Tweet
بسم الله الرحمن الرحيم
السلام عليكم ورحمة الله وبركاته
هذي القصيدة موجهه للخوي الغالي الشاعر عارف بن ظفره
[poem=font="Simplified Arabic,6,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black"]السلام عليكم ورحمة الله وبركاته
هذي القصيدة موجهه للخوي الغالي الشاعر عارف بن ظفره
.
.
ياراعي الجكسار الالفين وثنين= الموتر اللي ما يحب الوقافي
جيبٍ من اليابان مصنع وتظمين= لا دق سلفه .. يالله إنّك تكافي
مكينته مثل النحل في البساتين = ولاَّ تبادل سر حزب ائتلافي
والنور لامنّه شعق يجهر العين = زاروق شمسٍ بين نوٍ كثافي
وجهه مثل وجه الأسد في البراثين = والجنب لامنّه خذا الالتفافي
مهرٍ تربّت في رعاية سلاطين= مصيونةٍ ما روّضوها عسافي
ومرايتينه صمموها بتقنين = فيها من اوصاف الثبات اتصافي
خوذات جنديين حربٍ مجازَين = عقب الجزا ما جاهم امر انصرافي
تضليلته ملبس ملاك المزايين = اللي تغطيها شيال العفافي
جناحه الخلفي كما ذيل شاهين= لولا القواعد قام يِرفف ارفافي
وتوايره لامن تمختر على الطين = مشية زعيمٍ لا وطى الارض حافي
الجيب والسواق زينٍ على زين = والجيب وافي يوم راعيه وافي
ياخوي (ابو سياف) وجه الميامين = ما قال عزمك للطريق انتصافي
شد العزايم واعقد الراي ذا الحين= قبل إيتهيا في الامور اختلافي
لامن تفقدته وفللت بنزين= لا تنتظر حتى الخوي السنافي
واشقر على تمثاله يسار ويمين= على طريقك مدةٍ وانعطافي
لا ينزل ( امبيره) عن 160.= عالسيد مرّ ومرةٍ عالكتافي
لا مال جنح الليل والناس ممسين = مثل السهم يقطع بعيد الفيافي
عرّض على الوادي والافلاج في حين= كنك غريبٍ عازمٍ بالنكافي
منصاك عارف راعي العرف والدين = المدهل اللي ما يعديه لافي
لامن وصلت البيت حسب العناوين= قل له.. وقلّ الهرج شافي وكافي
سلام .. تسعْ إميه.. وتسعه.. وتسعين= سلام من قلبٍ صدوقٍ وصافي
سلام من مبدأ عتاب المحبين = اللي تدوّر للوفا والنصافي
يا عارف الوافي رفيع الموازين = كريم مدّ وفي الوغى ما تخافي
يالغانم ابن الغانمين الكريمين= الصادقين الواثقين النضافي
ربعٍ لكم بين الرجاجيل تمكين =عند النوايب تِثقلون الخفافي
يا صاحبي نلقاك من وين لا وين = طوّل بطاك ..أرَبّْ مابه خلافي؟
إي والله إنّا ما طردنا المقفِّين = نلقى الوجيه ولا تبعنا المقافي
نستقبل المقبل رحابة مودّين= وان كان جنّب عن قبَلنا ذلافي
طردٍ ورا المقفي بخايس تثامين= مثل الثمر لي زل حل القطافي
واهل النوايا والضعاف الرديين = واللي يحبون الحبي في السوافي
إن جو فلا حنّا عليهم شفوقين = وان روّحوا فلا عليهم حسافي
واهل العزايم تلبث سنين وسنين = إلين تنهكها السنين العجافِ
أحيان نجدل للغنايم سبوقين= واحيان ننكف والعزايم ضعافِ
واحيان ننصى موصد الباب عانين=واحيان بين اهل الموده تجافي
من زلّ يلقى العذر عند الجزوعين = ومعاود الزلّه يخلّى عيافِ
حتى ولو كانوا هل الركب غاوين= مايلحق اللي يبذل الجهد قافي
هقواتنا تارد كبار الميادين= وادنى منازلها بروس الطفافي
وان خيّبت .. يالله اليك المزابين = ياعالم(ن) حبسٍ ورا الجوف خافي
بامرك يجل الخطب والقاسي إيلين= ومن كل بلوى يامعافي تعافي
اجعل بدايتها على الوضع تحسين= واجعل خواتمها سلام وعوافي
.[/poem]
تعليق