الصومعة

(( الصـومـــعة ))

يرحم زمان الشوق واهل الذوق والحب النقي
والديـــره اللـي من ثمان سنـــين مــا مرّيتــها

.
الديره اللــي كـــنت فيها مع جنــوني التــقي
وانراقب اشموس الوفا تشــرق بشرفـة بيتها

.
الجادل اللي قبلها كنت امروء القيس الشقـي
يا مـا رعابيب العرب مـن ناقــتي عشّيتــها

.
واصبحت في غمرة هواها راهب الحب التقي
مـن طهرهــا حـــتّى يــَدي للخـــدّ ما مدّيتــها

.
يا كنّـــها شمس(ن) تجلّى حسنها في مشرقي
شقّـت سيوف انوارهــا ظُلمة عُمُر عــانيتها

.
قالت لي: احساسك سما قلت: اكفخي ثم حلّقي
فوق النجوم اللــي عشـــانك بالسهــر عدّيــتها

.
قالت: اخاف من البحر جاوبتها مــا تغــرقي
ما دامــك الحوريّــه اللــي خافقي عفريـــتها

.
واسقيــتها خمرة شعوري والجنون المنطقي
واهديتها شيخة قصيد(ن) باسمها سمّيـــتها

.
لكنّها غابــت وشـبّــت نـارها فـي مَحْـرقي
وانا بصومعتي ضلــوعي لاجلــها شبّــيتها

.
واليوم جيت انزف دموعي وارثي الحب النقي
باطراف ديره مـن ثمان سنين مــا مرّيــتها

.
وانقش على صُمّ الصخر ونّه وروحي ترتقي
يا ليتــني قبــل المفــارق يا فــهد ضــميتها
يا ليتــني قبــل المفــارق يا فــهد ضــميتها

مراد الشيخ