النصوص الخمسة الفائزة بمسابقة شاعر الدعوة!

بسم الله الرحمن الرحيم





اخواني الكرام




السلام عليكم ورحمة الله وبركاته




اللجنة المشرفة على مسابقة شاعر الدعوة ونزولا عند رغبة الجمع الغفير من القراء هنا ومن خلال الطلبات التي وردت للجنة من خارج المنتدى وتقديرا لاصحابها وتقديرا للشعر واهل الشعر في كل مكان يسعدها ان تعيد نشر النصوص الفائزة في المسابقة هنا حسب الترتيب المعلن .. وهي نصوص كلها فوق حد الجمال والروعه .. وكانت الفروقات محدوده .. علما ان التصنيف تم على اساس منهجي واعتمد على تقييم :




المطلع والخاتمه
البحر والوزن
المرورنه والتخلص
الصور والاخيله
القوة والمفرده
الهدف والموضوع
السلاسة والسهوله
القافية والجرس
الالقاء والحضور




وكان التقيم يتم تاكيده لحظيا من خلال القاء القصيدة وتسلم الجداول المعده من قبل لجنة النقد مباشرة لادارة المسابقة التي تقوم بفرزها وجمع الدرجات وحساب المتوسط لكل شاعر ومن ثم المقارنة .. وقد تكونت لجنة النقد من كل من:







الشاعر : هادي الشهراني
الشاعر : داهم العصيمي
الشاعر : سعود الدهيمي



والنصوص الفائزة والتي اعلن عنها من قبل كالتالي:





القصيدة الاولي
الجائزة 15000 ريال
الشاعر: محمد الدهيمي








الا يارب غفرانك ليا جيناك فالميعاد
عرايا ماعلينا اللا الذنوب وقلّة الحيله


الا ياغافر الزلات يامفني ثمود وعاد
الا يامهلك جنود ابرهه ومدبّرٍ فيله


تجاوز عن خطايانا ليا سدّوا بنا الالحاد
نهار العدل يوم العبد ينشد وش محاصيله


نهار المرضعه تذهل عن المولود والميلاد
وراع الذكر تشفع له صلواته وترتيله


انا البارح هواجيسي تتل القلب جاي وغاد
كما تل الفراز اللي مجودةٍ محاحيله


هواجيسٍ ليا همّيت بالنوم هجدن مهجاد
وسرّني مثل مسرى الكسير اللي سرى ليله


افكّر وش تزودنا من الدنيا للاخرى زاد
وحياة العبد لاصارت مهب لله وشنهيله


وعن دروب الذنوب اللي تضيق ابنا متى المعواد
متى في طاعة الله ياقف المسلم على حيله


متى تعمر صلاة الفجر بالراكع وبالسجّاد
متى نصمت فكر والنطق تسبيحه وتهليله


متى نجعل من الدين لمنازلنا عمد واوتاد
متى نسلم من الشيطان وحيله ومحابيله


متى والله مدري لكن الدنيا صلف وجهاد
جهاد النفس والشيطان والوقت وغرابيله


يابخت اللي ليا استلهم ذنوبه دمعته تنقاد
ويسجد خوف من ربٍ مخاليقه تصلّيله


الا ياخوان حنا كلبونا من عرب واجواد
ودين الله هو دستورنا ومعدّل الميله


وانا ماني منزّه واجتهد فالنصح والارشاد
انا اخوكم واحط الذنب فوق الذنب واشيله


وداعتكم كتاب الله وسنّة باني الامجاد
وممشى حق مايطعن به الانسان أهل جيله





القصيدة الثانية
الجائزة 10000 ريال
الشاعر : عبدالله الطلحي








انت يامن تدعي العقل وتعرف الوجـوب
فاهم الدنيا وتعطـي دروسٍ فـي الحيـاه


كيـف عقلـك مايدلـك لعـلام الغيـوب
الإله الواحـد اللـي تخـر لـه الجبـاه


لو تجلى للرواسي مـن الخشيـه تـذوب
ولو نزل قوله على الصخر تتصدع حصاه


اللطيف اللي جرت بامره انسام الهبـوب
الخبير اللي ليا مـن خلـق خلـقٍ كفـاه


عالـمٍ مايصلـح الحـال ستـار العيـوب
قابل التوبه شديـد العقـاب لمـن عصـاه


كل من يعصاه مالـه مـلاذ ولا هـروب
ماله إلا يلتجي له ويمشـي فـي رضـاه


مثل ماصورك عاري وجيت بدون ثـوب
في نهار البعث عاري وخلـق الله عـراه


ماهناك اعذار حتى تلفـت فـي الجنـوب
يوم حجتك العقيده ونورك فـي الصـلاه


لامتى غافل وتلعب بـك الدنيـا اللعـوب
لايضيـع العمـر مـن مبتـداه لمنتـهـاه


توب قبل الموت يامدعـي بالعقـل تـوب
مابقا لك عذر والنـور فـي كـل إتجـاه


مايجي شمس الحقيقه غيـوم ولا غـروب
وانت كيف تضيّع الدرب وعيونـك تـراه


والله إن الشوف ماسـر عميـان القلـوب
والبصيره تكفي الرجـل كـان الله هـداه


كم عيون تشوف لكـن تعميهـا الذنـوب
والعمى ماضر بن بـاز يـوم الله عطـاه


ومثله آل الشيخ ماغرتـه كثـر الـدروب
يبصر بقلبـه وعينـه تعوّضهـا عصـاه


في الزمان اللي رمى بالفتن من كل صوب
هم مصابيحٍ تنيـر الظـلام لمـن سـراه


نورهم تمشي عليـه القبايـل والشعـوب
الكفيـف يسيـر بالـدرب والعالـم وراه





القصيدة الثالثة
الجائزة 5000 ريال
الشاعر : فهد البقمي








الحمد للي مرسل خير الانام
مرشدوهادي للطريق المستقيم


امحمله بالنور جلاي الظلام
دين عظيم منزله رب عظيم


دين تساما فوق هامات الغمام
بالحاضرالمشهود والمجدالقديم


اسلامنا دين التسامح والسلام
والنصح والتوجيه للنهج السليم


دين رسم حد الحلال من الحرام
وحياتنا عقبه لها مبدأ قويم


لو الحياه بلا تقيد بالنظام
تفقد حلاوتها ومبداها سقيم


وانزل كتاب له بطياته كلام
قدسيته تضفي على فحواه ديم


حكمة اله عادل حي سلام
مهيمن قدوس جبار حكيم


بين لنا قبل النهايه والختام
درب الجحيم ودرب جنات النعيم


فاللي على درب الهيام اقفا وهام
نهايته خالد مخلد فالجحيم


واللي سلك درب استقامه واستقام
يجزاه بالجنات غفار كريم


شف زحمة الحجاج للبيت الحرام
شيبان واطفال ورياجيل وحريم


وشهر ارمضان اللي به العالم صيام
لااكل لامشرب ولاهرج ذميم


ومساجد تملا تراويح وقيام
غير الفرايض والسنن والله عليم


الجنه الجنه لهم شف ومرام
طلابة الرحمه من الرب الرحيم


وياسامعي وانت الكريم ابن الكرام
تكفى تغانمها ولو تكفل يتيم






القصيدة الرابعة
الجائزة جهاز لاب توب فاخر
الشاعر : عبدالله الفهري








ما اصعب من القرار إلاّ إتخاذ القرار
إتخاذ القرار اللي يحدد مصير


بين جنه وفوز . وبين خيبه ونار
شر يجزا بشر . وخير يجزا بخير


كل مسلم ذكي يملك زمام الخيار
يعرف انْ الاجر مقدار جُهد الاجير


ويعلم انْ لاخره مقر دايم ودار
وان دنياه للأُخرى ممرٌ لا غير


ويعرف انْ الاجل كنّه يبي منْه ثار
والعمر ينطوي لو طال مثل الحصير


مثل ما تاخذ من الليل شمس النهار
ياخذ من العمر كثر الشهيق الزفير


ويحتزم بالإجابه لسئلة لختبار
يا عسى يتقي مُنكر ويسلم نكير


ويدري انه بيوم الحشر يجني ثمار
ما زرع في حياته بين فيّ وهجير


ويسرج الـ غايته وسيلة الإنتصار
غايته جنه وعتقٌ من الزمهرير


مهر غايتْه معْ الايمان شد الإزار
وشمّر الـ مهرها كمّه وجافى السرير


بالقضا والقدر مؤمن وزاده وقار
نور بالوجه وإطمئنان قلب وضمير


إستقامتْه في بحر الظلام الفنار
وقاربٍ للنجاه ان جا لموجه هدير


ستّل من العزيمه له جناحٍ وطار
شد حبل الإراده . فك سلك الحرير


للطموح ان تعلّى حق يملك مدار
اسوةٌ بالكواكب والسراج المنير


بنشوة الانتصار يكيّفون الكبار
وعقدة النقص فيروسٍ يصيب الصغير


الشجاع ادمن الاقدام خوف إنكسار
والجبان ألبسه خوفه عباة الحقير


فازو اهل اليمين وخابوا اهل اليسار
اغنم الليل واستثمر بثلثه لخير





القصيدة الخامسة
الجائزة جهاز لاب توب فاخر
الشاعر : خالد بن صمان







آمنت باللّي ماعَرف عُظمه صخيفين العقول
اللي تكفّــــل للنفـــــوس .. بزادها وايوائها


سبحان من بامره تهبّ الرّيح ,, وتمـرّ الفصول
وسبحان من سوّى دواها , قبل يصعب دائها


وسبحان من حدّد لذيك اليانعه موعد ذبول
وسبحان من يقدر بعد طول السنين احيائها


وسبحان من قُدْرَتْهْ تبهرنا ليا حــدّ الذهول
اللي يسيّـــر قصّـــة الدنيــا .. على ماشائها


اللّي ليا عاقت وضاقت واشْكَلَتْ كلّ الحلول
ولا لقينــا يــدّ تَفــزع بين كــلّ ارجـائها


برحمةٍ منّه وحكمه تنفتح بعــض القفول
اللي بها خِيره لعبده ... لو يرَى ضرّائها


يارب تنفع بي وتاجرني وتجعل لي قبول
ويالمستمع لاتْتــــْعِبْ اذنك ماطلبت إصغائها


انا مرادي قلبك الواعي ولا تِدْخْل ميـول
وعُقْبَه تَخيَّــر يامفكِّــر إيئها من لائها


نـِدَاااء للّي ماخذ الدّنيا على عرضٍ وطول
ولا لقى راحه ,, ونفسه مااستطاع اِروائها


حاول ولومرّه وجرّب , ماانت بالذنب مغلول
والبس لباس الدّين والطاعه وعيش اجوائها


احفظ صلاتك وادع ربك قوم بنصاف الليول
صُمْ,زَكْ,زُرْ بيت الله وداوم وشوف اصدائها


لذّه فذا الدنيا . ووسْعَة بال وافراحٍ تطول
ماهي بلذّة ساعةٍ وحده بكذب اغوائها


وقبرٍ مُوَسّع باذن ربّي وسطه تصول وتجول
روضه من رياض الجنان اللي تشدّ انبائها


وشيٍ تقابل به إلــه العدْل في يــومٍ يهول
يارب تجمعنا مع وجيهٍ تْشعّ اضوائها


لُقّبْت شاعر بس ذالليله على هيئة رسول
وان ما اعجبك أاء القصيده لا يهمّك يائها


بمرّ طرقي مامعي حيله وجالب لي ذلول
وضحاً وسايقها بفكرٍ بان بين اجزائها


ولا تزكّيني وانا كسّرت كتفي بالحمول
ونفسي معَ خُبْر العواقب تستهين اخطائها


العمر ينقص والسنين تزود حولآ باثر حول
وحنّا .. شياطين الخزَى كنّـــا نريد ارضائها


هيّا بنا نترك ظلام الجهل وننير العقول
ونفتح معاً صفحه جديده تهتوي قرّائها


ابديت ماعندي ولا وفّيت لكن وش بقول؟
عسى القلوب الغافله تصحى لشيل اعبائها




والسلام عليكم ورحمة الله وبركاته

لاهنت يابن طراد ولايهون الحاضر



قصائد رائعه وشعراء مبدعين



الف مبروك للفائزين

::لاهنت يابن طراد ولايهون الحاضرالف مبروك للفائزين::

الف مبروك للفائزين

يستاهلون كل خير


لاهنت ياعلي



كل التقدير للجميع

الله لايهينك ياعلي

وبيض الله وجه كل من قصد في هالمناسبه سواءً فاز او مافاز لان الجائزه الافضل من رب العالمين

عسى الله يكتبها لهم في ميزان حسناتهم

ومبروك للمبدعين الفايزين

قصائدهم رائعه ومبدعين

الف الف مبروك لجميع الاخوان الفائزين

بادره طيبه اتمنى استمراريتها

واشكر الجميع سواء القائمين الداعمين او اللجنة وجعل الله ذالك بميزان اعمالهم

لاهنت اخوي علي بن طراد

تقديري

الف مبروك للفائزين

يستاهلون كل خير


لاهنت اخوي



تقبل التقديروالاحترام

ما اجمل يوم التكريم من يوم
نسال الله ان لايحرمنا من اجره

تكريم وفرح ومشاركة من الداعية الشيخ
محمد العريفي


مشكور اخوي على على جهودك

قصائد رائعة جدا
وشعار جزلين
ومناسبة جميلة
تسلم يابوطراد

لاهنت لاهنت يابو عبد الرحمن وافي وجهودك تنومس وابيض وجه


نصوص تجمل ولجنه وافيه والجميع فائز بالاجر بإذن الله

مشاء الله تبارك الله


القصايد وافيه



الله يوقف كل دعوه في دين لله



وجزاهم الله خير ...

اخي الغالي على بن طراد


لا هنت وبيض الله وجهك على التغطية الرائعه


اهني جميع الشعراء الفائزين ونقول لمن لم يحالفه الحظ عقبالك في مسابقات قادمه


لعل دور المنتدى في هذه المسابقة هو اللافت


فبكم جميعا كان التألق والحضور والابداع


صح الله لسان كل شاعر ابدع هنا


كما اهني اللجنة المنضمة على نجاح المسابقة واهني جميع القائمين على المنتدى الشعبي الاخ العزيز ابو زياد والاخ هادي بن عسكر والاخوة جميع .

كما اهني اللجنة على اختيارها الموفق للنصوص الشعرية


تقبلوا تحياتي وتقديري

اخوكم

ابونايف

نصوص جميلة ويستاهلون الربع


تحيتي