ذعّـــــــــــــــار

(( ذعّــــــــار ))

ما دام صاروا كل الاغرار شعّار
واتكاثر اللـي يدّعـــون (النبـــــوّه)

قم يا قريــني ذايع الصيت ذعّـار
يا شـاعر الجــن الكبير المفـــوّه

عمِّر لي الغليـون ثم اشعل النار
وانزل لميـدان الشعر يالفتـــوّه

سلّم على لِــكْبار تسليمة اكـبار
واهدي لهم درع الوفا والأخوّه

سلام للحيين مع وقفــة إكـــبـار
للي رحل عنّا ولا غاب ضــوّه

وان جاك شاعر باوّل الدرب سيّار
مدّه من اعزومك عزيمـه وقـــــوّه

وايّاك تَحقِر شاعر ايدينه اقصـار
دامه حشَم نفسه ولا بان ســـــوّه

واللي جلب للشعر بابياته العـار
الجاهل اللي جوّ الاوهام جـــوّه

اقبل عليه ابهيبتك مثل الاعصار
ما عاش راس(ن) كان سيفك عدوّه

دامه بليد(ن) خاوي الجوف ثرثار
متكبّــر المشيه قليـــل المــــروّه

مسعور ينهش بالقفا لحم الاطهار
يحمل شنب واطباعه اطباع حوّه

والشعر لا من طاح بيدين سمسار
يظهِر لك الوجه الكريه المشـوّه

وان صار بيدين الصناديد الاخيار
تلقاه بدر(ن) مكتمل في عُلــوّه

ذعّار يالصنديد يا شيخ الاشعار
يا شاعر الجن الكبير المفـــوّه

هذا الشعر ما يحشمه غير بيطار
وما كل من قاله يعانق سمـــوّه