,,

اشكرك على ذوقك الرفيع..

الأخ الدبل

في الحقيقه انا ما أرد في العاده على أي شخص يسئ الفهم لأني في غنى عن الجدل العقيم.......ولاكن النقد لايقبل احيانا لأنه ليس اللغه الدارجه أو الشائعه رغم السلبيات اللتي نقع فيها طبعا في مجال الشعر

بالنسبه للوزن قلنالك مكسور لو تجبره من هنا الى بكره ..بعدين يا أخي انت تناقض نفسك .تقول ان الوزن مستقيم وتدافع عن أختلاف البحر وتستشهد بأبن لعبون والمعلا اللي ماسمعت عنه الا منك.


على كل أتحدى ان تأتي بنص واحد لبن لعبون يكون فيه اي مساس بكرامة الوزن,وللمعلوميه أي واحد يتجاوز في مسألة الوزن (بالنسبه للقصيده التقليديه) ماهو شاعر يالدبل


بعدين من تبغى من الأساتذه على شآن أستشهد برأيه في الوزن .مصيبه يالدبل !!!!!لأن هذا من أبجديات الشعروانت بالشكل هذابترجعنا لنقطة الصفر في هذا الحوار.....

للأستفاده-------!

بن لعبون وأغلب الشعراء القدماء كانوا يكتبون القصيده الهلاليه أو القصيده المهمله وهي القصيده اللي تكون على قافيه وحده وعندما تقرأ يخيل للبعض انها مكسوره ولكن حاشا ان يختل الوزن في قصيده لشاعر علم مثل محمد بن لعبون الوايلي

((( ارجو ان نترك الشفافيه قليلا ونناقش نص شعري فقط لاغير )))

ا
ل
غ
ا
ز
ي

بسم الله الرحمن الرحيم ...

اخوي العزيز ... سعيد الحمالي ..

صباح الخير ..

وماقصرت على موضوعك المفيد ..
وانت رايتك بيضا ..
...........................................................

اخوي العزيز جدا ... محسن الدويخ ..

هلا بك وغلا .. وشرفني رايك بالقصيده وافادني كثير ..

وصدقني .. دام ان القصيده يناقشها شرواك ..
فانا متأكد انها راح تنتهي بنتيجه محايده وسليمه ..

مشكور يا محسن ولك مني كل الحب والتقدير ...

...........................................................

اخوي وتوأم روحي ...
نواف ابن خالد ..

هلا بك وغلا .. وعسى عمرك طويل ...
وانت ومحسن اغلى الناس عندي من دون قصور بالربع الباقين ..

اللي يغلب فيه الصح بكلامك انك سمعت القصيده مني ..
فنطقها يمكن انه يشفع لتضارب وجهات النظر ...
على ايه حال ..

انت رايك على عيني وراسي يابو خالد ..

وعسى عمرك طويل وابوك بالجنه ان شالله ...
............................................................

اخوي النادر ... شفق ...

هلا وغلا يابو مهنا ..

كلامك بين لي افاق كنت غافل عنها ..
وفعلا قصيدتي هذي هي اللي طرحتها للنقد .. لانها صار عليها تساؤلات كثيره ..
يمكن لان اللهجه هي اللي خلتني اكتبها ..
لاكن ما دريت ان اختلاف اللهجات يكون صعب بالشكل هذا ..

ولو قرينا القصيده بالاسباني وبالصومالي ... اشوفها موزونه ..
على ايه حال ..

مو مشكله ...
ولو تقطعت عراقيبها بعد .. انا بكبري فدوه لك ..

لاهنت يابو مهنا ..

............................................................

اخوي الكبير الشاهد ...

ما ادري وش اقوللك ....
اول مره تحرجني قصيده ؟؟؟!!!!

وانا متوقع اكثر من هالكلام .. و على قوله اخوي مسعود اليامي .. مهيءخاطري للموادع قبل الرحيل ..

وفعلا مثل منت شايف ... القصيده هذي ما اضافت لي ولا شي ..

وتراك ان جيت للمنتدى الاسبوع الجاي .. تراني بحب خشمك ..

لاهنت ياغالي .....
............................................................

الاستاذ الكبير ... فرحان الفرحان ... ابو عبدالله ...

انت طلتك بس تسوى عندي كل القصايد ...

اكثر انسان احس انه يفهم محاور النفسيه في الطرح .. واكثر انسان يهمني رايه ..

بس يابو عبدالله ... انا تراني متدلع على القصيده ...
وصدقني عمره ماعاق معي لاقاف ولا وزن ... وهذا شي مترسخ في بالي ..
اخوي محسن يقول ..
تعبنا من قوله غن البيت والا عيده ..
وانا اقوله ..
تعبنا من قوله القصيده هذي مكسوره .. وبعدين نقول اووووووه لا هو لفضها بالشكل هذا او هذا ..

اريحيه القصيده وسلاستها لازم تكون مترسخه في قريحه ( الشاعر )

ارجع واقول ان ابو عبدالله من اهم الناس الذين يحتذى بحذوهم من خلال الطرح والفكر والقلم ..
الف الف شكر لك اخوي فرحان وانا متأكد انك تبي مصلحه الشعر قبل مصلحتي ..
مقدر ذلك ولك حبي وتقديري ..
...........................................................

ارحب يا مسعود ...
من اجمل شعراء المنتدى .. اخوي الغالي .. لك بصمه خاصه وشعرك يطربني الى حد ما اتوقعه من غيري ..ماهو غرور .. لاكن كفائه ..

اخوي الغالي ..

كنت انتظر ردك .. لانه يهمني ...
وانت ما اعجبتك القصيده وهذا حقك وحقك ذائقتك اللي محد له فيها شغل ..
وانا اعتبر نفسي منخذل اذا ما قدرت اوصل لمستوى فكرك وذائقتك ..
انت ماقصرت ورايك يدفعني للامام ..

لاهنت وعسى عمرك طويل ...

...........................................................

بسم الله

أولا وانهاء للجدل بين محن والدبل

الوزن مختل لأن العجز زايد وبأزالة الهاء يستقيم الوزن

.....

اخوي العزيز الغازي .....

تعجبني ثقتك بنفسك ... وهذا دليل على قوه في القريحه وفي الفكر وفي البحور ...

اذا شلنا الهاء تصير القصيده على بحر المسحوب .. كلام ميه ميه ..
واذا خليناها ونطقنا نهايه الصدر بنفس تفعيله الكلمه في العجر وش يصير ياغالي ؟؟!!

رايك على الراس قبل العين ..

والشفافيه ما ابيها من احد .. انا ابي استفيد ..

والاراء المطروحه كلها تهمني لاكن مو شرط اني اخذ فيها كلها لاني لي اسلوبي ولي طريقتي ولي قناعاتي ..

الشي المعقول باخذه والشي اللي عكس ذلك بتركه ..
وانت كلامك موزون ولافيه الا الصحيح ..

لاهنت وعسى عمرك طويل ..

وجزاك الله خير ...

وارجو منك ومن الكل ان النقاش يكون في اطار القصيده بس ..

وانت تقول انك ماتبي الجدل .. لذلك ياليت لو تفعل كلمتك وتطرح رايك في القصيده ويكون نقاشك (الشخصي)مع الغير في موضوع ثاني ..

شكرا لك عزيزي .. ومشرفني بطلتك .
............................................................

القصيده مهي احسن ما املك ..
واعرف ومتأكد انها موزونه .. وان الموسيقى فيها ماشيه على ايقاع واحد ..

ولاتاخذني في ثقتي بنفسي اي كلمات واي تعابير ..

ولاكن ..

ارائكم بينت لي افاق كثيره ..
وعطتني ابعاد يراجع فيها الانسان نفسه قبل يبدى بموضوع القصيده او غيرها ..

اشكر جزيل الشكر كل من رد على هذا الموضوع وكل من قراه ..

واعود واثني الشكر لاخوي الشاعر سعيد الحمالي ..

وعسا الله يقدرنا على ارضاء الجميع ..

اخوكم :

عايض راشد

السلام عليكم ورحمة الله وبركاته ....

لاأعتقد أن هناك إشكاليه !

برغم اني لاأحب الحديث عن الأوزان في الشعر ..

خصوصاً أمام نص رائع كالذي أمامي ....

بالنسبه للوزن فهو متامسك لأبعد الحدود وسليم ..

ووجود الزياده (متحرك قبل الأخير في الصدر المتمثل في حرف

السين ) ( والساكن الأخير في العجز المتمثل في الهاء )

وهو يحق للشاعر حتى وان كان هناك زياد في العجز عن الصدر

طالما ألتزم بها في جميع الأبيات ... والأمثله كثيره ..

مثال من النص أعلاه ....

(1) ... والطير فوق العذق مايندق البــر
.......... والحب مايقوى طعونـــــه مكـــــــابر
- مسحوب

(2) والطير فوق العذق مايندق البسر
......... والحب مايقوى طعونـــــه مكـــــــابره
عرض قد يكون جديد ولكنه ليس بحراً جديداً ...

كنت أتمنى الحديث عن الرائعه من وجهة نظر أخرى .. حتما سأعود

بسم الله الرحمن الرحيم ....

اخوي الغالي .. محمد ثاني ...

كلامك على العين والراس ياغالي ..

وكفيت ووفيت ..
ورايك نحترمه كلنا ...

والف شكر لك ياغالي ...


تقبل ودي ..

اخوك:
عايض راشد

مساء الخير

دخول متاخر لكن متابعه جميع الاراء

أولا القصيده وان كانت مرج البحرين يلتقيان ألا ان اجد ان عايض راشد ظلم فيها كثيرآ بذات من قبل الغازي

على اي اساس حكمت يالغازي انه القصيده مافيها روح
الفظ انفاس روحك النقديه وغادر التجنى الاسلوبي !!!

هل تعى معنى؟؟؟ القصيده بلا روح اي انها ميته وانت تعلم ان القصائد منها ما أكل السبع والنطيحه واسوئها الميته؟؟؟؟
كيف تحكم والقصيده لو درستها بعمق التمست شفافيه روح الشاعر

وله فيها فكره واضحه هي التميز بين النسر والحر وهذا صلب موضوع القصيده ومناسبتها

القلب بيت الشوق يا حظي العسر
............................شوق العيون اللي على الضيم صابره


والشعر لو يجبر من فنونه الكسر
.................. ماطـــــــــال فن الا عـــــــلينا منابره


عايض راشد في هذه القصيده كان يجلب الفكره من اعماقه مرت عليه فكره من يكسر في الشعر فاكتبها مرت عليه من لا يفرق بين النسر والحر كتبها مرت عليه فكره بعد الاحباب كتبها

واللي بكا من بعد الاحباب وش خسر
................... غـــير الدمـــــوع اللي لخــــده مثابره


ياغالي الاثمان لاترخص الجسر
................اللي بـــفعله وافـــــــي وانت خـــــــابره


مامات من ضرب الحدب موتّه حسر
................... يضــــنها تــبـقى وهــي جــــات عــابره


بيت مامات من ضرب الحدب؟؟؟؟؟ هل هذا البيت في غرفه الانعاش؟ حتى نحكم على القصيده بانها بلا روح


الذي التمسته هو العكس القصيده فيها روح وفيها معانى جميله

لكن


المأخذ هو كثره الافكار التى عبر عنها الشاعر وهذا ماشتت القارئ في متابعته

لو انه تناول فكره واحده لكان نسقها سليم

يعنى خلل القصيده هو مايسمى: عدم وحده المعنى



ارجو تقبل رايي بذات من ابو راشدالي مايتحمل حتى نقول له صح السانك؟؟؟؟






[تم تعديل الموضوع من قبل سحايب فيصل بتاريخ 11-11-2001 الساعة 10:54 PM]

أخواني المشاركين في هذا الموضوع وقراءه جميعاً,


لقد تابعت الردود والمداخلات على هذا الموضوع الشائق فرأيت ما أثلج صدري وأقر عيني من رقي في الحوار وإحترام لوجهات النظر وطرح جميل ...


وما أخرني بالتعليق الا رغبتي في إعطاء الفرصه للجميع بإبداء اراءهم حول القضايا التي أثيرت على قصيدة زميلي الشاعر العذب عايض راشد الهاجري...


هناك بعض النقاط التي أريد أن أوضحها وإلا فإن الأخوان قد أشبعوا المواضيع المثاره نقاشاً و أثروا حصيلتنا بكل ما هو مفيد وممتع.


أولا:

لقد طلبت من الاخ عايض طرح هذه القصيده بالذات لعلمي بما قد تثيره من قضايا وكنت أعلم ومتوقع ما سوف يحدث فإعذروني جميعاً على تخطيطي المسبق لما حصل .

ثانياً:

أخالف من قال بأن القصيده فيها خلل في الوزن أو كسر مع إحترامي للجميع, القصيده موزونه وهي مبنيه على بحرين وهذا ليس ببدعه في الشعر, هناك الكثير من القصائد العموديه التي يبني شطرها الاول على بحر والثاني على بحر, وأشهر مثال قصائد لون السامري. وقد ذكر الاخوان أمثله كثيره لشعراء متقدمين ومتأخرين, واخر من قرأت له شرحاً في هذا الموضوع الشاعر الكبير طلال السعيد وذكر هذه القضيه في كتابه عن الشعر النبطي وبحوره.

ثالثاً:

لي رأي خاص ولا أجبر به أحد وهو قضية بحور الشعر النبطي أو الشعبي التي يبنى عليها:
الشعر الشعبي ليس له بحور وإنما هي شيلات او الحان, ولا يمكن لأحد أن يحصر عدد بحور او شيلات الشعر النبطي أو يجزم بعدم إمكانية كتابة لحن جديد أو بحر كما يسمونه.
الشعر الفصيح له بحور متعارف عليها ولم يأت أحد بجديد منذ اكثر من ألف سنه, ولايمكن أن يأتي أحد ببحر جديد ولكن الشعر الشعبي يختلف.
السر في ذلك والله أعلم هو عدم خضوع الشعر الشعبي لقواعد اللغه العربيه من نحو وصرف وغيره. ربما تقارب بعض الاشعار النبطيه بحور الشعر الفصيح بل ربما وجدنا قصيده نبطيه مستقيمة على الميزان على احد بحور الشعر الفصيح , ولكن بمجرد أن ننطقها بلهجة شاعر اخر من منطقه جغرافيه أخري يختل الميزان.

السر هنا يكمن في اللهجات المحليه وطريقه النطق التي لا يمكن اهمالها عند قراءة الشعر الشعبي والحكم عليه.

رابعاً:
قضية الروح والشفافيه في الشعر مهمة جداً , وأنا قد علقت على الأخ عايض عندما قرأت قصيدته لأول مره بقولي: أنت كتبت قصيدتك " دلع" وأقصد من ذلك أنها كتبها تكلفاً و عسفاً لمشاعره ومزاجه وهذه في رأيي قضية مهمه وتؤثر بالذات على خاصية الإطراب لأذن المتلقي.


أعتقد هذا ما أردت ان أضيفه وإلا فإن الاساتذه والشعراء الكبار الذين علقوا على الموضوع وفوا وكفوا....




شكراً مرة أخري للجميع وفي مقدمتهم الشاعر الكبير عايض راشد.