Tweet
.....الاهداء\ الى الخليل بن أحمد الفراهيدي.
أغلى طموحي كتابة شعر يشبهني
.........................وجهي قوافيه,بحّةصوتي الحانه
ادخل بحوره,ولايخطر على ذهني:
........................ماسه ولوله وياقوته ومرجانه
مابيه دامه من الداخل يشوّهني
.......................مابيه دامه سرق من جدي لسانه
ابيه مرآة بعيوبي تواجهني
......................ماهوب كذب ودجل ونفاق وخيانه
مانيب معصوم حتى انّه ينزّّهني
.....................اللي منزّه عن التقصير سبحانه
دليلي ان تهت,وان دليت توّهني
.....................يحزن لفرحي وانا تفّرحني احزانه(!)
ابخترع لي قوافي بكر واكتب على اهني
.....................والوزن:دانه الا يادان يادانه
وابرسمه وردتين, ولونها دهني
....................وابوزنه,ثم ابرجع واكسر اوزانه
اكسر كذا: وانا ناسي ينبّهني
...................لا,لا,كذا: ينبّهني بنسيانه(!)
ياصوتي اللي من الاعماق ينّدهني
..................بعيوني اسمع صداه وقدّّح صوّانه
اطلق قيادي وحلّ من الجسد رهني
..................خل القصيده تصير بجد انسانه
لاصار ماهي من الضيقه تنفّهني
..................وتضحك عشاني,اجل من هو على شأنه؟!
قصيدتي,قوتي,لاجار بي وهني
.................والروح بالحزن مكّسيه وعريانه
تقول لي:ياشاعري مابيك تشّبهني
................الشاعر ان مات صار القبر ديوانه!
-------------------------------------------------
*صدر البيت السابع من القصيده,على بحر آخر, يوزن على بحر القصيده على هذا النحو:
(ابخترع لي قوافي روّيها اهني)(!)
* صدر البيت الاخير, على بحر آخر أيضا, لوزنه على بحر القصيده:
(تقول:ياشاعري مابيك تشّبهني)!
*البيت التاسع, كسرته عامدا متعمدا(!) الرجاء عدم وزنه.
*ملاحظه قد لاتكون مهمه\ وزن القصيده هو(يادان دانه الا يادان يادانه)
*شكرا سلفا لتلطفكم بقراءة قصيدتي المتواضعه. مع أطيب المنى.
تعليق