Tweet
تقول لي لا ذي اللي ماتوقعتها
........لا انت تمزح معي لا جات زلة لسان
ماشفت نارك بقلبي كيف ولعتها
........ماشفت عاقل يصيبه من غرامك جنان
ماشفت كيف القصايد فيك دلعتها
........ياعين ياليل يادانه وياليل دان
ماشفت كم لجلك السمار سمعتها
........ماشفت كيف احتويتك بالغلا والحنان
ماشفت عنا العواذل كيف سنعتها
.........ماشفت كيف اتحدى بك ظروف الزمان
ولو ان نفسي بماتهواه طاوعتها
.........اذنبت والذنب يحسب والحياه امتحان
خلاص كل الرسايل منك قطعتها
..........ماهوب انا اللي على شان المحبه يهان
حتى هداياك للاصحاب وزعتها
..........العطر والمسبحه والخاتم الكهرمان
وبقي لك بناظري صوره وودعتها
.............مع السلامه ولا كنا ولا شي كان
لو المراره على بعدك تجرعتها
..........بس اعتبر ماحصل قسمه وكبوة حصان
خلاص هي فرصة وحده وضيعتها
..........ماعاد لك فى كيانى بعد ضاعت مكان
خلهم يقولون بايعها نعم بعتها
.........شف كيف ربي نكب حظك بزلة لسان
_________________________________________________
تعليق